الله الله بالنقد جديدة لعيونكم :
لا لا تقول اكتب عن الحب والشوق=ماعاد لي في عالم الحب حاجه
من يوم شفت العز ياصاح مشنوق=وأكبر شنب فينا يزيد احتجاجه
لا لا تقول اسكت ترى الدم محروق=شاعر وترديد القصايد علاجه
ياصاحبي مافيه بالكون مخلوق=إلا إليا ضاقت يدور خراجه
ياصاحبي عدونا يسوقنا سوق=وحنا ندور مايهدي مزاجه
ياصاحبي كم ضاعت حقوق وحقوق=ومازال فينا من يطيع الخواجه
وتصدق ان ماعاد ياصاحبي ذوق=نبرر الذله بحمق وسماجه
متى على الله تنتهي شلة البوق=والمسجد الأقصى يولع سراجه
لوحاول الأعلام يرقى بهم فوق= تبين أكتوف الرخم بالمواجه
وتبيني أنسى الوضع وأغني بشوق=ماعاد لي في عالم الشوق حاجه
بقلمي : فلاح العايد