قلـت الا فـي ذمتـي منـك واليـك
ينتهـي سـر الجـمـال الاصبـحـا
من يذوقك صـد عـن هـذي وذيـك
وان هجرتـه جـب ثوبـه والتحـى
ومن تسوقه كاسـة الخمـري يديـك
يتبع العـام الـف عـام مـا صحـى
لوتخـرع برقعـك عـن وجنتـيـك
ما بلش في عتمـة المسـرى جحـا
منك مبـدى النـور واالمنهـاه فيـك
لو نحى من صوبـك لصوبـك نحـى
اخذنـي مـولاي فـي ضفـك مليـك
حبّ من عندي ومن عندك رحى.
شاعرمضر ناصرالفراعنة
______________
11
يوم ابو متعب
يوم ابو متعب قِبَسْها ,معمّر كبّها
ارغم الليبيّ يركع وهو ملعون ابو
صَبّها من فوق قُلّة معمّر صَبّها
من لهبها كلّ خمّة طرابلْسٍ حبوا
خمّة من ليبيا ما عرفنا ربّها
ولا يجي من ليبيا كود كلْ سبوٍ جِبٌو
شيخنا في لحيتك يا معمّر شبّها
انكس انكس يا معمّر وكندس يا سبو
ذبّها يا خُلْفة الشرق الاوسط ذبّها
في قفا علباك رمحٍ وفي قلبك ربو
نار ابو متعب يعضّ اصبعه من طبّها
شيخنا ذروة هرم نجد ومعمّر قبو
العدا نلعن ثواها ونطحن حبّها
في ضحى وضح النقا والعدو ملعون ابو
الشاعر:نـاصـر الفراعـنـة
______________
12
هل تسمحين لي أن أحبّ ؟
ان قلت سولف يسولف لي بتسبيلة
وان قلت بالله يقسم لي بسلهامة
يا ويل حيٍّ تولّع فيه يا ويله
كم من شهر مرّ لا صامه ولا قامه
حيٍّ يشوفه وشاف الرمش يومي له
ادخل على الله كيف تشيله عظامه؟
من ناعس الطرف ذبّاح العرب غِيلة
كم واحدٍ صافح الموت اوّل ايّامه
خلّى بياضه بياضي عبد عزّي له
بسْ ما عليّه حلاة الخدّ بالشامة
طفلٍ وتوّه صغير السنّ ياحليله
يا ميْت! يا ميْت! من يلقاه قدّامه
توّّّّه يسالم على الترويض باقي له
في عالم الحبّ زرفاله ودرهامة
يمكن بعد ليلتين ويمكن الليلة
بسّ آتأكّد!واشوفه شقّ هندامه
يا وش يهمّه وانا ما نيب من جيله
من عام الاوّل وهو ريمٍ وانا رامة
حياة من لا عشق شرواه,وش هي له؟
لا وا خسارة ياْ ليلٍ مرّ ما نامه
عليه كفّي يحَفر القبر ويهيله
واخالط الناس بسّ عْقال وعمامه
لو بين مزّة وتعميرة وتعسيلة
يا وين انا والورَق والنرْد والدامة؟
سيد العذارى يوصّي لي واوصّي له
وقبلي خواله عليه توصّي اعمامه
وان ذبت انا فيه قبلي ذاب منديله
ولو ذاب حتّى عليه الثوب من لامه؟
ومن يفتتن به ترى مااحدٍ يراعي له
فتنة هل السبت من قامه ومن هامه
مفتون في طفل توّه ما لِبَس شيلة
اجل وشَ يْصير بي لو كمّل اعوامه؟
الشاعر:نـاصـر الفراعـنـة
______________
-
-
13
حطّ راسك بس !!!
حطّ راسك يا أطرق العود أنا ماني رسول
عادتي لا شفت غصنٍ يميل آمايله
في جمالك وش عسى كلّ ما نكتب يقول؟
وانت من شافك خطيرٍ يضيع القايلة
فتنتك ما حاشها فوق وجه الأرض زول
هايلة وبكلّ معنىً نقوله هايلة!
