[poem=font="times new roman,6,red,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]

يأهل الوطن تكفون لاتدمرونه=لاتسمعون لهرج حاسد وطماع
أنتم هل التوحيد وأنتم حصونه=يد بيد نكافح اللي له أطماع
هذا الوطن غالي ولازم نصونه=نموت جوع ولانسلم للأتباع
عهودنا وأيماننا مانخونه=واللي تمسّك بالعهد صدق ماضاع
كم واحد(ن)يطرف بيده عيونه=وش ضرّه أن هدا وركز بالأصباع
أهدافهم هذا الوطن يقسمونه=وأنتم هدفكم بس تحسين الأوضاع
ومليكنا يسعى فكونوا بعونه=مافيه داعي نحول الهم لأوجاع
اللي يبي التفريق لا تتبعونه=السم مايسمّن فقير إليا جاع
ياأمة التوحيد لا تفرقونه=إليا افترقنا سهل نشرا وننباع
مالي هدف غير الوطن تحفظونه=لعل ياصل مطلبي بعض الأسماع
صوت العقل طلبتكم تسمعونه=من شاعر مخلص ولاهو بتبّاع
شعري وفكري بعضكم يعرفونه=عمري ماكنت بيوم كاذب وطماع
[/poem]
فلاح العايد