مطنوخ وحبيبته سع’ـــديه

يا رب أني أرجيك أني أتزوج والله يوفقني وأجيب ورعان
وأحصل المدام ترحب وتهلي فيني وتفصخ كنادري وتجيب لي سطل في
مويه وملح وتنقع رجولي فيها ( متأثر بـ الافلام السوريا ) ..
موب حالة العزوبيه أدخل البيت الا العقال شغال ولا خلوها على ربكم


يا الربع أنا قررت أني أعرس والبنت حصلتها وحبيتها ولا عاد أقدر أستغني
عنها لانها سيطرت على مخي وعلى بلاعيمي
بنت جيرانا سعديه ياااااويلي يا سعديه قلبي وروحي وبطارية جوالي فدا رجولك
لو أني شاعر كتبت فيها 1000 بيت
سعديه هذي كيف عرفتها وكيف شفتها وليش حبيتها كل هـ الاشياء راح
تعرفونها الحين



في مره كنت طالع بروح للمطرسه الساعه 6 ونص الفجر انا امشي صدفه وتصدم ويها
< فلم مصري
المهم طاحت شنطتها دفترها انا سويت نفسي بسعدها اجمع الدفاترها
على حافة الزباله ( الله يكرمكم ) حصلت للقطو بسسسسسسس
القطو ما تحرك طالع في بنص عين وقال لي على تبن بس وأترك
اللقافه وخل الدفتر مكانه

المهم سرقت دفتر < حرامي وركبت السيارة وقعدت أتصفح فيه الا والقصايد والخط الزين
وكلام حب ولقيت في أخر الدفتر صورة بنت أنا شفتها
جتني شهقه من قوها بلعت براطمي ولو لا لطف الله كان هضمتها في المعده
(< بدا في الكذب ) .. ما شاء الله تبارك الله وش جمال وش عيون وش شعر وأطالع في المرايه أشوف وجهي وأرجع اطالع في الصورة قلت سبحان الله
فرق بين وجها ووجهي وجها زي القمر في نص الشهر وأنا وجهي مثل القمر في أخر الشهر . أنا صراحه حبيتها وقلبي أكلني ورحت أستلم وبالي أنتظار فيها قصدي مشغول مغير حاط راسي في زاوية الكوخ وأفكر أني أنا وياها في الكوشه +
والمعازيم يميني ويساري وأمي توزع الشربات وأنا وياها كل واحد يشرب الثاني العصير ..في أثناء التفكير ما دريت الا والخبطه الي على كتفي
والتفت على ورا الا المدرس عباس العبد يبتسم وطبعاً عيونه كل وحده ماسكه
زاويه يعني ما تدري هو يطالع يمين والا يسار
قال يا ديحاني مالك مسرح قلت وش تبي سقها < يعني سقها عندك شيء
ثاني والا أقلب وجهك ياخوي توني أفكر في شيء زين
وينقطع هـ التفكير في وجهك هذا الي كنه جنط دباب حق توصيل الطلبات من
المطاعم .. قال عباس مسوي تذب علي تراك سقط هالسنه
قلت م ساقط ساقط ما تفرق معي بس أنت طس عن وجهي راح الاستاذ الحيوان
( حاقد على عباس ) وانا رجعت لتفكيري وحصلت العصير منكب
على فستان سعديه في التفكير( شكلك ولعت زقارة وأنت تكتب القصه وش الي أنكب عليها العصير في التفكير .. )
المهم مر الدوم على 6 ساعات كنها 10 دقايق ما دريت عنه لاني كنت أفكر
طلعت من الدوام ورحت للبيت وأنا خلاص ما عاد أتحمل قلت هـ البنت فارسة
أحلامي ولازم أتزوجها .. لكن كيف أفاتح أبوي في الموضوع
المهم قلت ما في الا أني أعلم أمي بـ الموضوع وهي بطريقتها تعلمه .. رحت
لامي وعلمتها أني أحب سعديه وأن ودي أتزوجها وأني أذا ما تزوجتها
يمكن وأحتمال أني أموت في قضيت قتل نفسي بـ الشنق حتى
الموت .. ردت علي أمي وهي تغسل المواعين وقالت والله يا وليدي أنه يوم السعد يوم أشوفك معرس
لكن نعنبو دارك أنت منت وجهن للعرس داشر ضايع مقطع أربع ( أمي زبدت لي الحقيقه ) .. العرس يبي له رجال يرقد بدري يعمل ورجال تكانه ويكون رجال على أسمه رجال قلت يا أميمتي الله يهديك وأنا وش شايفتن أسمي سوسو والا أمورة يوم تقولين تكانه ويكون رجال ومدري أيش يمه أنا
بكره لا تزوجت وجاني بنت بسميها على أسمك والبنت تقولك
يا جده أمي سوت حركه بلسانه معناها والله ما عندك الا الخراط وقالت ما ضنيت أنك أنت وجهك الي كنه باب مقصف خربان الدينو حقه أنك بتتزوج وبتجيب عيال ( أمي قوة ذب وتحطيم ) ..قلت يمه وش خفت هـ الدم الي عليك أنا أبي أتزوج سعديه يعني أتزوج سعديه قالت خلاص خلاص بكلم أبوك بس أنت الحين أقلب وجهك ( والله الي وضعي حقير بين العائلة ) ..