لعنبو قلبٍ يحبّك ولا صار مْهبول
يا منسّيني انتمائي لذيك العايلة
حسنكم ما يفتن ألاّ مكبّرة العقول
والاّْ راع النقص ما احدٍ عليكم سايله
ما تشوف شلون شمسك ولا مرّةْ تزول
والشموس اللي سواها لو ابْطت زايلة
لو تطبّ بديرةٍ يابسةْ قشراً محول
لا تعجّب لو تشوف اوديَتْها سايلة
من يشوفك تظلم الساق بقْصار الحجول
كيف له ما شاف برق الربيع وخايله؟!
من ثلاثك يالغضي ودّي اركب لي رحول
لين اشوف الحايلي ممسيٍ في حايله
غير سبعٍ فوق سبعٍ ولولٍ عضّ لول
خابرٍ لي شيٍّ اعظم ولاني قايله!
خصرك اللي يوم هز السما عرضٍ وطول
مثل طفلٍ لا تزيعل عليّ آحايله
من لبن من خيزران الوكاد إنّه يهول
بْرغم ما فيه سوّاه غيره شايله
أهيفٍ من طيبته ما عرف ذولا وذول
والاّْ كيف يشيل ردف بثقله غايله
لو تطبّ الملعبة من تهامة للفضول
حرّمت تلعب على القاع شقر آصايله
كلّ غصنٍ يا اطرق العود لو حتّى يطول
أنت منه اطول وعادتك راع الطايلة
الشاعر:نـاصـر الفراعـنـة
______________
14
خبر (إنَّ) مرفوع بالضمّة الظاهرة على آخره
غروٍ نطحني يجرّ الغيّ ويل أمّه
مثل أمّي أنّه عذاب الروح مثل أمّي
عليه لبّسني إبليس الهوى عِمّة
وابليس من قبل بن خالي وابن عمّي
يا ليت من هو تليّن في طرف كمّه
اليا تمدّد طرف كمّه على كمّي
غروٍ ذبحني وانا من لحمه ودمّه
وش بقّىْ للي مهو من لحمي ودمّي
لا جيت اخمّه وقلت الخمّه الخمّة
قال :ابتعد يا ولد بدري على خمّي
ما يدري انّه خبر (إنَّ) وأنا ضمّة
يا حلو حلو الخبر مرفوع بالضمّي
يوم انكشف لي نحَرْه وبانت الزِّمّة
قامت شياطين بقعا تزمّني زمّي
يا عين شيهانةٍ في عالي القمّة
قمّت بريشٍ وريش البُرْق ما قمّي
لو في بريقعْه رحمة كاشف الغمّة
ما كان زوّد سواد بريقعه غمّي
الزين إلى جاء لزينٍ ناقصٍ تمّه
والله لولاه حسن البيض ما تمّي
زينٍ عليّه تغيّر وانعَسَر صمّه
نسى ثلاثة ليالٍ عسْرها صمّي
ومن صار لي في الرخا عبدٍ وانا عمّه
لا جاء القسا صرت له عبدٍ وهو عمّي
سقى الولي يوم انا دلوٍ وهو جمّة
واللهْ ماْيسقيني ألا صافي الجمّي
يا لعنبوه انْ مدحته كنّي آذمّه
وغيره تمنّاني اقصد به ولو ذمّي
مدري على اسم القمر سمّوه يا يُمّه
والا على اسم الغضي وجه القمر سِمّي
الشاعر:نـاصـر الفراعـنـة
______________
15
أتمنّى من جميع الشباب الرومنسيين قرائتها للأهميّة
وش بلا دمعتك سالت يمال الذهاب
ضاع كدك كذا يا مال شين النصيب
ديرة عمّروها مْبلّمين الكلاب
لا يشهّيك مقطان عليها خصيب
القط اللي تهيّا وانت فوق الركاب
لا تنوّخ وهي بين الصعب والصعيب
قبلك مربّع في الروض حيّه وداب
الخضر مات والأصفر ليانه ذهيب
لا يجي الشيب راسك وانت توّك شباب
والله انّ الخنا ينبت على الراس شيب
لا تصدّق ابه حبّ ترى هو سراب
ماه لو طال عدوك ما يخضّر جديب
الهوى راح مع من راح مخلب وناب
مابقى في ثمايل جمّه الا السريب
احذر اللي مع الأسواق مثل الدوابّ
