بالعرب حاسد..وبين العرب محسود=وفيه ابو نيه..وفيه ..ابو وجهيني
وناس تخشى القصور..وكلمة المنقود=وناس ما يعرفون السلم والديني
وفيه بالناس..ناسٍ ما وراهم فود=عنهم..وغيرهم.. يالله تغنيني
ياكريمٍ جواد ان قلّوا اهل الجود=رازق الاغنياء هم والمساكيني
يالله افرج لي انت الواحد المعبود=تعلم السر..وبهمٍ مخاويني
واكثر الناس حاله بين نقص وزود=لكن!! اااالله ولاحال المحبيني
والهوى مشكله..ياهل القلوب السود=جعل يبلاكم اللي فيه باليني
قالوا اصبر..ترى تال الصبر محمود=ووالله اني صبرت شهور وسنيني
مثل صبر الاسير اللي بيده قيود=ظلم مسجون..من ضمن المساجيني
حول عشرين عام وفوقهن موجود=في سجون اليهود..وهو فلسطيني
حالتي مثل حاله..والصبر محدود=ضاقت الارض..يابو زيد في عيني
يادغيم وانا اللي بالزمن مضهود=جاير الوقت متعبني ومشقيني
وش نهاية هوانا..مع نعيم العود=باهي الوصف هو سيد المزاييني
بيني وبينه اسرار..وعهد..ووعود=وغيره من العرب ماعاد يعنيني
اعشقه.. وذكره لاهب ريح النود=خالط الدم حبه في شراييني
سبعة اعوام راحت..والعمر معدود=مالقيت الطريق اللي يوديني
ان مشيت الطريق.. الياخره مسدود=وان تراجعت ..مالت بي موازيني
وجيت يمك حزين وخاطري ملهود=كني الطير مكسور الجناحيني
وانت من نعتزي به في نهار الكود=مسندي لاحداني وقتي الشيني
من رجالٍٍ تبين ان حك عود بعود=تعرف افعالهم وسط المياديني
خوذ في خاطري..وبذل معي مجهود=وسط سجن التعاسه لاتخليني
ما نقول احتزم بالسيف والبارود=كلمةٍ منك بالمعروف تكفيني
وكان حبل الشقا يا مسندي معقود=منكم الرأي يقنعني..ويرضيني
نص رائع كعادتك في النظم المميز
وعسى الله يعين دغيم على قلبك الخضر هههههههههه
تهانينا على وجود مثلك بين زوايا بعدحي
فا أنت تكتب الابداع في لغة سهله ولكنها ممتعه
على أية حال
صح لسانك مدد بلاعدد
العضو الأكثر نشاطاً هذا اليوم 
العرض المتطور
