مساؤكم رضا وقبول من الرحمن .. وصباحكم رحمه ومغفره ..





.
.
.
.
.
.
.
.





كلّي شتات ومنتظر تجْمعني
.......... خذني حقيقه بعْثَرَت سامِعْها !

إسْأل ضميرك ونْ رضى يتْبعْني
.......... إسْحب على القسْوه معاي و بِِعْها

ظامي حنان وْلَمْسِتَك تِشْبِعْني
.......... رغبة هواك اللي تبيني طِعْها .. !

راح النهار وموْعدك وَدَّعْني
.......... وكلّ السنين اللي مضت وَدَّعْها !

قصّة غيابك شرْحَها لاوَعْني
.......... ليله ورى ليله عجزْت ابلعْها !

أشْكي على اللي ما نوى يسْمعْني !
.......... كَفّ الملام وْ حاجتي ضيّعْها !

دمْعي تهاديته ولا طاوعني
.......... عيني عصَت يوم الألم شَرَّعْها !

حكمة سماي ومبْدأي يمنعني
.......... أكتب عن الركعه وانا راكعها !

شاعر مشاعر حزْنها يدفعني
.......... أسْقي دروب ٍ بالأمل زارعها !

إفْهَم يبو تمّام وْلاَ ترْدَعْني
.......... نشوة غرام البحْتري تابعها !

خلّك حكيم وحاول اتْطالعني
.......... وشلون أركِّب صورتي واشْلَعها !

أسْهَل ذنوبك بالوعد تزْرعني
.......... مثل النخيل وْ طلّتك مانعها !

قلبك يبيني والعقل بايعني
.......... تلْبس ثياب ٍ بالخفا تنْزَعها !

قل يا خفوقي للحبيب المَعْني
.......... روحي شتات وشوفتك تجْمَعْها !



.
.
.





سلامة أعماركم