قاصرات المشالح موميات السبيب
بندق العود الاعمى ما تجدّد صواب
لو فشقها حمر ما طاح منها صويب
ولا يعوض السلَم عن باترات الحراب
لا وربّ فرق بين العدو والصحيب
وان تبدّلت صارمها بسلك الرباب
والله انك خبيث لابس ثوب طيب
شم عن اللي طرفها داير ما يغاب
كلّ زول تلفّت له بنظرة حبيب
لا تجي مثل سالفة الغبي والغراب
يوم وثق به العروة غدا في القليب
لابن برمان طيره في الهدد ويش جاب
يالمبلّم تعلّم من يودّي يجيب
والهوى ما يطهّر للعذارى جراب
ومن يرى غير هذا عدّ ملعون صيب
عرضهن مثل مصقول القزازة مُهاب
بصمة الأصبع الطاهر عليها تعيب
حطّ للوقت شلفا مثل شلفا (ذياب)
درْ على من نسبهم ما يفشّل نسيب
ليث غاب يدوّر لبوته وسط غاب
لا يغّرك شروق هو بداية مغيب
در على بنت حرّ شان حظّك وخاب
في ولدها ليا جاء هقوتك ما تخيب
ابنة اللاش لو تسقيك حلو الرضاب
ورعها يجيك مثله مثل غصن رطيب
لا يقضّي لزوم ولا يوقّر جناب
ولا يقوّي عزوم ولا يدوّر طليب
انتبه لا يجي عقب الثبات اضطراب
وانتبه لا (خبيب) المشي يرجع (دبيب)
من بعد ذا على نيّة وفا وانتصاب
ذروة الشاهق الحر العلا يوم هيب
يا هل السمحة الفجّا النحر من عراب
والبطاين مثل جوخ الملوك السليب
من ركايب ركايب من ركاب ركاب
من نجايب نجايب كلْ نجيب نجيب
ما هي مْن الذي ذبّوا عليها المطابّ
لين عوّد نحرها في ظهرها حطيب
من عطايا الولي ملحا تشقّ الرغاب
ما رعوها مسبّرة السلق في الحديب
كنّها عيطموس لابسه بشت كاب
هزّت الخصر في سوق الهوى من قريب
مثل من رقصوها جنب (عمرو دياب)
يوم ترمي الحيا تحت اسم (فديو كليب)
ذا لها اربع سنين ما تحق الضراب
حايل كنّ اذانيها مفاريد ذيب
النواظر مجامر سمر والا شهاب
نظرة مْحنشل دون الجهامة عزيب
والخشيم ادغم كنه طليعة عقاب
ويتنفّس تنفّاس الشجاع العريب
من فريد الوحش فيها الوصايف عْذاب
مدمع ومسمع وفزّ وكزّ وجذيب
حايل كنّ اسافلها معامد خراب
وكنّ اعالي قراها سرحة في شعيب
والله انّ البطن لولا عيوني جْذاب
ما لمحته وهو بين الحقب والحقيب
شوف دقّ ابرة الخيّاط تحت الثياب
عندي اسهل ترى من شوفته يا صهيب
الحقب يوم مسوا به على البطن شاب
البطاين طباين والمحاقيب شيب
ملتوي كنّه القوس القزح في السحاب
يوم خيّل على وجه السما مستنيب
والشعف لا رهَف واسْفت عليه المهابّ
قرن عمهوجة شقرا غدا له لهيب
طبّت الملعبة ما من جسدها لذاب
غير كتف وردف في الملاعب لعيب
جادل في مخيّم رقّصوها شباب
واطربتها أغنية (رهيب والله رهيب)
العبَس يوم حزّب في شعفها وراب
دبْس هجريّة في حُقّها يوم ريب
كنّ لجّة سفايفها لنارت تسابّ
خفّها في متين الرمل ينحب نحيب
كنّها يوم تلْد الصوت تلقي خطاب
وان قصر صوتها اسمع دقّة العندليب
حلو الايقاع ترقص له قرون الهضاب
لو سمعه الجبل في الحال يقنب قنيب
ما علو كُورها الا فارعين الرقاب
وما علوها على حرد الشدادي ؟
ولا نقلنا لها جردا العصا من الزهاب
