يابنت صيحي ليلة فراق غالين
عقب غروب الشمس موعد رحيلي
ياحظ منهم في ديارك مقيمين
وياحظ من قلبك لقلبه يميلــــــــي
وقلبي انا مغزوز غز النياشين
واصبح لرمي الطلق مثل الدليلي
من عقبكم والناس ماهم بدارين
انا صحيح العقـــل والا هبيلــــي
كل رحم حالي وحتى المجانيـــن
في منزل الاحزان اصبح مقيلي
ياما حلا كالرمش والمبسم الزين
او شامة فوق الشفايف تخيلي
ياليت انا وياه بالروح قسميـــن
واذا انتهت روحه لروحي يشيلــي
وياليت انا دمه وبوسط الشرايين
امشي بجسمه مايتوقف مسيلـــي
ماتنفعن ياليت لو قلــته اسنيـــن
ولا يشفي الدكتور قلب(ن) عليلي
ياكود اشوفه شوفة العين بالعين
والا رســالة من يديــنه تجيلــــي
او يرحمن مولاي مولى المساكين
والا ملاك الموت روحي يزيلــي