قلت وعد يا ماما قالت طس لا أدخل ها الصحن في حلقة وأخلي وجهك
تمثال تريله مورسدس بكلمه خلاص أذلف .. أنا طلعت وأنا فرحان وسعابيل تسابق خطوتي ( ما يمديكم على التعبير ) رحت للغرفة وطرا في بالي أني البس ثوبي واشخص
با الغتره والعقال والبس الفروه على أنها بشت وأتخيل نفسي معرس ووقف قدام
المرايه وأتخيل نفسي أكلم سعديه وأبدا كلامي مع سعديه وأقول مساء الورد يا أغلا ورد صراحه مانيب مصدق أنك قدامي الحين أنا سعيد سعيد جداً أني تزوجتك وأن شاء الله نبقى حبايب طول العمر على الحلوه والمره .. وأنا أطالع في المرايه شفت خشت أبوي في المرايه قدامي ..
قلت لاحول الله بلا أستهبال يا سعودتي تسوين حركات كنك تشبهين
أبوي .. ما دريت الا والخبطه على علباي من ورا
( العلباء = أسفل الرقبه من ورا ) وأطالع وراي الا أبوي وراي وهاتك يا ترفس وهاتك يا تشوت .. قال لي أبوي وش هـ الكلام
الي تقوله أمك تقول أنك ودك تعرس أنت كفو للعرس هااااه
قلت وليش يا يبه ما فيها شيء أنا ودي اكمل نص ديني والشرع حلل أربع( خبطت من الضرب الي جاني من أبوي )
قال أربعه جنون ركبوك وما يطلعون منك الا بورقه
من المحكمة وشهود أثنين .. أنت وجه عرس أنت لا فكرت تعرس علمني أخطب
لك بطانيه مخده دينمو مويه بس حرمه لا .. تبي تبهذل بنت الناس معك أنت يا مطنوخ صراحه صراحه مانت بثقه أبدن أبدن أبدن .. وأنا الي أهل العباري باكين وقلت ليش كذا محطميني
لها الدرجه أنا حقير وتافه عندكم .. قال أبوي وهو يطالع فوق ومدخل أصبعه
في أذنه من ناحيت حقير حقير صراحه ومن ناحيت تافه أيضاً تافه أنا أنصدمت
وما قدرت أتحمل وأخذت سلك الشاحن الي مشبوك في الكهرب أبي أحطه في فمي أبي أنتحر وأبوي يمسكني ويفك الشاحن من يدي ويقول مجنون أنت والا صاحي تبي تنتحرما تدري الي ينتحر يتكرفس في النار .. قلت با الله تكلم لك بزر يوم تقول يروح للنار أنا داري لكن أنتم طفشتو عيشتي وما تبوني أتزوج حلم عمري سعودتي .. قال أبوي وش سعودتي وبعد تدلعها وأنا يا الردي أبوك من زمان ما عمرك دلعتني قلت وش ؟؟؟ أدلعك وش تبيني أقولك .. قال أبوي قل يا بابايه .. طالعت في أبوي وقلت وش رايك تاخذ لك لحسه من سلك الشاحن
( يبي يذبح أبوه ).. قال أبوي أسمع يا ولدي أنت شكلك واقع لشوشتك في دباديب سعديه .. قلت أنت هي وش الي
سعديتي سعدي أنا بس قال أبوي عادي , وأنا أبوك وأمون عليك وأطالع في أبوي وأهز راسي يمين ويسار وطالع في الارض قال أبوي أرفع
راسك يا ولد أنت سعودي .. قلت وليش يوم دنقت براسي حاس اني