دوب نرجع عليها الصوت تهذب هذيب
روّحت كنّها البرق الختالى رْعاب
هازها مخلب اشقرْ في المهامة عطيب
يوم تدبح مع الطلعات شيّ عجاب
ويوم تسبح مع النزلات شيّ عجيب
في السهل كنّها يخت يشقّ الغباب
الهبايب هدنّ ومايج البحر اديب
وفي الوعر لا ثنت بالحيل خفّ يلابّ
كنّها السيل ما قدمه يحطّه حزيب
ولاادبرت كنّها عن دينها تستتاب
ناحرت دار الاسلام المسمّى منيب
ولا اقبلت كنّها الشامان يوم المقابّ
ورّدوه الطنايا في النهار العصيب
لا ركبها غبار الدرب مثل الخضاب
في جديل اسمر الخدّين عين القضيب
دوب اخلّص كلامي والحق الباب باب
لهْي قد جت بردّه دون شكّ وريب
لا ولا جنّي سْليمانٍ لْها ينابّ
لا ولا اللي كشف له ربّ الارباب غيب
أنت ما تسمع الله في ايات الكتاب
يوم يهدي على البل كلّ قلب لبيب
لا لفح وجه راكبها من الشوق هابّ
مثل فايح دخان في سراج ضبيب
يا بدر يا سلايل محتمين المرابّ
يوم تسمع لجيش الفارسية طريب
نصّها صوب ولد العمّ وافي الحساب
للمعكلي نبي ثرّ الذهب يا حسيب
من صلايب مدفّنة الركب في المذابّ
شمّر اليا كسر حلقة حريب حريب
قل لتركي ليا منّ اشقر البن طاب
السبيعي على خيط المهالك مثيب
من ثوابه عذاب ومن عذابه ثواب
يالله اني دخيلك يوم يخطي يصيب
في عيوني سيوف من سطرها تقابّ
وفي خفوقي يصيح (مهلهل) يا (كليب)
صابني من بعض فعل الرجال اكتئاب
خاطري من ردى فعلة رفيقي كئيب
الرواسي تعلّى فوقهنّه ذباب
بهذلتنا ليالينا وانا اخّو( شبيب)
يا عزيزي زمانك بشّ نوره وغاب
مقفي مثل منزوع البلَح من عسيب
لو نقصّر يدينا اغتصبنا اغتصاب
ولو نطوّل يدينا قطّنا بكل عيب
يا عزيزي زمانك في سؤاله جواب
يسأل وهو فـ نفس الوقت عنا يجيب
في إيابه ذهاب وفي ذهابه إياب
يا مدوّر ورا الزلة دْوَرْة الذهيب
الليالي دول وايامهنّه ضباب
تصبح الصبح (قصر)وتمسي الليل (سيب)
لو تزخرف على وجه الحقايق نقاب
الحقيقة لها وجه قفو ما يغيب
سلّة السيف ما تومن بليّا نصاب
وشذرة الحدّ ما تمسك بليّا قضيب
يا عزيزي زمانك لو دمث لك جناب
جرّته ما تخلّص وافي من هليب
قبلك (العود ابو مخطر) كلاه الهباب
رضّعته المنايا من ثمرها حليب
ثبّت الزيف في ثوب من الانقلاب
فوق وجناته الاربع (هلال) و(صليب)
ولو عن اللي قسمه الربّ الاعلى حجاب
ما مشى حيّ الا وعن يمينه طبيب
لا سقى الله زمان يرتقبنا ارتقاب
صار كلّ على كلّ عتيد رقيب
ويا سقى الله زمان يوم حنا اتحابّ
يوم انا جندي ويوم انّ غيري نقيب
بسّ والله ولو ذقنا كريه الشراب
ما نبيّن لعشّ البوم منا حضيب
من تكلم حثينا في فمه بالتراب
لين ينقصّ حبل من غروره قطيب
من نباح الكلاب ايش بيضر السحاب؟
الثوابت ثوابت والذهيب الذهيب
ومن يبي العز ينزل فوق روس القباب
ما يبي الطيب نشدة شيخ والا خطيب
يا زمان الخدم ومصلّحين الكباب
ما نبي منك غير الستر ولا تستجيب
الشاعر:نـاصـر الفراعـنـة
______________
16
العلوج
يا خلوج جاوبت في حشا قلبي خلوج
