سافرت انا وطلال الرشيد الى ناخذ عمره في رمضان وكيف احرجني غفر الله له

مراحب اخواني اخواتي عساكم بخير يارب ابي اذكر لكم هذا الموقف اللي ماانساه بحياتي وهو كعادتنا نسافر يوم 19 رمضان ولكن في هذي السفره طلبت منه ان يذهب ومن ثم يمكن الحقه انا لاني قلتله بروح لحفر الباطن بسلم على الربع واحضر فطور احد قرابتي وبعدها يمكن اجيك يابو نواف المهم سافر هو وعائلته والمقربين له رحمه الله وانا غيرت رايي بيني وبين نفسي قلت مابي اروح وارسلت مسج لطلال قلت طال عمرك انا ماني جاي قال على كيفك وسلم على الربع قلت الله يسلمك وبعدها تقابلت مع اصدقاء لي وطلبوني ان نتخاوى ناخذ عمره قلت لهم والله تعبان ولكن لحو علي قلت بشرط اذا رحنا لاتقولون نبي نقابل طلال او شي لاني بصراحه ماابي اشوفه هناك خاصة اني رفضت ان اخاويه قالو ابشر وطلعنا بسياره ثم اخذنا عمره وافطرنا بالحرم وانا عيني يمين ويسار لاني اعرف الاماكن اللي يتواجد فيها طلال ويجلس فيها منحرج منه وبعد ماافطرنا رحنا الى الفندق نمنا اللى الساعه 2 الفجر ولبسنا وجينا الحرم وصلينا بعض القيام وجلسنا ننتظر صلاة الفجر وجلسنا بمكان بالدور الارضي امام الكعبه وعلى يساري الممر وفجأة بدون ترتيب لها نظرت على يساري ولان شاهد الله علي كأنه ملاك واقف وينظر ببتسامه لي وماسك سبحتها الطويله وبدون لا اشعر قمت اركض والناس يطالعون فينا وحضنته وحبيته والحرس مستغربين كانو يبون يمنعوننا الين قربو منا وعرفو طلال واعتذرو والله وهو يضحك ياهلا رافع هذا اللي مايبي يجي يعتمر قلت يابو نواف والله جت الامور مدري كيف المهم قال منو معاك قلت 2 من ربعي طبعا واحد منهم فوق مايدري بلي حصل والثاني شافني من ركضت على طلال وجاء مسرعا يسلم لا تسعه الفرحه لشوفة طلال المهم قال عساك مطول هنا قلت والله بكرة راجعين يابو نواف قال اجل تعال معي نطوف نمسك ايدين بعض قلت يالله وبعد ماخلصنا طلع ظروف قال هذا لك انت والثاني لخويك والظرف الثالث مصرف لكم ابيك انت اللي تسرف عليهم قلت لا يابونواف مايحتاج الامور طيبه خلها معاك انت دايم تقابل ناس يسلمون عليك قال امسك يارافع لاتردني طبعا انا في وقتها كنت سكرتيره الخاص وبعد ماتوادعنا نزل صاحبنا من فوق وعرف باللي حصل وانجن جنونه قال ماابي شي بس ابي اسلم على طلال تكفون قلت لا تكفا اخاف يفهمني غلط المهم وحنا طالعين من الحرم ربي شاهد اني طلعت من باب ماتوقعت ان طلال يكون جالس فيه مع ولده نواف مع شروق الفجر المشكله اننا نمشي بالزحمه ونتكلم عنه وفجأة لان طلال جالس قريب مننا حيل قال هلا وغلا طبعا انا انحرجت قلت بس لايكون يفهمني اني جبت الرجال عليه عشان يعطيه خوينا سلم على طلال بشوق وبعد ماطلعنا لحقني نواف وهو صغير السن قال ابوي يبيك رجعت قال هذا الظرف لخويك لاني قبل شوي نسيته والله
تعرفون يااخواني ان بسفرتنا هذي قلت لخوياي ترى انا مفلس هاليومين قالو حنا بس نبي خوتك يارافع وسبحان الله صرت انا اللي اصرف عليهم واعطيتهم مبلغ كل واحد ومبلغ لي من غير اللي اصرفه على اكلنا وسكننا ؟ جملتني يابو نواف واحرجتني والله جعلها الله بموازين حسناتك ؟ سامحوني انا اكتب مواقفنا على اسلوبي بدون تصنع