محد بالدنيا يستاهل

× لا تحـطم × لو تحطـم لـك امـل
اعرف ان الله يحبك : وابتســــــم :
لاتقول " الحظ " عمره ماكمل ؟
قــلْ:

انا حاولت ~{ والله مـاقسـم ؛!


والله من جد دريت ان الدنيا ماتستاهل واللي نزلوا
دمعتي والله مايستاهلونها لاني اقتنعت بشي من
حبني مانزل دمعتي
حسافه على عالم عرفتها ماتسوى شي من اللي
عطيتهم

إلى كل من عندها هم يثقلها ..

معطل حياتها ..

كارهه لأجله دنياها ..

محد بالدنيا يستاهل !!

ولا شي بالدنيا يستاهل

الدنيا ماتساوي جناح بعوضه

أنتي ومشاكلك وأحزانك وأفراحك وبلاويييييك كله ما يساوي جناح بعوضه

محد يستاهل أصيح عشانه ولحد يستاهل أحزن عشانه وأوقف حياتي لعيونه

الدنيا ياحبايبي فاانيه

فانيه

فانيه

يعني بيوم من الأيام بموت وبيحطوني بالقبر

وبنسأل

وش بقول

وش بقول ؟؟

إنت يارب بليتني وانا كانت عندي بلاوي عشان كذا ماطعتك

يارب كانت عندي مشاكل وتعطلت حياتي وقعدت مثل الغبية أصيح عليها

ياجماعه الدنيا تمشي

وإذا في توقف

فهو إحنا اللي واقفين

القي كل همومك ورا ظهرك وخلي شعارك

محد بالدنيا يستاهل

ولا زوج بهذلك

ولا صديقه جفت فيك

ولا حقير حرق قلبك

الدنيا عندالله جناح بعوضه بس

يعني حتى مو بعوضه

حقيييره ياجماعه

إحتسبي كل بلاء عند رب العالمين

وإحمدي ربك على كل نعمه إنتي عايشتها

حنا في نعمه والله مو حاسين

الناس ..!!

الناس عامليهم بذوق وإسلوب .. وزي ما علمتك أمك من يومك صغيره

سوي خير .. سوي خيييير ولا تنتظرين رد من أحد

او إعتبار من أحد .. اذا بتسوينه سويه لنفسك .. لك إنتي عشان تعيشين مرتاحه

ما تنامين وتقولين زعلت فلانه وضايقت فلانه

وترا الدنيا دواره كما تدين تدان .. ربي ما ينسى ظالم !!

طنشي طنشي طنشي ..!!

فلانه تحش فيك .. فلانه تتكلم عليك .. فلانه ما تحبك ..!!

خليها حلالها .. هو أحسن بعد خففت علي ذنوبي .. وعطتني من حسناتها

تعلمي التطنيش والبرود وتوقعي إنك تنصدمين .. وكل ما أنصدمتي بأحد كل ما صرتي أقوى

كل ما صارت تجاربك وخبرتك الإجتماعيه أحسن وأحسن ..

رمت عليك كلمه .. عادي ولا كأني سمعت .. ان دل يدل على قلة ذوقها وتهذيبها ..

كشرت بوجهك .. إبتسمي !!

واذا رفعت صوتها .. وطي صوتك .. !

واذا أتجنبتك .. تجاهلي وجودها ...

"وترا ما طاح من النجوم أخف للسمـا "

دموعك !!

دموعك ومشاعرك تراها أهم واغلى شي عندنا إحنا البنات وهي اللي تتحكم بنفسيتنا وأفعالنا..

حبي نفسك حبي نفسك حبي نفسك ودلعيها ..!! عشان تعيشين مرتاحه...

خلي قلبك لك .. لا صديقه ولا قريبه ولا أي أحد يستاهله.. حبي الناس بعقلك مو بقلبك عشان ترتاحين بحياتك ..

نحبهم !! ليش نحبهم في الأخير اللي يبونا وهم مصدر تعاستنا وحزننـا !!

لا تبكين على أحد..!!

ابداً ابداً مين ما كان ..!!