أفريقي داري أني سعودي لكن الحين الزبده أنت بتخطب لي سعديه والا لا .. قال أبوي خلاص يا ولدي أبشر بسعدك أنت شكلك حبيت البنت وأنا قدرت حالتك اااااااه يا ولد ذكرتني بـ أيام بدايت زواجي من أمك كنت العب أنا وياها كيرم وكنا مبسوطين .. وأنا الي أقاطع أبوي قلت وش دخل زواجك من
أمي ولعبكم بـ الكيرم في موضوع زواجي .. أبوي كان مبتسم ورافع راسه فوق يفكر ويتذكر .. طالع في وهو مكشر بعد كلامي وقال والله
أنتم يا الجيل الجديد ما تعرفون طعم الحب
أيه .. قلت مخلينه لكم يا عهد أبيض وأسود .. قال أبوي اها تجهز بكره بعد
صلاة الجمعه بروح أنا وياك نخطب لك سعديه من أبو سعديه لكن أن كان مانيب واهم أن ما عنده بنت أسمها سعديه .. قلت يا أبوي وأنت وش يدريك هذي سوالف حريم مالك دخل فيها .. ( وش دخل هل الكلام ) أبوي قال أيه أيه وراح ( وش هـ العالئله الي ما تفكر أبد ) أنا
حطيت راسي و نمت الساعه 6 المغرب مستعجل ابي بكره يجي بسرعه
وانواع الاحلام في سعديه وفي ليلة العرس وتحلمت أني تزوجت وجالي ولد
وكبر وصار ضابط لكن الهيس الولد في الحلم يوم صار ضابط تزوج وحطني في دار العجزه ( حتى في الاحلام مكروش ) المهم ما دريت الا والخبط على راسي قم قم الصلاه ويوم صيحت الا وامي بكاس المويه واليد الثانية فيها صحن باميه
تقطعه للغدا قالت يا الله قم صلاة الجمعه بسرعه أبوك يطالب داخل يقول هـ الهيس ما صحى قم يا الله
على شان بعد الصلاة تسيرون على جارنا .. قلت وأنا عيوني فيها الغمص
وليش نسير على جارنا .. طالعت في امي وهي منهبله وصكتني بصحن الباميه
وقالت يا ثور أنت ما تبي تخطب بنت جارنا .. أنا قلت أي بنت
( لين الحين جاحد موب منه من النوم )
وهي الي تكب كاس المويه علي وقالت قم قم انا والله أني قايله أنك منت وجه
زواج يا البربري قم يا الله .. المهم قمت وغسلت وجهي وتروشت ولبست هدومي وطلعت أنا وأبوي للمسجد
الجامع على شان نصلي الجمعه .. وبعد الصلاة قابلنا جارنا عند
باب المسجد وجاه أبوي وسلم عليه وكيف الحال وطيبين ومن هـ الكلام أبوي يبي
جارنا يقول أقلط معي .. جارنا أفدغ ما قالها .. أبوي قال يا أبو سعديه أنا كم لي
ما قلطت في مجلسك .. قال أبو سعديه لا تكذب يا أبو مطنوخ ما عمرك قلطت عندي أنا ضحت ضحكه صغير لان أبوي تفشل .. وأبوي يلتفت علي ويقعد يعض على براطمه ويغمز بعيونه .. يعني يقصد أصكت لا تخرب على نفسك لا أتوطى في بطنك قال أبوي طيب والي يبي يكسر عندك الفنجال .. قال أبو سعديه لا ياخوي لا تكسرالفنجال عندي ولا شيء تبي عيالي تشقق رجولهم
( أبو سعديه طلع عليه غباء موب صاحي <- جاركم ما تبيه يطلع غبي.. )
