الكحـل ماينفـع العـيـن الضـريـره=والسمـوع الصـم ماتسـمـع نـداكـا

ولاتطـول المـي بحـبـالٍ قصـيـره=ولو وردت بحبـل غيـرك ماسقاكـا

ولو طلبت من الردي حبـة شعيـره=مـن ردي السـاس والله ماعطـاكـا

وتايـه الاريـا حـذورك تستشـيـره=وان تلـيـت الاغبـيـا زادو عـمـاكـا

ومـن تقـدى بالزلابـه حـام طـيـره=لاتـقـدى بـالـردي يقـطـع ظـمـاكـا

احتـزم باللـي بهـم للـديـن سـيـره=والضعـوف اصحـا عليهـم لاتراكـا

وخل لك سهمٍ مع الاسما الشهيـره=وارفع الجنحان في صافي سماكـا

ارق في روس الشناخيب العسيره=انهض الجنحان والفح في فضاكا

دام لـك كـف ومخاليـبٍ شطـيـره=مـن مضاربهـا تبـي تـدرك عشاكـا

سيـف عـزك لاتـرده فــي جفـيـره=تـكـره الصـدقـان وتـفـرّح عـداكـا

واستظل بظل فعلك عـن هجيـره=ولاتطيع اللي علـى الهـون يهداكـا

وخل في قلبك على الامجاد غيره=لودفعت اللـي معـك واللـي وراكـا

وخل نفسك من رضالله مستنيـره=واحمد الله يوم في ستـره حواكـا

هكذا شكـل الرجـال وذى مسيـره=اتـبـع خطـاهـم عــسالله يحمـاكـا