الله لا يمسيكم إلا بكل خير

رغبة مني في التواصل .. ليس إلا .. حبيت اطرح كلماتي المتواضعه لعلها تجد بعض القبول والإستحسان ..
وأتمنى أن تكون في وقتها المناسب

مدخل

جيلنا .. يا جيل عابث في حقوقه ..... يا غروب المجد في طلّة شروقه ..

في شتاته تاهت افكار ومعاني .. وصار الاول مركزه ثالث وثاني ..

جيلنا منحاز في رايه وذوقه .. لو رقى مره تعلقنا معاه .. وان هبط عادي .. تعوّدنا خقوقه

وان سطع نجم وسرق نور النهار .. طرْنا في كل انبهار .. كلنا نتبع خطاه .. لو هو ما يسْوى ثواني انتظار
دربه بنسْلك طروقه .. ما حَدن عنّا يعوقه

كلها يومين يا نجم النهار .. وينطفي الضوح وبروقه .. جيلنا باعك لقى غيرك منار .. يا بو اللمعه السروقه ..
صرت سلعه مالها إسم وشعار .. موضتك صارت غبار .. واصبحَت حيل امْحَروقه

لا تكدّر او تحسّ بْإنهيار .. واعرف انّ النصف ما يملك قرار .. ونصفنا الثاني تخلّى عن خفوقه ..
وانحطاط الذوق يشرب من عروقه .. !
والتفاهه عشّ لافكار ٍ صغار .. عاشت بعقْله يتيمه بانحسار .. علّها قاسي عقوقه ..

واصبحَت دون اختيار .. تسْلبه كامل حقوقه .... !!

جيلنا المحبوب لو يسْمح رضاكم
.......... أعذروا كلمات غنّت بالحقيقه

الوسائل كوم يملاها سماكم
.......... تمْلكون ابهـار واسلوب وطريقه

لكن الأفكار تشْكي من عطاكم
.......... أطلقوا الأحكام من نظره عميقه

يا فريق النحل غذّونا ذكاكم
.......... عقْلَنا يحتاج للعبْره وثيقه !

تمْطرون الشهْد من صافي حلاكم
.......... من شذى الازهار يغريكم رحيقه

العسل بسْمات يضْحكها غلاكم ؟
.......... أو دموع الحب في لمْسه رقيقه ؟

نحْسدك يا روح يسْكنْها حشاكم
.......... يا فديت الصدق بالروح الصديقه

جيلنا محتار مدري وش بلاكم؟
.......... تسرقون الراي من سارق رفيقه

تتْبعون الخيل يا شقرا وراكم؟
.......... غرّكم جمهور مغـرور بْفريقه

من مزاج الغير يتبلْور هواكم
.......... والمزاج اوهام خدّاع ٍ بريقه

يا عبير الورد لا يسْقي ظماكم
.......... ناشف ٍ هلْكان تفكيره وريقه

بالجهـل يا ورْد لوْ شوره سقاكم
.......... يذْبل الإحسـاس من عطْر الحديقه

إعتمدتوا ليه وانصاعت خطاكم
.......... تسْمعون لْصوت يطْربْكم نعيقه

عقْلكم مرتاح ينْعم في شقاكم
.......... دايم ٍ تشكون من همّ ٍ وضيقه

وقْتكم مشغول بهْموم وتراكم*
.......... نصْفكم دخّان والثاني حريقه

جفّت الأنهار من موجة جفاكم
.......... البحر عطشان وامواجه غريقه

الخليّ مرتاح ما يسمع غثاكم
.......... ساعتي أيام وايّامه دقيقه .. !

من شكاي الليل يجْهش في بكاكم
.......... شكْوتي لله رزّاق الخليقه .. !

إستفزّ الليل موضوعي معاكم
.......... من صميم القلب خلاّني عشيقه



.
.

* تراكم = اشياء متراكمه

وسلامة اعماركم