غـــربـي جـبل كــاف

السلام عليكم
وأرجو ان تعذروني على غيابي عن مشاركتكم ،،،،،،




وصلتني رساله من صديق عزيز وغالي
يقول فيها :

أمس الضحى نطيت في راس مابان

ودموع عيني فوق خدي همايل

لاواهني من فارق جبال نجران

والعصر متعدي انا ديار حايل

مشتاق انا لشوف جدلا وحوصان

ومسعود والهلبا وذيك المسايل
إلخ...........




ورديت عليه بهذه البسيطه



البارحه جتني مراسيل شفقان

شفقان شوف تلاعها والمسايل

يبي ديارن به فياضن وغدران

وياما حلا نبت النفل بالخمايل

في ديرةن من فارقه صاح ندمان

وأيضا بغيره ماندور بدايل

دارن لنا من دور شايع وغضبان

وياما تغنى بحبها كل قايل

من انبط تشوف هذاك خشم الرعن بان

وأرض العليمه حد سنار جايل

وغربيك لبتها ليا رجم عدوان

وجنوب ياما تاصل جبال حايل

مع النفود اللي لها حيل ولهان

تصلى ضميري من فراقه ملايل

وقتن مضى كنا بها مثل الاخوان

واليوم فرقنا زمان الهوايل

أنته تراسلني ورى حد نجران

وأنا لك افرح يوم أرد المثايل

أرسل وانا اجاوبك في كل الالحان

لو كان حظي مع قسى الوقت مايل

غربي جبل كاف اقضي الليل سهران

على حدود الأردني والجشايل

ماعاد لي برض القريات رفقان

وفي سجنها شفنا نجوم القوايل

لا يابن جارد حالتي دوم نقصان

يابن الشيوخ أهل الوفا والفعايل

الوضع مزري وأكثر الناس كذبان

وكلن أشوفه بين صايل وجايل

متى على الله ينتهي كل ماكان

ونلقى بعضنا بين عذفا وحايل

وأضبط لك الفنجان بدلال رسلان

يبري عماس الراس والشك زايل

ونسج مع وسط البدو وأنت طربان

ونشعل بروس غروس شوس الفتايل




‏*بــ قلمــيــ
حميد حمد الشمري،