يا داعج العين والحيّات مقرونه = والخدّ برّاق ليل في الدّجى التّالي

فيك الحلاوه والجمال اللّي يحيدونه = وتحوز عن جملة الآرام يا الغالي

محبّتك داخليّه في القلب مضمونه = ولا بدّ أصبر على مكنون غربالي

والقلب منك العواذل لو يعذلونه = ما يستمع عذل من جا عنك عذالي

لو للهوى شرع في تحكيم قانونه = ما كنت مظلوم في تعذيب ونكالي

شوفك يعالج جروح القلب وطعونه = والموت يا صاح من تعذيبك اشوالي

راعي جديل سبيب كاسي امتونه = متعثكل فوق متني ردفه العالي

العين عين أشقر للصّيد مضمونه = مطلوب مرغوب لو كان الثّمن غالي

والخدّ جنديل يسني من سنا لونه= مشراق ضيّ يشابه نور لهلالي

مبعد خلاوي من اللّي هم يرودونه = يتعب ودونه نزوّ المبعد الخالي

لى جال طاريك همت بروح مشطونه = عليك واصفق ابراحة كفي الخالي

مثل الذي هام بصحرا ما يدلّونه = عليه منها زريق ابزوم شلاّلي

يا ناس خلّوه المولّع .. لا تلومونه = ما كان ينلام من مثلي على حالي

يا بن خليفة بسهم الموت موسونه = دنفا وفيها صريم البيض قتّالي

شكواي للّي يعرف القاف ووزونه = جدواي ويفيدني في ردّ لامثالي