الشباب الزكرت الي يطقون سامري

السلام عليكم ورحمه الله وبركاته يالله تحيي الغالين كلن بسمه صغيركم وكبيركم وليا حيا كثر الله يطول في اعماركم سالفه اربعه من الزكرت يعني الشباب اللي ما يخالفون بشي يسمونهم منول الزكرت المهم ذا الشباب يحبون السامري وكلش في شقراء منول حرام حتا الرادو حرام ومن صنع الشيطان واتفقوا بينهم ذا الشباب انهم يبي يطقون سامري في بيت نخل في طرف الديره مهجور والا فيه واحد محرول الله يعافيه.. اصلا مات الله يرحمه وكل مسلم.. ذا المحرول اسمه عبد العزيز ويحب السامري بعد وهو محرول الله يعافيه قلنا مات وهو يحفض القصيد ويبونه ذا الشباب يروحون به معهم وقالوا له ووافق هو صدق فيه سامري ومعهم طبلين بس وشالوا عبدالعزيز في زبيل وتشاقله اثنين يعني كل واحد شايله مع عروه كني اشوفهم وهو حاطينه في زبيل المهم وصلوا البيت حق النخل المهجور ودخلوا وصكوا الباب وبدو بالسامري وهذا كله في الليل ومعهم سراج واحد منول الدنيا في الليل هاجده مافيه حس يعرفون اتجاه الهوا منول في شقراء انكانه شمال يسمعون مكينه العليا وانكانه جنوب يسمعون صوت السيارات في القهاوي منول اللي عند الهلال الاحمر والبلديه اللي جنب المتوسطه كل ذيك يسمونها القهاوي وين الي ياصلها منول منهبل تراي شطحت واجد المهم بدو يطقون سامري والصوت في الليل يسري يعني ينسمع من بعيد علشان السكون الرهيب منول وراح واحد وعلم النواب وقال لهم انا سامع طق طبول في النخل الفلاني وجوك النواب واسمعوهم وطقوا عليهم الباب وتطامرواالزكرت وبحلوا بعبد العزيز مايدرون وين يودونه ويقومون ويحطونه في الجصه محرول مايمشي وش يسون به وقالوا له البد يعني اسكت هذا ترجمتها هههه ولا يطلع لك حس وراح ثلاثه وطبوا على جهة النخل وانحاشو وبقي واحد فتح الباب وتعلق فيه ويوم دخلوا النواب ويطب وينحاش ولقوا طبولهم وشابين ضو يحمون الطبول بعد وبعد سامري وفي شقراء قامت القيامه المهم انحاشوالشباب الزكرت وخلو السراج في مكانه قام واحد من النواب وخذ السراج ودور في البيت ما لقا احد ويروح للجصه ويفتح باب الجصه وهي المكان الي يجمعون فيه التمر المهم فتح باب الجصه ودخل السراج ولا ذا اللي عيونه تلاقط بسم الله الرحمن الرحيم قال النايب له عبدالعزيز وش جايبك فيذا قال معروج بي وضحكوا النواب من كلامه لانه عيار عبد العزيز ايه الله سبحانه ياخذ شي ويعطي اشياء المهم طلعوه النواب من الجصه وحطوه في زبيله وشالوه وودوه لبيتهم منول الناس سمحين وقلوبهم طاهره ويحبون بعض ويحبون الستر الله يرحم المسلمين برحمته وبس خلصت السالفه الله يجمعني بكم بالفردوس وسولف عليكم بالي تبون وسبحان الله والحمد لله ولااله الا الله والله اكبر عددخلقه ورضا نفسه ومداد كلماته وزنه عرشه م / ن