الشمري ينصح( الشبرمي وابن الذيب)

بسم الله الرحمن الرحيم

السلام عليكم ورحمة الله وبركاته

أقدم لكم هذه القصيده اللتي ترفع الرأس

وهي للشاعر :: راضي بن صافي النماصي الشمري

ومن خلالها يريد تلطيف الأجواء بين هرمين وعملاقين
ألا وهما (خليل الشبرمي .. ومحمد ابن الذيب)

هذا وهي لكم مقطع يوتيوب ..

وقصيده كتابيه ...

بإسم الله أبدا والوزن غير الأوزان=والسيف في غمده بلا عنجهيه
سلام مني عد همال الأمزان=وإعداد ما حجو بعيد الضحيه
وإعداد ما بالكون حضر وبدوان=وإعداد ما شفنا لصبح وعشيه
للشبرمي معطر بمسك وريحان=كنق الشعر يا بينت شاعريه
فارس تميمي فارق بين فرسان=يسرج خيول الشعر لنه بليه
تسجد له حروف الأدب سر واعلان=وتهدي خليل أيضا ورود نديه
لأن التميمي معجزة شعرنا الآن=فحل شعر نادر ولافيه زيه
تشهد على قولي جماهير بأوطان=كل يقول الشبرمي حي حيه
من الشمال إليا جنوبن بنجران=والشرق معه الغرب دق التحيه
وست العواصم ناطقه يا بليهان=إنك كسبت أصداء بين البريه
داحمت ناس بالإمارات ثم بان=بيرق شعر صارت قطر له هويه
خذيته بيمناك ياذرب الأيمان=وكل فرح لك يا زبون الونيه
وخليت خلفك لبق سيد لهامان=وقهرت من بانت علومه رديه
رفعت راس الشعر يا طير حوران=وبك الشعر يفخر مدامك خويه
شيلاتك ترجع لي القلب طربان=ومعنى قصيدك مثل شمس ضحويه
يا أبو أديب إنت الأدب وإنت الأوزان=وبك الصفات اللي تسمى نقيه
مار العرب به فتنة تالي أزمان=زادو مكاوي جروحهم زود كيه
أشوف صالح فازع دون سلطان=وسلطان باقي به جهل جاهليه
تداحموا وأشوفهم فوق كدشان =غزو على البيدا بنفس شقيه
ما دريو إن أقوالهم قول وغدان=وأفعالهم تشبه لذيك البنيه
وين العقول الراجحه يا كحيلان=أبي أشاورهم وعندي قضيه
قضيتي عنونتها دون عنوان=وشرحتها ميه وتسعين ميه
من يوم ما شفت العرب زادو أحزان=واللي معه شعرن نوابه أذيه
من مقطع لفديو غدا الشعر هتان=يمطر ولا ينبت على القاع شيه
وأشوف واحدهم ركبها بلا عنان=يبي يزيد النار والنار حيه
ما يدري إنه شيل من فوق الأمتان=مكسور شعر مكتفينن يديه
قصيدته تلهد ولو قيل يا حصان=يعزز الفتنه معه بندقيه
ما شفت شعره بالعرب يوم تنهان=ويوم الدنمركي شتم في نبيه
ويوم إن صدام إنذبح ذبحت الضان=وأبو غريب وفتنة الرافضيه
وين إنت قلي _يا شرود وخوان؟=أكبر همومك تشعل العنصريه
تبي بردك ينبتن كم جنحان=لا والله إن تبطي يا طير الحديه
إن كان عقلك هو كذا فانت خسران=تسلف لعقلك عقول آدميه
وش لك بحقران الشعر وإنت حقران=تبي تمثل بالشعر مسرحيه
تلعب على نفسك وفي شهر شعبان=وتجي الضحيه وإنت عندك بليه
وإن كانها بإسم الهجا جبت برهان=من شعر من في شعرهم عنتريه
هجا جرير الراعي وصار بلشان=يوم الولد شاتم جرير أوليه
ثم جابه إسمه (دامغه) تسوى الأثمان=تنطق إلى هاليوم كالمدفعيه
وجاه الفرزدق هاجيه شتم بسمان=ورده جريرن في معاني قويه
والأخطل بعصره هجا وسط ميدان=يوم إن غيره دنها هاشميه
هذا قبل يوم الشعر يقبل لعان=ويوم الهجا له فترة موسميه
والشبرمي بقصيدتن له بذيبان=بها كشف أشيا وأشيا خفيه
ما أشوف به أيات حقد وعدوان=ولا أشوف به سب الرجال الدهيه
ومحمد إبن الذيب ماني بجحدان=أسمع قصيدن له سوات البقيه
لكن خليل يشوف حق وميزان=ويذكر طحالب والبلا شر نيه
سوالف ابن الذيب طحلب وفنان=ومتغطرس وعندي حروف أبجديه
عرف لها خليل من قبل الآذان=وعقب الصلاة أهدى النصايح هديه
عرف جحود الحق سمي بشيطان=ونطق بنقده دون هذي وذيه
ما أقول أنا خليل علام الأزمان=لكن شهدنا له على الواقعيه
وأنا أقول لكل شاعر وفهمان=وش لك بطرقن كلها شربكيه
للشبرمي لسانن ولمحمد لسان=وكل يرد ولابها عنجهيه
البادي أظلم دارجه عند عربان=واللي ظلم غيره حياته شقيه
والشبرمي ما سب فيها لعجمان=اللابة اللي تنعرف بالحميه
عجمان منهم شاهر الشيخ راكان=سيف وشعر ودلال به شاذليه
وقبايل أهل الدار له عندنا شان=واللي حكا فيهن لعنا لبيه
حنا قبايل عندنا سلوم وإيمان=مثل الجبال إليا وقفنا سويه
لو نجزم لتحرير غزه من الآن=ثاني نهار نفك عنها القضيه
وحيفا ويافا فيهن نصير بركان=ونزلزل اقدام جهلت هالخطيه
وبغداد لو نجزم تبي تغني ألحان=وتقول تحيا أمة يعربيه
فينا الشجاعه ورث من ساس جدان=ومعنا اليدين اللي تسمى سخيه
شمر ويام ولا نسينا لقحطان=وسبيع وعتيبه ليا قيل هيه
ودواسر وحربن والأجواد مطران=وتميم وهذيل وثقيف الدهيه
وشهران مع غامد وللعز ويلان =وبقومن وبلقرن عز لخويه
وبنو شهر معهم أشانيب همدان =وظفيرن وصيعر هل المقدريه
وقضاعه وبلحارث وكل زهران=وكل القبايل قدرها بالسويه
وجميع قحطانٍ وجميع عدنان=والعذر للي ما ذكرته هنيه
حنا قبايل ما بنا أي نقصان=والجاهل ندله لحق وسميه
جبت القصيده دون شان وعلشان=ولا رجيت من أي شخص عطيه
قصدي أوضح إننا كلنا أخوان=نبقى نطيع الله وأيضا نبيه
ما ننخدع في قولت فلان وفلان=ولا نتبع أيات كلمه بسيه
والشعر ما فرق وإذا فرق إنهان=ولحد سمع له لو به العنصريه
ويا أهل الشعر قلته وعرقي بنمصان=زميلي مردي شمر الحاتميه

هذا ولكم مني خالص الود أخوكم & ذيب شمر &