قال أبوي أهااااااااا ..أنت تقول عيالك جبتها على الوتر الحساس حنا طول الله عمرك نبي نخطب بنتك لولدنا مطنوخ أنا يوم أبوي قال هـ الكلمة خدودي صارت بنفسجيه وأستحية ودنقت .. جارنا
أبو سعديه أنبسط وقال الساعه المباركه الي يجي اليوم الي نصير نسايب
حياكم الله أقلطو عندي في البيت أقلطو .. جينا عنده في البيت ورحب فينا الرجال
أحسن ترحيب وقال أبوي نستاذنك يا أبو سعديه نبيك تقوم تنقلع تشوف راي البنت أنا قلت بصوت خفيف لابوي وش الي أنقلع يا يبه تبي تخرب علي .. قال أبوي بصوت خفيف أيه أحسن يوم تضحك علي أولا يوم أبو سعديه كسحني ليييييييش قاطعنا أبو سعديه قال ما يحتاج أخذ رايها البنت موافقه أنا يوم
قال هـ الكلام قمت أبكي من الفرحه ومره أزغرط ومره أقوم
أرقص وأسوي عرضه ومره أقلبها غربي ومره دحه
قال أبوي طيب نبي نشوف البنت تخبر هذي تسماء النظره الشرعيه .. وأنا الي
أقاطع أبوي في الكلام وأبتسم مع ضحكه لبو سعديه وأرجع أكلم أبوي بصوت خفيف
وأقول له سلامات يا يبه وش الي نشوفها ليه هي قطعت أرض يوم نشوفها جميع قل يشوفها ولدي .. قال أبوي بصوت خفيف أيا النذل تبي تدخل الحالك وتخلي أبوك براقلت له وليش أنا داخل .. في مكتب أمير يوزع شرهات .. أنا داخل أبي أشوف سعديه .. قال أبوي سعديه جميع .. قلت وأنا عاض على براطمي ومعصب يبببببه الله يرحم والدينك لا تخلي ضغطي يرتفع .. قاطعنا أبو سعديه وقال تفضل يا ولدي يا مطنوخ .. أنا ما صدقت ومن الربكه سويت نفسي نايم .. وصحاني أبوي وأبو سعديه
ودخلت داخل الصاله الي فيها سعديه ووجهي كنه وجه بنقالي في المطار ينتظر
أخوه يجي من بنقلادش .. يوم دخلت ما حصلت أحد قلت وش السالفه وين سعديه المهم أنتظر ماش مافي أحد , شوي تحرك شيء قدامي وطالع الا شيء أسود يتحرك وفي صوت كحه داخل هـ السواد , بيني وبينكم أنا خفت وقلت يا ولد وش السالفه .؟المهم هـ الشيء الاسود قام يتنحنح , أنا قمت أقراء على عمري المعوذات.. ومن الخوف حسيت أن ثوبي من تحت صار رطب << يا الوصخ مثل البزر لا خفت ....؟
شوي وأنا اطالع في هـ السواد أبي اعرف وشو
المهم وأنا أقرب من ها السواد لكن لحظه ..? أنا كل ما قربت شميت ريحه مخيسه .. لدرجت أني ما عاد أشوف وحاست الشم عندي صارت شبه معدومه من قو الريحه . جلست جنب ها السواد وقلت من هناك << ضيع من الريحه . قالت هلا مطنوخ .. أنا نقزت من الخرعه وقلت أنصرف أنصرف أحسبه جني .. قالت وش فيك أنا سعديه.. قلت سعودتي هلا والله بها الريحه قصدي بها الطله.. { ما أعرف أجامل الريحه محومتن تسبدي وأن جاملت , أحتمال أرجع في وجهها } وأنا الي أجلس جنبها وقلت الحين نظره شرعيه والله الله ومغطيه وجهك , شيلي الطرحه عن الوجه السموح , << يتميلح ..
