ياحمود راح الليل والزين ماداج
والجفن ماهو تالي الليل غافي
ياحمود هد قلوبنا هد الابراج
وشال القواعد والخشب والغلافي
من عقب ماهي تلمس الغيم لاهاج
جاها القدر مع طلعة الشمس لافي
كنه صواريخن على متن ميراج
وصاروا كما المشمش نهار القطافي
من مدرجه طارت بلا هجس واحراج
تنقل نذير الموت والنور طافي
والمصعد اللي بين الادوار دواج
من ضرب شوط النار جاه الهدافي
اول بوسط الغيم مسرى ومعراج
مثل الكريم اللي لضيفه سنافي
وتالي مشاويره نقل فرد وازواج
وطارت بدال اللي تهين الغدافي
كم واحدن يصرخ للاجواد محتاج
عقب الفجور اصبح يريد العفافي
وعقولهم راجت مثل روج الامواج
تبكي تبي فزعة رجال المطافي
من عقب ماهي تتعب النسر لاراج
جدرانها تسفى عليها السوافي
وانا وقعت برمش ريمن تقل عاج
مجدولها من فوق الامتان ضافي
رمشه لسع وسط الضماير بكرباج
وردفن خذى ثوبه على الزاف زافي
شفت القمر يمشي وهو غافلن ساج
وصاب الضماير بالثمان الرهافي
في مبسمه لولو به النور لعاج
كم واحدن من شافها طاح هافي
الجسم رويانن من الخلف منعاج
والصوت مع زين السواليف دافي
تلعب بعقل اللي نصى البيت حجاج
وهو رايحن يبي الحرم والطوافي
واصبحت من رمشه على غير منهاج
مهرة عقيدن توها بالعسافي
والله فلا يطمع بها كل هلباج
عده عروسن في ليال الزفافي
فازت على كل الغنادير بالتاج
وتلقاه يمشي يتلي الزين حافي
وش جاب رس البير مع نبع هداج
والا المريض بجنب ثورن وعافي
به من بنات الروم بالهرج مغناج
وبه من بنات الفرس للجرح رافي
وفي رمشها به من جميلات قرطاج
وباقي وصوفه تحت ثوبه خوافي
شوف الغلا لجروحنا طب وعلاج
وريقه من امراض المعاليق شافي
تسقي عروق اللي للاحباب محتاج
قلبن من الفرقى كواه الجفافي
صعبن يجيب وصوفها كل هراج
مهما تفنن بالمثل والقوافي
بس البلاء دونه مهاميه وافواج
مهالكن ذيبه يجيه الهرافي
جايع ولا حوله مظاعين ونعاج
وظلوع بطنه بالمجاعه نحافي
واذا قطعت الدرب في زين الادواج
وجيت الغلا صار اكحل العين جافي
وسمعت في باب الغلا طق مزلاج
وقلبي يبي منها الغلا والكفافي
اسمع هروج اللي مع البيض ماداج
وزولن نبيه من البعايد يشافي
وارجع وانا كبدي بها علقم الزاج
مدري متى يحلب لنا الزين صافي
واصبح خفوقي للهواجيس مدهاج
وان ضقت ادوهج فوق ذيك الشعافي
عن مجلسن كله شماتات وازعاج
ياعل هرجات القفى للذلافي
له مدخلن ماله مع الناس مخراج
واللي دخل به باع عمره جزافي
عسى ولي العرش ياتي بالافراج
والياحصل وصله مع الكيف كافي
لاهنت يالغالي
لقد اخذتنا الى العالم الاخر
وصعدت بنا الى السماء
ثم نزلت بنا الى ساحات ابياتك الخضراء كما هي الرياض التي تنعش رائحة الخزاما والشمطري بها
ايه الرائع يلوموني في ذكر انك شاعرالشعراء
واميرالشعر
يكفي البيتين الاخيرين لمن قرأ القصيدة
لاهنت وطال عمرك ودام عزك يالغالي
|