لحظة وداااع

اجمل التحايا لاعضاء هذا المنتدى الغالي
جديدي اتشرف بأن يكون بين ايديكم

يالوعة الشاعر وحظ المغنـّي
انزف حزن والناي جر المحاصيل

وبصوت ماهو صوت انسي وجني
صوت الفراق اللي يهز الحلاحيل

لحظة وداع اغلى تسع عاشرني
تجمعن وسط الذي تشبه النيل

الحسن والهيبه وحب التأني
والصدق والطيبه وقل الأقاويل

تلميح تفهمني قبل لا اكنـّي
ذربه واعدّه من زحول الرجاجيل

ماعاد تنفع لوعتي والتمني
والشعر واحلام الهنا والأكاليل

كنا ولحظة كان .. ماكنت .. (كني
صدام من بعد الطموحات اغتيل)

ياشينها ايامي ولو طاولني
وياضيقها لاحاصرتني التفاصيل

زمان عن خلي وعن ضحك سنّي
وعن نظرة الحور الوساع المظاليل

سلام لك ياصلك مخصوص مني
أحر من جمرك إذا ادمس الليل

سلام وطيوف الوله سامرني
استرجع الذكرى واشعل قناديل

واذا انطفت ذكراك حزني سجني
مابين قضبان السهر والمواويل

رهبة مكان وليل موحش حضني
من بعد ايام الهنا والمراسيل

وهموم من وين اتجه حاصرني
لاجيت ادرّج خطوتي كنها ميل

الحال ماهو حال وان حايلني
اضحك واندم واندب الحال واخيل

لك منزلن واحد ومقدر اثـنـّي
تطمني كبلتي الروح تكبيل

ورسالتي لك بختصرها لأني
ودي يخلدها الزمن جيل من جيل

ليلي وناري ودلتي ماخذني
منك مع إني منشغل بالمعاميل

صوتك معاي وصورتك تمتحني
لاشفتها لـقـمت ببريقي الهيل

أسج يمك عن ضيوفي وعني
ويردني مجبور صفق الفناجيل