طالبـك يالله مجـيـب السائلـيـن=
رحمتك ورضاك فـي يـومٍ يهـول
يـومٍ يشيَـب عيـون الناظـريـن=
وفيه كل الناس فـي حالـة ذهـول
ومن عظـم مافيـه ياربـي تعيـن=
تشخص الأبصار.. وتحير العقـول
يالله اجعلنـا بعـفـوك فايـزيـن=
وضمن من يارد على حوض الرسول
والحيـاه اوهـام ياللـي غافليـن=
والزمـن دوار .. والدنيـا ختـول
وكل نفس اتموت لوعاشت سنيـن=
وكل ملـكٍ غيـر ملـك الله يـزول
وكل فصـل وينتهـي والواهميـن=
يحسبون ان (الربيع) أربع افصـول
والشقي من غـره ابليـس اللعيـن=
وبالمعاصي دايـم يصـول ويجـول
ضاع عمره فـي دروب الجاهليـن=
ودايـم الاعمـار تقصـر ماتطـول
ليـن مـات ولاتـرك علـمٍ ثميـن=
ولا عمل صالح .. ولا اشداد وذلول
والحظيظ اللي جمـع بيـن الثنيـن=
يوم غيره في صعود وفـي نـزول
من كبر حظـه جمـع دنيـا وديـن=
وعنـد ربـه والاوادم لـه قـبـول
ولو يلين الصلـب عزمـه مايليـن=
كنـه بليهـان شـيَـال الحـمـول
أن حضر يكحل عيـون الحاسديـن=
وان رحل وان غاب تكفيه الفعـول
وياعسى اهل الطيب دايـم سالميـن=
حافظيـن السلـم الاول والاصـول
الرجـال اهـل الوفـاء والطيبيـن=
مـن فداياهـم مفتشـت الـعـدول
وأهـل النمـات واللـي منصتيـن=
لجلهم لو كان مـن بـاب الفضـول
عالم(ن) وقـت الرخـا متواجديـن=
ولا لهم ينشاف وقت الضيـق زول
ومن يقصـر فـي لزومـه مرتيـن=
ما أعتقد (للثالثـه) عنـده حلـول
ومن يجنب عـن سلـوم الاوليـن=
لايواصلني ولا ابغـى لـه وصـول
ياجد أشباهه.. وانا جنبـي متيـن=
ولا يعد مـن الرجـال الا الزحـول
شاعر ومـن روس قـومٍ غانميـن=
صيتهم عالي رغم خشـم العـذول
وانـت ياللـي لايسـار ولا يميـن=
والله اني فيك مدري ويـش اقـول
والنصيحه كـان لـك قلـبٍ فطيـن=
والجهل دربٍ غـدا فيـه الجهـول
بختصرهـا كلهـا فـي كلمتـيـن=
ولكثيـر الهـرج ماعنـدي ميـول
زيَـن النيـه لـك الدنيـا تـزيـن=
وفي يد الرحمـن مفتـاح القفـول
تمـت وقولـوا معـي ياسامعيـن=
ياصلاة الله علـى وجـه الرسـول