قالت لا يا المطنوخ أنا أستحي خله بعد الزواج .. قلت وأنا وش قلت الحين الي يشوفك يقول أني أبي أجيب منك عيال الحين هههاا. كل الي قلته أبي أشوف وجهك هذي النظره الشرعيه ومن حقي .. ردت والحيا يداعب وجنتها { كيف الحيا ووجنتها أنا أدري ان مالها دخل بس نفسي أقولها من زمان وحانت الفرصه في ها الموضوع } قالت خلاص بس شوي وبغطي . رفعت الغطا بحركه بطيه . وأنا من الفرحه قاعد أرافس و مره أطق أصبع . شوي أنكشف الوجه . وأنا مانيب مصدق أطالع وفوق راسي مليون علامة أستفهام وتعجب .. قلت يا عمي بلا أستهبال صعايده قوم ناد بنتك وأترك ها الحركات تراك شايب كبر أبوي . قالت وش فيك يا المخيس أنا سعديه .. ومن هول الصدمه رجعت القصه بشكل سريع الين وقفت عند الدفتر والصوره الي فيه يوم كنت في السياره { قصتي وبكيفي . أرجع في أي مكان أبي << طيب على شحم وكمل } رجعت وطالعت في الصوره وطالعت في وجهها وأنا أبكي وأظرب بيدي على الصوره وأقول مستحيل مستحيل أكيد في شي غلط . قالت ورني الصوره . شافت الصوره وقامت تضحك وحتى با الماريه كانت مركبه سن ذهب { موب بنت كداد خطوط راعي شفر } قالت هذي يا الغبي صورة نانسي عجرم حاطتها صديقتي في كتاب ومرسله السواق يجيبها لي والسواق تاخر وما جابها الا في وقت متاخر ولما صحيت الصبح وطلعت بروح المدرسه ما حصلتها . قلت لها طيب يا البقره أنتي وش تبين بها الصوره ورطتيني الله يورطك . قالت هذي والله من دلاختك أجل في أحد في ها الدنيا ما يعرف نانسي وأنا أبي الصوره على شان بسوي نفس النيو لك حقها .. قلت وأنا وش عرفني أنها نانسي أنا حدي بشير شنان وفهد بن سعيد .. وبعدين وش الي بتسوين نفس النيو لك حقها .
أنتي يبي لك 100 عملية تجميل بعدها أحتمال تطلعين تشبهين فوزيه دريع وأذا فشلة العمليه راح يحولون وجهك بلاط حمام في دورات مياه عند مسجد . قالت مطنوخ وش فيك أنت موب جاي تخطبني وتبي تتزوجني أنا سعديه حبيبتك ..قلت أما سعديه ولها شنب ما تجي .. قالت هذا موب شنب هذي حبة خال يا البدوي وش عرفك أنت .. قلت حبة خال ها الكبر موب حبة خال جرادة عبده نايمة تحت خشمك .. قالت مطنوخ وش فيك وش ها الكلام ترا أن زودتها تر بصيح . قلت تكفين عاد الي يشوفك الحين يقول بينزل منك دموع أنتي لا جيتي تصيحين ما راح ينزل منك دموع راح ينزل منك عمص يا أم ريحه يا الشينه .. وهي الي تهل العبره وتصيح وقالت حرام عليك ليش ها الكلام أنا ما صدقت أن في واحد تقدم لي ويبي يتزوجني . صراحه البنت كسرت خاطري وقلت لازم أواسيها . وقلت أسمعي يا بنت الناس أنا والله ما أصلح لك وبعدين بعقلك انا وانتي وش راح يكون أنتاجنا من العيال . صدقيني لا تزوجتك وصرنا في قمة الرومسنيه ما راح نجيب الا مجموعة أوصاخ على هية طفل . هذا أذا خشيت معاك في رومنسيه .., ولا لو سمح الله والله لا يقوله وتزوجتك حتمن ولابد راح أخونك مع أي وحده حتى ولو أخونك مع ثلاجه أو براد شاهي أو درج المكتبه يعني بختصار لا تزوجتك خاينك خاينك ما يبي لها كلام .. وهي الي تبكي وتقعد تناقز وتقول أبي أتزوج أبي أتزوج .. أنا أبتلشت وقعدت أفكر وجت في بالي فكره بنت كلب . قلت