قالوا علامك يا عمر دوم محـــــــزون
قلت البلا مركــــــاي والياس مجناي

والعزم هـــــافي بامر الاقدار ممهون
والروح تتلي ظـــامي الشوق وبكاي

لا حول لا قوة ولا حـــــــــزام ومتون
اسير جرحــــي والعمى يامر خطاي

عجـــزت عن عينٍ لها الدمع مضنون
وبحلت في قلبٍ عصا صـــايب الراي

ســــاقتني الأيام واضحيت مسجون
وسط النقايد والجــــهل والعتب ماي

من عجْـــــــــزوا التبكير لا رج يِردون
يروون من تاليه والصـــــــــوم مبداي

وتردين يالهــــــــدبا على ما يعَجْزون
شربك قراح العــــــــد والعِرف مرواي

ان ما رويت بشوق والا فـــــــلا اكون
موتي ولا الحــــرمان يسكن حناياي

#عمر_بن_عبدالمحسن