ولي العرش ماحطك على روس البشـر رادار=
وعن عيب العرب عالج شرور النفس وعيوبه
وهرجك لاسرى من دون لا قابض ولا شنكـار=
تبي تلقى الذي لاجـاه ذكـرك قـال والكوبـه
وترى اللي يطلق لسانه بميدان العرب منشـار=
مثل ماقال بالعالم عيـال العجـز قالـوا بـه
ومن يجعل هروج الناس بأعراض البشر معيار=
يشاهد صورة العالم على الشاشـات مقلوبـه
هروج الناس ماعادت تخاف الواحـد القهـار=
وتصير اكثر روايتهم كـلام ضـاع مندوبـه
يقوله ساقط شاهد كرم غيـره وقلبـه غـار=
مثل ماغار قلب اللي لها الكفيـن مخضوبـه
خسيس ولا يلاقي له بديـوان العبـاد انكـار=
ويظن اهل الندى تنهار للـي صـاد عرقوبـه
سكوت الناس عن ظلم الحواسد للكرام اقـرار=
يشارك بالذنوب وشرهـة العاقـل وعذروبـه
ولو كان الحكم يرفع على الوجه الرزيل انـذار=
ويلقى الطرد لا عـاد لـرداه وكـرر اسلوبـه
لقيت ادغام عفن الناس لايمكن يصير اظهـار=
ويشرب بالدلال اللي لغـوده غيـر مربوبـه
وتصبح نية الاضمار بهروج الخبيـث اخمـار=
يساوي في عيون الناس عنز غيـر محلوبـه
واذا يعنيك رجل حـال دونـه بالكـلام غبـار=
وتريد الصدق عن حاله قبل دعـواه وهروبـه
تشوف اللي عناك امره وعينك بالعرب منظار=
وكديش الخيل مايخفى بجانب كـل منجوبـه
وتطلق في سماء عينك وتفكيرك ثلاث اقمـار=
تراسل موجة افكارك وتسري فـي تلسكوبـه
جهاز الرصد في فكرك يراجي صورة المسبار=
وفكرك يلقط شفرة وتصبح وسـط حاسوبـه
وتقوى الشوت والتهديف بالمرمى بدون آيمار=
ومن شافه يقول اهداف عند الصدق ملعوبـه
ولا تصبح كما طير اليا شاهـد ظلالـه طـار=
خصوصاً لاظهر شيب الزمـان ودار دالوبـه
كلام الصدق ماياصل مع العالم ثلاث اعشـار=
ومنكوس الكلام اليوم تسع اضعاف مسحوبـه
واذا صد الرفاقه وانت ماتدري وش اللي صار=
فلا تبحث عن اسباب القطيعه ويش ماجوبـه
ولا تطلب من العايف يقدم في جفـاه اعـذار=
وعسى رب الملا يسعد مساه ويسمح دروبـه
طبوع الناس مخلوطه بصوت الذكر والقيثـار=
وكلن حسب مقياس البراغي شـال سكروبـه
مدام العود ماتظهر لحونه قبل خمـس اوتـار=
مع اني مانقلت العود في عمـري ولا نوبـه
وحكم الخلق واقداره بلـوح الواحـد الغفـار=
ورحمة خالق الدنيا بـدرب العبـد منصوبـه
ولا تحكم على المخلوق في جنه ولا في نـار=
ترى العقال في دار الشقـى ماتامـن عقوبـه
ولو رزق الملا بكفوف راع البنـز والفكسـار=
لقيت اكثر هل الطولات قبل الصرف مشطوبـه
لأن اهل الندى والصدق ماله بالعـرب مقـدار=
وتلقى عيشته عند الكـلاب السـود مكبوبـه
واذا حاولت دفع الظلم ماتلقـى وراك انصـار=
بجنب اللي الياشاهد هل الفزعه دفـق كوبـه
وشفت ارزاق خمسمايه توزع في ثلاث انفـار=
وحاجات اليتامى من كبار الكـرش منهوبـه
علف خيله ثلاث شهور يصرف كاش بالدولار=
ويكفي قيمة اعلاف الفقـارى قبـل مشذوبـه
يصير الغيث له طبلون بالنسبه وفيه اسعـار=
وقبل الدفع ماتقطر عليك المـزن لـو نوبـه
اذا مـا تـم تصديـره لقـوم تدفـع المليـار=
وناس قالت المخزون ضـاع وقـل منسوبـه
مدام ان الجهل يقصر لك الكيلو ثـلاث امتـار=
وداء الجهل مايمحاه مستـر جـون وحبوبـه
وزيجة شرع رب العرش تغنينا عن المسيـار=
وعن فتوى الذي يرجي هدايا الشيخ وجيوبـه
مدام الزوج والزوجه وشيخ القـوم حكمتيـار=
تعرف ان الطلاق السبت لو ماهـي بمكتوبـه