صدقيني لو كانوا يستاهلون كان ما خلوك تبكين ولا تحزنين ولا تتضايقين ..

ولا خلوا مجال دمعه وحده تنزل من عينك

العافيــه !!

كافي أنك تمشين وتحركين إيدينك ورجلينك

مافكرتي يوم تقولين الحمدلله !!

يارب إني أمشي مو أتسحب من كرسي لسرير وأشوف نظرات الشفقه تحرقني

إحمدي ربك على كل نعمه إنتي فيها .. الحمدلله !!

المال ..!

تاكلين تشربين تشترين تتسوقين تلعبين بالفلوس بيدينك ورجلينك عايشه بأمن وأمان

وتقولين يارب وش هالدنيا الغثا

فلانه ضيقت صدري وعلانه سوت

ووصديقتي سببت لي مشكله وإلا زميلتي وو

أنا ما أبي الدنيا كرهت العالم أبي أموت !

مره وانا في السوق واحد وأمه أشكالهم جداً مبهذله و واقفين عند محل سينبون

ويطالعون بالحلى اللي عارضينه وبس يتفرجون وطولوا وهم بس يطالعون فيه .. طلع الولد كل الي معاه والأم طلعت اللي معها

كله على بعضه ما جاء 4 ريال !!!

تخيوا سأل الولد اللي يبيع إذا فيه شي من السينبون الي عارضينه بأربع ريال قاله لاء يا دوب تشتري فيهم مويه

شفت في عينه نظرة إنكسار وبوؤس مو طبيعيه لا هو ولا أمه

شي يبكي ويعور القلب وربي !!

إحمدي ربك عشان ما يسلب نعمته عنك

وصلي لك ركعتين عشان ربي يرحمك

ويرفع عنك ضره

إحمدي ربك على العافيه والله يابنات إني كنت يوم من الأيام ضااايق صدري من موقف صار لي مع أستاذة

وأنا أمشي كارهه الدنيا

وكان في قدامي ثنتين أشوفهم يتكلمون بس اللي لاحظته إن حركة إيدينهم كثيره ومو طبيعية !!

يوم قربت إكتشفت إنهم

ثنتينهم

صم وبكم !!

ما يتكلمون

بنات صغار عمرهم أقل من عشرين والدنيا قدامهم مايتكلمون

محد يفهملهم

والله إني استحقرت همي ونفسي

قلت يارب انت أنعمت علي انا كل يوم اتكلم مع أهلي

هم لا !

أنا إذا بغيت أصرخ صرخت

هم لأ !!

أنا أسولف مع صاحباتي والناس .. أضحك أبكي أنكت أتعرف على كل الناس أتكلم مع أمي أبوي

هـم لاء !! =(

كل يوم لساني أحركه مليون مره وما عمري قلت الحمدلله ياربي إني أتكلم

إيش كنت أقول

أحش بـ فلانه وعلانه

أنا ضايقه ولحد يكلمني

مالي خلقكم

ولحد حاس فيني

والله ولا شي ولا أحد بالدنيا يستـــاهل همي !!

إذا عندك هم صلي ركعتين وإطلبي ربك يفرجها

لاتذلين نفسك لخلقه

ترى كلهم ضعاف

ما راح يسوون لك شي

وأحتسبي الأجر

إحمدي ربك حتى على البلاء

إن ربي بيكفر لك به ذنوبك

اللي يشوف أهل البلاء يوم القيامه يتمنى إن جسده قرض بالمقاريظ

حنا المرض الخفيف ما نتحمله

إحمدي ربك على كل بلاء

لأنه خير والله لك

وإنتي اللي في النهايه بتلاقينه حسنات

ولأن الدنيا ماااشيه

وبتنتهي بيوم من الأيام

ومراح تبقى كل النعم اللي اليوم إنتي تطولينها

مرح يبقى إلا عملك

حنا همومنا موقفتنا عن كل شي

ماعندنا غير نندب حظنا

وعملنا

ودينا

ماسوينا شي

ياجماعه أنصح نفسي قبلكم لأني الله يعلم بتقصيري !

وقلة صبري ..!!

وضعفي ..!!!

