(وش هالحظ جعله لا يتبارك)
مرحبا .. اذا اشتقتوا لي عادي قولوا عشان اجي .. واذا ما اشتقتوا لي لا تقولون لاني جايه جايه ماعلي منكم (( وش فيها خربتها بالاخير )) ..
شبااااااااااااااااااااااااااااااااب بطاااااااااااااااااااااااااااااااااااااااات ابقول لكم قصه فلللته يالله ابقولكم هالقصه اللي فعلا عشتها(الله والخراط)……………يالله الشخصيات اللي بهالقصه :
البطله:انا سبيكه واللي اسمي بالصدز موب قايله<<<بشري امتس
البطل:فيصل ولد الجيران
بالإشتراك مع : خالد
ونواف
العنود اخت البطل ولد الجيران
ضيوف القصه:فيصل ابوي
امي نعيمه<==الله والعائله
يالله بدت:
في يوم من الأيام كنا قاعدين ودق علينا الباب واحد فظيع طويل وعريض المنكبين اسمر البشره ووسيم بعد يعني من مجاميعوه
بسط الأخ عندنا وبرك على الكنبه ورزح رزحه بغا الكنب يتكسر
قام يسولف الأخ يعني مره انوااااع الميانه وحنا مبلمين ماندري حتى منهو قعدنا شوي وتدخل علينا امي وتقعد تهلي وترحب وحنا شكلنا يسدح
من الضحك انواااع الفهاوه المهم:
طلع الله ياخذ عدوه نواف ولد خالتي توه راجع من امريكا بس الصراحه زاين الهيس جاي فظيع وطلع نواف اخوي من الرضاعه <==وانا اقول وراه يمون
المهم بعد ماعرفنا ان نواف اخوي انا وخالد صار يجينا كل يوم مبسط عندنا شوي اللا يجيب قشه ويسكن عندنا بس الحمدلله ماسواها كن ماله خوان الا حنا وناااااااااااسه وسوالف وحش من جد فالينها معه بزياده وهو صار يمون بقوووووووووه في يوم مابقا عندنا سوالف نحتسي فيها ابد مابقى مخلوق ما حشينا فيه(اممما حش وعيال كثري منها)
قلت لهم:
وش رايكم نطلع نروح نتمشى نروح لأي مكان نروح للسوق ولا نروح نتمشى في أي عاير ولا نروح نتعشى على الرصيف زي ذاك اليوم ونطالع الناس وهم يتطنزون علينا ونتهاوش معاهم>>>من جد مشكلجيين
ولا نروح نكشت للبر ونخيم فيذاك
خالد:ياااااااي لاتقولين البر انا مااحب هالحركات >>يا لعنو بو هالخكاره
نواف:اقول الفقه وانطم لأجي اتوطا في بطنك يالخايس انا واختي نبي نطلع انت وش دخلك يالقعس((اخخخخر عليه هذا وهو ساكن بمريكا عشر سنين وعربجي واخوي اللي ماقد طلع من الرياض وان خربها خربها وكفر راح للشرقيه وماهنا اخكر منه))
سبيكه:اصلا وش تبي انت مااحد خذا رايك يالهيس احد قاللك تجي ياخي ياشين قطة الوجه يا شيخ >>مسكين مابقى سبه إلا لطينها فيه
وافق خالد انا نروح ورحت وجهزت شغل الكشته الترامس والما والقهوه والقدور والفرش>>السنع السنع الله يكفينا شرره
ناوين ننام فيذاك من جد راعين طويله وبعدين مالاحظتوا إنا ميرماشاورنا اهلي……مادرينا اللا وحنا عند الباب الا ابوي فصووول<==ابوووووتس يالميانه
قاعدن بالحوش وهو حايمتن تسبده وامي قاعده تحني عنده<<<بعذره ياعمري
شافنا شايلين القش ومدرعمين ……………
ابوي:وين على الله يارايح وين<<<احححلا يالقدوه الحسنه منطرب لا ويقولون لي يمي تسنعي وين اتسنع معه وابوي هذا لونه
طبعا اخر تزليب ماكنه يكلمنا وطلعنا مع الباب<<قولي قسم الصراحه جايبه شي جديد
المهم رحنا فيذاك من جد وناسه وبشكه وسوالف نصبنا الخيام وطلعت معانا السوالف كذا مدري وش لون صدق ليقالو البر ونيس<<<امممممممش يا حكم
وشعري مدهن تقل بدوييه >>>تخيلو الشكل
لا ومن زين هالخوان مخليني اتمشى واسوق الحالي بالبر ولانيب متغطيه ولا قالو بنخاف على اخيتنا ولا شي >=====هذولا الخوان اللي ينشد فيهم الظهر
لا وظلما ومبعدتن عن الخيمه وعن اهلي يعني من جد الا ياطالعه الحالي ((اقول بس ياليل مااطولك)) ومادريت الا وذيك السياره اللي مقبلتن علي وفيها واحد شكله شباب طلع مين ولد الجيران فيصل سمي ابوي>>ابو الشلخ يا شيخ