تبين تتزوجين خلاص راح تتزوجي .. وأنا الي أطلع من عندها وأحصل أبوي يبترم في المجلس وحاط يده ورا ضهره ويطالع في الارض تقول واحد ينتظر حرمته تطلع من غرفة العمليات .. ويوم شافني قال هاااه بشر , قلت ما أدري وش أقولك البئيه في حياتك وهوا الي يسطرني على جبهتي .. وقال لي وينا فيه فلم عربي أنت وجهك , قلت مدري عنك قاعد تفتر في هـ المجلس حتى من زود دورانك أبوسعديه داخ ونام على الكنب , قال أخلص علي البنت أعجبتك والا لا , قلت البنت يا يبه ملكة جمال لكن يوم جيت أطلع قالت لي ناد لي أبوك أبي أشوفه .. أبوي سعبل يوم قلت له البنت تبي تشوفك , وصار وجهه
من الفرحه تقول بطن يماني معرق شغال في بيت أمير .. قال أبوي طيب وأنا أبوك أنا ما صبغت اللحيه والشنب شكلي كذا زين , قلت لا شكلك كذا حلو وبعدين الشيب وقار , وبعدين لو صبغت وش الجديد يعني بتصير رامي عياش, أنت شبهه شبهه حتى لو تصبغ لحيتك أشقر .. قال والله وأنا أبوك أني مرتبك وأول مره أسويهااا , قلت طيب يوم أخذت أمي ما شفتها قبل الزواج .؟ قال ياخوي أمك ما خطبتها ولا شيء تعشيت عند جدك الله يرحمه وتملكت عليها وأخذتها بعبايتها بدون ما أشوفها , قلت يا الله أدخل البنت تنتظرك داخل لا تأخر عليها , قال أبوي طيب وراح يتسحب برجليه تقول بزر توه متعلم المشيء
ويوم دخل المقلط , جيت وراه وقفلت الباب وأخذت 5 دقائق الا وصوت صيااااح أبوي
أنا تمزعت من الضحك عند الباب شوي قام أبو سعديه من النوم , وجاني يركض
وقال وش فيه وش السالفه , قلت وش السالفه نايم وأبوي عند بنتك داخل مدري وش يسوي لها .. قال وشـــووو قلت لا وشـــووو ولا شـــيء , الحق على بنتك
دخل أبو سعديه على أبوي وبنته في المقلط , وسكر الباب , وأنا أنحشت من البيت
ورحت ووقفت عند باب بيتنا , وبعد ساعه شفت أبوي جاي يمشي 2000 من فوق السطح
وطاح على بطنه فوق كبوت جمس 87 و 4 أيام وهو في المستشفى , ورحت أزاوره أنا وأمي ويوم دخلت عليه وشافني جاه أنهيار عصبي وقام يلاحقني في أسياب المستشفى ويقول لنت ولدي ولا أنا أبوي يا السربوت , وأنا أصيح وأقوله يا يبه أنت الي قلت أبي أشوفها أنا وش دخلني , من شين حظ أبوي وهو يلحقني , مرينا من جنب دوراة المياه حقت المستشفى , وكان فيه مويه عند الباب أنا نقزت المويه وأبوي تزحلق وقام يزحف على خشته وطلعت من المستشفى بسرعه ورحت عند واحد من العيال عنده شقه لان ما في أمل أبوي يخليني أرجع للبيت بعد الي صار ..

شيء ما شفتوه
1- أبوي سواء أعلان في الصحف واوكلات الانباء الي يذبحني له مكافئه مقدارها مليون ريال ( والله الي حاقد علي أبوي )
2- سعديه الشينه تزوجت واحد سوداني سكران كان مار من عند بيتهم وخطفته وربطته ودقت على الشرطه وقالت طاب على بيتنا ,وزوجها السوداني على شان الستر
3- الاستاذ عباس سواء عمليه في عيونه , وصار غلط في العمليه وتحولت عيونه من راسه إلى أباطه
4- ناسي عجرم درت عني أني أحبها ودقت علي جوال وقالت تعال نتزوج توبر البي
ورحت لها في بيروت وتزوجنا وحالين أنا وياها في شهر عسل في ربوع الدهناء ..
النهاااااااايه
مطنوخ رام الله


ملطوووشه ههههههههههههههه