الخوة اللي على ما قيل حي الله
من عادتي يا عريب ا لساس ما أبيها
والخوة اللي تهين الكفو وتذلة
لا خير فيمن مشى في صف راعيها
وأقول لك يا عريب الساس عز الله
إن الليالي كشفنا بعض خافيها
بعطيك موجز وحنا نشرب الدلة
في ساعة ما نسينا ذكر واليهـــــــــا
الحر ملزوم ياخي ينتقي خله
خذ حاضر القوم من تاريخ ماضيها
والوقت ما هو دواما للفتى فلة
والنار ما تحرق إلا رجل واطيها
والطيب ما يلتقى في كل خلق الله
يا كم نفوس تجرك في بلاويهـــــــا
بعض البشر خوته تخرج عن الملة
تغويك لو كنت للتوحيد تدعيهــــــا
وأنا أنصحك يا رفيق الدرب عبد الله
ناس تبيع الكرامة لا تماشيهـــــــا
ترى ألردي يا سنادي صحبته عله
نفسه على قلة الشيمة مربيـهــــــــا
من باع دينه وباع المرجلة خله
عسا لياليه سهم الموت ينهيها
والوافي إذا وفا يوفي معك كلـــه
تهرج لسانه على الطالة ويوفيـــهـا
لو سرت في سيرته ما يلحقك الزلة
نسل الرجال التي تسعد مخاويها
إن شاف زولك يقل يا حي هالطلة
ون غبت عينه ترقب شوف مغليها
خلك معه في طريقه واترك التلة
اللي تجي من نفوس خاب طاريها
هذا كلامي إذا كان أعجبك شله
وان شان خله ونفسك لا تعنيها