مساجلة ..شاعرها .. وبرق

أرسل على أخي الغالي والشاعر العلم واستاذي
الفاضل : عبدالله الراجحي
(شاعرها)قصيده ولي الفخر وربي شاهد
حيث أعجبته أحد قصائدي
وقام بالتعليق عليها تعليقا وافيا
كوفاه طال عمره
فشكرته وكان الرد منه هذه الفاتنه وردي المتواضع عليها
أتمنى لكم المتعه مع القصائد




يامرحبا باللي على واردي مرّ
ترحيبةً تتلى بصدق وحراره

من خاطرٍ طربان لاجلك ومنسرّ
كن بقدومك سايقٍ لي بشاره

براق ياحرٍ مسمى نسل حرّ
من روس قوم ٍكاسبين الاماره

شاعر وله فالنادره كرٍ وفرّ
يقطف من البستان طيّب ثماره

الظاهر ان فكره من الوضع محترّ
والقرم مايرضى بذلّ وحقاره

لامرت الهرجه وفي حرفها جرّ
الجــرّ حرفه جـــرّ كل العبــاره

ودك تبينها ولا عاد تسترّ
ومن جابها تقلب عليه الشطاره

بعض العرب روابعه كلها شرّ
حتى مع الادنيــن مابه نعــاره

يكد حاله فالدنايا ولاقـــرّ
ولاهو محصل كود نقص وخساره

ياصاحبي مانته من النذل منّضرّ
اشهرّ / وكلا ماشياً في مساره



وهذا ردي المتواضع


تبقا وحرفي في مجاراك كاالدر
في جيد غيداً دلعتها الحضاره

أهلا هلا مليون والله منوّر
ومن خوتك كني وزير الوزاره

معزتك في وسط روحي تكّور
وأغلي انا شرواك راع السطاره

ياصاحبي دنياي مع حلوها مر
ويبخص بضاعتنا وزير التجاره

اليا أقتنصنا نقتنص شجرة الدر
ولانهيم بحب خدرات ساره

والله ياشاعرها وهي دامها بر
وافين وان ثارت نفوز بجداره

يابن الشيوخ اللي لها الطيب يزهر
والطيب منهم زاد منهم وقاره

تدري ياعبدالله قبل عام وأكثر
مثل ( الحويفي ) مولعن بالصقاره

واليوم والله يانديمي ترى البر
أبرك ولا سكناك أفخم عماره

ولاآني أنا مصعب ولا آني .. أبوذر
لاكن على الطولات عندي جساره




ملاحظه
الحويفي : بدر بن عواد الحويفي
أحد اشهر شعار وصقاقير الجزيره العربيه
ورجل كفو


ودي للجميع