نبي كل شي لنا وإذا نقصنا شي

تركنا كل اللي عندنا وقعدنا ننوح طول حياتنا على الناقص

إذا أرتفعت حرارتي ماتحملت وقعدت أصيح طول الليل

وبلال كان يضرب بالصخرة العظيمه الحاره بصحراء مكه

وهو يقول

أحــــــــــــدٌ أحــــــــــــــــد

وش له من الأجر عندالله

ياجماعه فكروا بس وش سويتوا ؟

وشو البلاء العظيم اللي مريتي فيه واللي بيكفر لك ذنوبك ؟

هذا طبعاً إذا احتسبتي الأجر وماكسبتي زيادة سيئات بالقنوط

وسوء معاملتك لأهلك والناس !

إنتي عندك مشكله مع زوجك؟

بلاء في واحد من عيالك؟

مشكله مع صديقه؟

جفاء شخص تحبينه؟

إبتلاء في أمك وخواتك؟

عندك أب أو زوج أو أخ ظالم؟

عندك إبن أو أخ هايت ضايع حارق لك قلبك ؟

مشكله مع زميلة دراسه-عمل؟

حالتك المادية سيئه؟

فيك مرض مزمن خطير؟

أقول في كلا الأحوال إحمدي ربك إنك مو بـ فلسطين ولا العراق

عرضك مستباح

دمك مستباح

تصبحين خايفه وتنامين تعدين عيالك وأخوانك قبل يفجعك الصبح الثاني

بواحد منهم

أحمدي ربك إذا أصابك واحد من هالإبتلاءات إن ربي رفع عنك بقيتهم

إذا أصبتي بالتهاب في الحلق إحمدي الله أنه ما أصابك بسرطان في البلعوم

وإذا أصبتي بمرض في القلب أحمدي الله أنه ما أصابك بـ مرض القلوب الأعظم ( الكفر )

وإذا أصبتي بمرض في عينك إحمدي الله أنك لم تصابي بالعمى

حنا في نعمه

ليه نجحدها؟

ليه ننكرها؟

ونخلي ربنا يسخط علينا

ربي رحيم

كريم

يعطي ويداه مبسوطتان

وحنا

نشكي لفلان وعلان

محد بينفعك

وإن نفعوك فإن ربي هو اللي يسّر لهم !

في الثلث الأخير من الليل كل يوم ربي ينزل للسماء الدنيا ويقول

هل من داع فأستجيب له .. !

كل يوم يانـــاس

كل يوم

وحنا كل يوم

وش نسوي !

قاعده على النت

ولا تسولفين مع صديقاتك عالمسن !

ولا تلفزون ولا فيلم ..

ولا نااااايمه ..

وربك العظيم جل جلاله نازل يسمع مطالب عبده

ربي مايرد إيدينك إن رفعتيها

ربك كريم

عندك مشكله

هو ملاذك

إشكي لــــه

كل شي

مشاكلك الكبيره والصغيره

الصحابه كانو يسألون الله حتى في شراك النعل !!

وربي إن ما أجاب دعوتك الحين

بيثيبك على دعاؤك

وبتاخذين أجر من إيش؟ مجرد سؤال

وبيبرد على قلبك

ربي ما بلاك إلا لأنه يحبك

ربك قدير يقدر يبلي فلان من الناس وفلان

لكن

اختارك انت

ليه؟

يبي ينكد حياتك؟

لا والله لأنه يحبك

ربك يحبك

في أحلى شعور من هذا =') !!

بلاءك مايزيد من ملكه شي سبحانه

ولا ينفعه بشئ

ينفعك إنت

ربك يحبك

يبي يجمع لك رصيد

تلقاه بعدين ..

ربك هو اللي بلاك ماتستحي تشكي لغيره ؟

وتعصيه وهو أكرمك بإبتلاؤه؟

أسأل الله أن يرفع عن كل قارئه كربها ويفرج لها كل ضيقه ويفتح على قلبها ويهديها وييسر أمره ويكشف ضرها إنه سميع سبحانه مجيب الدعاء ..

إن رباً كفاك ماكان بالأمس

سيكفيك في غدٍ ما يكون

اثر فيني حيل ونقلته لكم