الله يذا الوناسه ويذا الفشيله عاد هو يعرف سيارة نواف وشكله جاين يسلم عليه
يوم انه قرب اندعست تحت الكرسي
وقعدت اصيح من الزنقه من جد مدري وش اسوي عاد هو طل وشاف طرف الجلال وحس ان فيه احد قام وجاب اخته العنود وحده عربجيه من جد اشين مني وحده خببببله ومنسمه
جت وطقت الباب طقت الباب وانا مير منيب حولها نايمتن تحت هالكرسي عقب الصياح انتفخ راسي ونمت يوم اني مافتحتلها الباب قامت تسطح نعالها فوق السياره
((شغلها اللي قبل مانقعد مروقين فوق السطح ولا بالحوش الا وتجينا نعالها كم من فلقه فيني انا وخالد من نعالها من جد داهيه هالبنت))
المهم:
يوم اني سمعت الطق وافز من النوم قلت اكيد الحرب جت قلت يا سبيكه يالخبله جت الحرب يا سبيكوه وانتي منتيب عند اهلتس امريكا ضربتنا ياسبيكه وانتي لحالتس في البر
ماامداني والتفت الا ولا ذا المخلوق اللي ملصق وجهه يالدريشه قلت هو يا سبيكه لايكون انفتحت بوابه الظلام وطلعو ابطال الديجتال كل شي جايز>>>وحده متأثره بسبيس تون مررره
ريوست العنود وبانت معالم وجهها وفتحت لها الباب وتجيني هذيك الهبده اللي معاد صرت احتسي عقبها
العنود:عما سبيكه وش جايبتس فيذا الحالتس يالخبله وين اهلتس افااااااا ياسبيكه والله مهيب الهقوه منحاشه من بيت اهلتس
سبيكه:عما وش منحاشه جعلتس انشالله تنحاشين من بيت رجلتس وتجيتس ذيك السياره اللي مشوته وتضربتس ولاتس متناثرتن على الرصيف >>شف الإجرام
العنود:اجل وين اخوانتس
وقلتلها السالفه وقلتلها اني مغرزه
العنود:مغرزه على جيب وش ذا الخبال حطي الدبل وتظهرين ولا اقوللتس ابناديلتس فيصل يطلعتس من هنا
يوم قالت فيصل ولا قلبي يرقع يرقع يرقع
قلت عما ياسبيكه مالقيتي اللا هالشيفه تحبينه قللوا العيال بس وش اسوي القلب وما يهوى >>>من جد مسويه حركتاات وقلب وقرقعه وزحم
المهم جا فيصل وطلعني من التغريزه وقعد قدام هو واخته وانا انطقيت ورا وقعدنا ساكتين محد حتسا
العنود :سبيكه وش جاتس وراتس هاجده ماحتسيتين وش جاتس خابرتتس قبل تهذرين ماتسكتين تذكرين ذاك اليوم يوم انتس تهذرين بالسياره وابوتس زهق منتس ونطلتس بالشارع ورجعتي البيت مشي
وقبصتها على ظهرها وصرخت
سبيكه :عموين بلا فظايح يالخايسه
وتسدح فيصل من الضحك على شكلنا دوووم الضحك يا ربي
فيصل:اقول سبيكه وين اخوانتس نواف وخالد
انا مدري كذا مدري وشلون نزلت علي النعومه وجاوبت بصوت واطي
:هاه مدري يمكن الا عند الخيمه ايه مهوب بعيد(ن) عن فيذا
المهم وصلنا للخيام وقعد اخمخم خواني واصيح>>على بالي رومنسيه
يوم رجعنا البيت من بكره وانا قاعده عند الكمبيوتر الا وتجيني امي مستانسه
:يمه وش فيتس وراتس مبسوطه
:ابد والله مادريتي عن ولد الجيران ماغيره فيصل بكره ملكته على بنت خالته نوره اللي ذاك اليوم شفناها عندهم في العزيمه يوم الخميس اللي فات(وش هالحظ جعله لا يتبارك)
واقعد ادعي عليه هو وبنت خالته وعلى عنيد بلاها ماقالتلي
تتتتااااااااااااااا تتتتاااااااااااااااااا <<<<تراها دقه يعني على بالي النهايه
يالله انشوفكم انشالله بقصه جديده>>ماقلتلكم فاهيه وشو اللي نشوفكم
ملاحظه:ترى انا اللي للطشتها يعني هذي احد ابداعاتي في الصرقه(اموووت على الإبداعات اللي تسذا)
يالله باااااااااااي :سبيكه تقدم لكم اطيب التهاني والتبريكات بمناسبة قرب رموضي<<<يازينتس ساكته
وبعدين اللي مااعجبته القصه وفي اثمه حتسيتن تناقز وده يقولها يقول بلاي عااادي متعودتن على النقد
|