السلام عليكم ورحمة الله وبركاته

مما راق لي عسى تروق لكم
ًً""""""""""""""""""

حبيب الروح لا تزعل ولا يطري عليك صدود
ترى اللي حب لازم للعتاب يصير متصدي

انا ادري اني غلطت وكلمتي لك جالها مردود
ولو مردودها قاسي .. سحابة صيف وتعدي

تكابر ياحبيبي والرضا في داخلك موجود
تحد وعاند وكابر وانا ماني بمتحدي

تراها نقطةٍ سوداء في صفحة حبنا المشهود
حرام تصير مع وقتي ومع باقي البشر ضدي

حشى ما أجوز منك لو يقولون الامل مفقود
ولو تبيـّن بضحكاتك تجاعيد بطرف خدي

حمول التضحيه في الحب أظنك قدها وقدود
تحمل وإدمح الزله ترى ماهيب من جدي

وإذا قصدك تحسسني بخطاي ولكل شي حدود
دخيلك لا تعذبني تراني وصلٍ حدي

يعذبني زعلك من الخلايق والعذاب يزود
إذا صار الزعل مني ومنك الفهم متردي

بقى بيني وبين الذل شعرة وإفهم المقصود
ترى ماهوب لي ثوب الخضوع ولا هو بقدي

ربوك أهلك على التدليل يا أول واخر العنقود
وربـّوني لعز النفس ابوي وخالي وجدي

انا ادري انك تحب ولا على حبك بقلبي زود
ولاكن لو تجي منك الخطيه مايجي صدي

وإذا تجهل مكانك شوف وش تحمل هبوب النود
احبك كثر ماتاخذ هبوب النود وتودي


مودتي لااحبتي