الله على الذكرى وطول التفاريق
الذاكره. لوتنغسل. واغسلها

ياغايبه والفكر يسجع طواريق
فيك اختلي عن جملة الناس والها

عندي مقامك غير كل المخاليق
انقا لك عروق الغلاء واختزلها

كنك دعوج موالفات الشواهيق
حورك تطابح بالهدب من خجلها

عكشٍ على الوجنه مطابح تفافيق
تبطحت وولامها من عجلها

توت المضايا شفتك والعسل ريق
ياليلة القمراء وفيضة نفلها

غرة مهاةٍ حققت بالمدانيق
تزبنة حزم الحجر عن سهلها

ارتاح لك واحن لك حيل واضيق
لاغبت عقلي كل حاجه ذهلها

اهجر دلا لي والرجال المطاليق
ماواطن قصور المدينه واهلها

لو عاتبوني فيك بعض المطافيق
حلو البلح عنهم بشامخ نخلها

واللي يحسب الحب نكته وتعليق
شخصية العاشق حرام انتحلها

طول غيابك يامغضغض زماليق
حبك غدى روحي وجوفي نزلها

يامقبله بجوار بيض المصافيق
تفهق معنقك الطويل وتشلها

ويامقفيه بالضافيه من تساويق
يم الخصور الصايمه ويتحملها

لي بان مثل معرجنات المشاريق
سقاهن الهطال وايضاً غسلها

علقتي المقنَع بليا علاليق
من شاف ماشفته تدهور واكلها

لوشفت غيرك مترفات الغرانيق
الله يخلي كل وحده لاهلها

شعر متعب الفارس بن طواله