على المسيار والمقناص والزاير مـع الـزوار=
وكل اربع وخمس شهور بنت القوم مركوبـه
وانا رجواي في رازق كسير النـاب والمنقـار=
يزيل امراض من يربط حبال الحقـد وخبوبـه
من اللي ترسل الغارات فيها شعوذه واسحـار=
نسوا وقفة هل التوحيد يوم حصـار بعقوبـه
وانا جاني رفيق كان عندي من حمـام الـدار=
وشفت اهل الردى والهرج بالقالات عاثوا بـه
وينقل صوبنا بوك حصيلـة محتـواه اشعـار=
وتنسب لي من اللي يعرفون القاف وغيوبـه
كلام ساقـط مافيـه لنفـوس النـدى معبـار=
ونسخة عملته داخل بنوك الشعـر مضروبـه
وانا شاعر ولي بصمه ولي منهج ولي مقـدار=
يهيض بخافق ينظم بحور الشعـر مصبوبـه
على نهج الجدود اللي بوقت الشيخ ابن بقـار=
قبل يطلع قصيد اللـي يهيـم بـزول دبدوبـه
بوقت كان مايسمع قصيـد العفـن والثرثـار=
ولا صارت بحور الشعـر والقيفـان مثقوبـه
ولا داج القصيد بسوق راع القرش والدينـار=
وقبل اعراض داء الكذب واستفحال ميكروبـه
قصيدي مادخل في بيعة التاجر ولا السمسـار=
ولا هو سلعة تصبح وسط السـوق مجلوبـه
اذا هاضت تماثيلي تقول انـه هميـل امطـار=
تقول انه عقود الماس فوق نهـود رعبوبـه
يغوص الفكر بأمواج المحيط الهايـج الهـدار=
لما تظهر بشاشات الحشى والجاش مكتوبـه
واذا صبت الهدف قلته بديوان الكـرام جهـار=
ومن يعنيه هذا الامر تاصل نسختـه صوبـه
وليش اجحد نياشين رميتـه طايـع مختـار=
لو ان الشتم كلمـات لنـا ماهيـب مرغوبـه
ويوم انفي اخبر ذنوبنا اللـي بالحيـاة كثـار=
واظن النفس ماتحتاج فوق اخطـاه وذنوبـه
لو ان ذنوبنا صارت بميـزان العمـل قنطـار=
تزيله رحمة ماهي عـن العاصيـن محجوبـه
ترى اللي يفتح الرادو ويسمع نشرة الاخبـار=
بها اللي يجعل العاقل يشوف الشرق منكوبـه
معمر ثم صالح ثـم جيـش الطاغيـه بشـار=
يبيد الشعب والجولان عند الخصـم مصلوبـه
وشهيد السبع والستين في قبـره بليـا ثـار=
وقيادات العرب كله على العربـان محسوبـه
دعاية عصر ابوخالد زعيـم القـادة الاحـرار=
فخوخه في دروب العلم والخيـرات منصوبـه
وحرياتهـم صـارت لهايـب ذل واستعمـار=
على كاهل شعوب في حجيم الهـون مغلوبـه
غدت مع سربة العدوان باللعبه بـدون ستـار=
وخلت جيشها للجار واهـل الـدار وشعوبـه
صحيح اقبال دنيانا بنظـرات الفهيـم ادبـار=
ولو تكشف حقايقها تصيـح وتعلـن التوبـه
ولا ترسي مراكبنا الضعيفه لا وطاه اعصـار=
ولا كل البشر تضمـن مطاعـن راس كلوبـه
ولكن الاكيد ان الليالـي لـو تطـول قصـار=
وتبقى النفس لابواب الامل والعيش مجذوبـه
واشاور من ركب صهوة جواده داخل المضمار=
وسار الدرب بالتجريب والشده ماهـو دوبـه
يجيب الشور مايشبه قصيد الشاعر المحضـار=
مدام النار ماحطت وسـوم الوقـت بجنوبـه
وانا لولاي اخبر ان البشر ملفاه خمس اشبـار=
واخبر الروح ترحل من شقى دنياه مغصوبـه
واخبر امثالنا كانـت تقـول ان الزمـن دوار=
ونفس الناس ترحل ماخذت بالعمـر مطلوبـه
اعرف شلون اسدد دين ديانـي ثمـان امـرار=
سداد ماتوافيـه الملامـة لـو شلـق ثوبـه
ولكني رفعت النفس عن درب الـردى والعـار=
وثقل العقل والطيبه حـلا عمـرك ومكسوبـه
وباقي جثته لو داج بأسـواق الخلايـق بـار=
مـدام ان البواقـي بـالاوادم غيـر محبوبـه
وقاله بندر ابن سرور ذاك الشاعـر البيطـار=
ومع بندر فناجيـل اكثـر الشعـار مشروبـه