يسافر سندباد الشعر معها خلف اسطوره

[poem=font="simplified arabic,4,black,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]

على منظور شاعر رتب حروفه بمنظوره=ومع هاجس تعدى ماتعود من سبايبها
ماهو يقرا قصايد غيره وينقل من الصوره=يجيبه من هبوب داخله هبت هبايبها
مع الايام به شعار بين الناس مذكوره=ومع الايام به شعار تجهلها قرايبها
ماهوب الشاعر ابدا ينـّسى يالاعب الكوره=بيوته تستمر مع الزمن تنقل عجايبها
اذا له ملهمه والملهمه فالشعر دكتوره=فلا له غير تاتي بالقصايد من مضاربها
وانا لي ملهمه بين الضلوع تعيش اموره=اميره بس حلوه يصغر الاسم ويناسبها
ايلا هزت شجر شعري تهزه هز مقهوره=واذا لمت ثمر شعري تلمه في ترايبها
هي الهاجس والسجه وهي شعري ودستوره=وهي بيت الشعر والمفرده واحساس كاتبها
يرفرف طيرها في كف شاعر يعشق طيوره=وله مرباع يشتاقه ولو تبعد تقاربها
يهجّد من هنا ثوره وتحرّك من هنا ثوره=مطالب شعب افكاره وجت تعلن مطالبها
صباح الشعر ياشعة صباح الشعر يانوره=مساء الذوق ياهبة نسيمه من ذوايبها
هنا وسط الفراغ الداخلي اشياء منثوره=مبعثرها زمان ماعرف وشهي مواجبها
مثل ما هالفضاء ما ضاق ابد بجناح عصفوره=فضاءاتي ابد ما ضاقت برفة تجاربها
ماهيب التجربه عندي سجينة وقت مأسوره=ولكن حاجة مع رحلة الايام اصاحبها
الا يالملهمه بعطيك واجب واقري سطوره=ماهو واجب دراسي بين شعّار وحبايبها
ولكن شاعرك عنده ترا فالبال سبوره=اذا ماجبتي الواجب يبي يوقِفك جانبها
لماذا قيمة الاشياء ورا اشياء مطموره=لماذا الناس ما عاد القمر فالليل عاجبها
لماذا السالفه تالي هـُلاميه ومبتوره=لماذا كثرت بروض الشعر تالي عقاربها
لماذا احلام طفله تنتهي تبكي ومكسوره=ماهو كافي وهي تلعب بكت اجمل لعايبها
لماذا دورة الارض اصبحت ماكنها دوره=لماذا ايامها تخفي سكاكين بحقايبها
لماذا الدم في عرق الوفا ماعاد له فوره=لماذا ثم لماذا ثم لماذا يا معذبها
الا يالملهمه يا سرّ شاعر يعشق بحوره=يعشق امواجه ويطرب على نغمة تضاربها
حلاة البحر كونه مابنى في شاطئه سوره=وحلاة امواجه تسافر على نسمه وتركبها
يسافر سندباد الشعر معها خلف اسطوره=سمع عنها ورا سبع البحور ولا تهايبها
يقولوا رغم ما فيها ترا ماهيب مغروره=تدوّر من يدورها وهاذي هي ضرايبها
نسى من بعدها صيحات عشاقه وجمهوره=لاوالله هقوته شالت من القصه صعايبها
وصلها بعد ما عد الحساب بخمسة شهوره=وهو يستسقي اماله وتمطر له سحايبها
الى من الضما حده يسولفها على جوره=جمع قطر الندى من سالفتها ثم يشربها
وصلها والوصول اول مهماته وميسوره=بقى لحظة لقاهم وش حصل ماني مزهبها
ولكن الوكاد يقال كانت حيل مسروره=والاكيد قالوا انه من وصل لهناك طار(أ) بها
[/poem]