* رفحاء *
السلام عليكم ورحمة الله وبركاته
كنت ناويه اول ما ارجع لحايل اكتب تقرير عن رحلتي لرفحاء بس صادف عودتي ( مرض والدي شفاه الله )
والحمدلله حالته في تحسن ...

اول شي ابي ابداء من خروجي من حايل
( تعرفون استعدادات السفر حوسة والمشكلة كل واحد اغراضه اكثر من الثاني وكأننا مهاجرين مو مسافرين هههه انا تقريبا شنطيتن فيها اغراض مالها داعي حتى اعواد الاسنان اخذتها معي خخخخ
* نعود *
رحنا بسيارتين انا واختي ( العروس ) واخوي الصغير هو اللي يسوق ( بسياره )
السياره الثانيه ( امي وخواتي 2 واخوي الكبير )
جينا نغادر حايل بس المشكلة طلبيتنا ماخلصت من المطعم بناخذها ونمشي لكن سيارة اخوي الكبير سبقونا اللي فيها امي
وحنا ننتظر المطعم لين يخلص ومشينا :: تقابلنا عند محطه قبل طريق بقعاء سلم واستلم ههههه
اعطيناهم وجبتهم واعطونا من الغازيات والمشروبات البارده
وحنا ننطلق :: ( اموت على السفر بوقت الليل )
· اخوي الكبير قدامنا وحنا خلفهم نراقب روس خواتي من سيارتهم مره تتمايل يمين ومره يسار هههههههه
اتصلنا عليهن قلنا وش فيكن لايكون خدرتن وجتكن النومه
يقولن لا حنا نرقص هع هع

سيارتين وسائقين 2 كل واحد له مزاج بنوعية الاغاني اللي عنده
حنا مشغلين كوكتيل اغاني والله حتى الايراني سمعناه هههه واغنية لشاكيرا تخليك مو متحمس الا طاااااير
اما طقوس اهلي با السياره الثانية مشغلين ابو ملوح وسوالفه وخصوصا سوالف الكدش

... * مرينا بقعاء حوالي الساعه 11 يعمها الهدوووء مافيها احد ..
وبعدها بحوالي كيلو 90 او اقل مرينا تربة نفس الشي هااادية بس بصراحه تصميم الدوارات حقت الشوارع اللي عندهم روعه
وبعدها لينه ( مبروووك مسوين حديقة جديده ههههه
يعني فيه تطور با المستقبل هع هع )
.. وصلنا رفحاء تقريبا الساعه 2 الفجر اول مادخلنا قابلنا دوار وبعده وقفنا عند فندق رفحاء ..
يوم وقفنا وهو يمر واحد شكلة كويتي يسئلنا عن طريق عرعر ( قلنا حنا مثلك ما ندل وهو يمشي ويروح لسيارة اخوي الكبير ههههههه ويسئله نفس السؤال )
:: المهم وحنا نروح لشقتنا بصراحه كبيره وتفتح النفس وسعرها مره مناسب )
طبعا ماقدرت انام طبع فيني أي شي جديد ما انام
اغفي شوي ثم اقوم واكملها سوالف مع اهلي
اول يوم فيها بدينا نتمشى ونشوف الاسواق مدري ليه السوق حسيت فيه شبه من سوق برزان لكن الفرق ان الاسواق كلها مرتفعه عن الشارع الاساسي
القينا فيها نظره وما امدانا نتسوق لاننا خالصين من حايل مو باقي علينا الا تحضيرات الزواج
* وحنا نتمشى فيها لفت انتباهي
شخطبة على الجدران ذكرني بعبسي 18 اللي عندنا بحايل ( ابو سعود )
وكل جدار نمر فيه مكتوب ابو سعود واخر جدار شفته موتني ضحك مكتوب ( ابو سعود يختفي ويعود )
شكله مشاكس هع هع
اعجبتني الحديقة اللي على الطريق العام ودي اروح لها بس ماتشجعت ادور زول بنت هناك مالقيت .. كنت ناويه اروح بس امي خرشتني تقول عيب :

*كل وقتنا برفحاء ماحسينا بغربه سكانها مؤدبين مره
*حتى لما دخلت بقاله من بقالتهم كان فيه واحد شاب طلع لين اخلص مقاضيي ولما طلعت دخل بجد احترمته ..
* ومن ملاحظتي عليهم ما حد يناظر في احد الكل ماشي بدربه الا حنا هههههههه نناظر في العالم
* لفت انتباهي بعد الارنب الجائع كان قريب من شقتنا .. خليناه مركز دليل لنا لاي واحد يضيع ابد عند الانب الجائع .. هع
** مشكلتي ماصورت حامي حامي ما امداني من الشقة الى القصر ومن القصر الى الشقة وبعدها مشينا لحايل ..
قبل لانروح كانت وداعيه لاختي العروس سلمت علينا بعد زواجها ونزلت تحت زوجها با السياره ينتظرها امي بكت المهم ولد اختي الصغير عمره اربع سنوات نزل معها ولما صعد نسمع صياحه المشكله كنا نهدي امي وجاء هو زاد الطين بله هههههه
قام يصيح متصور ان اختي خطفها واحد وهو زوجها بس ماقدرنا نفهمه
يقول ( فلانه ) ماتت وقام ويسكر على نفسه الباب بقوه
ويتغطى ويصيح اول مره يسوي كذا ماكنا نظن انه يفهم .. واللي ضحكني ان امي اللي نهديها قامت وراحت له تهديه هههههههههه
· اخر موقف مضحك مبكي بصراحه *
· وصلنا حايل تقريبا الساعه خمسه ههههههه
يوم دخلناها لقينا كل خلق الله صاحيه وللمطاعم
ماينامون هههههه
· تقريري وعدت فيه كبرياء شمر *
· اتمنى ان ينال اعجاب الجميع
· وهذا قليل جدا عن رفحاء لانها مدينه مريحه نفسيا واكثر من رائعه ..
· مودتي *