ليت ما فيّْ فيك حتى تِعَرْفين الخلاج
في حشاي اربع مِيَةْ طفل أدّوا (مانلوج)
أو شريْطيّةْ عقارٍ تلاحوا في حراج
وش له استغرب ؟ وهذي هي الدنيا زروج
لأجل خاطر كلبها عَقّبت ليث الزراج
الصقور اللي اذكروها تسوج الروس سوج
يا كثر ما خدّها امسٍ لكلْ رِجْلٍ مَساج
يا حمد حتّيش لو في سما الجوزاء تدوج
والله اني خابرٍ يوم هيّ امسٍ دجاج
ناس لولا مالها امست معاورها فروج
ويا حمد ما كان أكلنا رطب غلبا خماج
يا مكثّرْة الحكي والفعايل عوج هوج
ما يِحَذْف الناس من كان بيته من زجاج
يا حمد طيرٍ جناحه وراء صدري يروج
ويش اسوّي ؟ كانه افلت من ضْلوعي وراج
في جنوب افريقيا البيض ياطون الزنوج
وفي شمال افريقيا البيض ما ترفع حجاج
لا تعجّب من (علوجٍ) توطّتها (علوج)
والله انّ الشرّ للشرّ أحياناً علاج
يا حمد ما يدفع الكَرْب ترديد الهروج
كان مالك من ربوعك على الدنيا سياج
العدل يبقى عَدِل والدروب العُوْج عُوْج
والعمى من لا معَه من فِعِل كفّه سراج
والدهر بابٍ دخوله من الداخل خروج
واللهْ لا زبّن دخيلٍ ولا دبّر خراج
ولو من الموت تْحمينا طويلات البروج
أمدىْ منْه مْلوك مِصْر احتموا في بْروج عاج
خُذْ حَذَرْك من الليالي ولو صارت مُرُوج
كمْ وَ كمْ عذبٍ فُرات انقلب ملحاً أُجاج
المطالب يا حمد دونها ضرب الفجوج
دونها شُربك قراحٍ مثل شربك هماج
ولولاْ قولة (والنعِمْ) ما اعتلوا فوق السروج
أٌمّةٌ قبلك خبَرْ حيَّها في الأرض داج
لَحْج شرهتها على من سكنها من اللحوج
كان هو قدّامهم جفّل الذيب النِعَاج
أحمد الله يوم لي من خلال الموج موج
اركبه لا هاج سِيْف البحَر تحتي وماج
ادلجوا لي كلّ ذي طيلسٍ روميْ دُلُوج
وادّلَج بي كلّ ذي أخنس الأنف ادّلاج
مأتمٌ في وادِ عبقر بعد سبع مْحجوج
صائح الموتى على جانبٍ منه استهاج
ما تصفّحنا الليالي تصفّح (كاتلوج)
لين مع كُلْ حادثٍ ذي حَدَث عشنا مِزاج
بدويٍّ سِبْت رِجْلي يبوج القاع بوج
ما تْعَقَّب وقفتي في اعتدالٍ واعْوِجاج
امتطي من عظم ساقي إلى ما قمت غوج
وافترش من عظم كفّي إلى ما نمت صاج
ما لعيني كحلِ ألاّ لُجَج ليلٍ يلوج
ولا لخدّي دهْنٍ ألاّ وضوئي والعجاج
وما لثوبي عطرٍ ألاّ حطَب سمْرٍ ينوج
وما لراسي مشطٍ ألاّ شجر سدْرٍ تَلاجّ
مثل من به في السما ديدب الجنّ مْعَروج
يوم تلعب شوشتي والهوى صلْفٍ هجَاج
يا حمد مسيار ربعي عليّه فوج فوج
غايتي يوم الردي غايته نجمة و تاج
ظبْيِةٍ رشّوا لها زعفران الخلدروج
من ملوك النحل خمسٍ بِمَبْسَمْها تِمَاجّ
ساقي النشوى لها من خروجٍ في وُلُوج
كم أنا للصحو منها شديد الإحتياج
زوجةٍ ما شاقها من قياصر نجد زوج
غير ناصر ما تبي مْنَ اْيّ اْبِنْ أمّه زواج
سمّرت بيض الشوارب على سود الدروج
وفي العَجَم بين الأُمَم قرْطِسَتهم زاج زاج
يالله يا مرهي عقب طايلة قيضٍ ثلوج
جاعلٍ بين الثنين انعزالٍ واندماج
طالبك فيها العَوَض عندلٍ هيفاً غنوج
حتّىْ في عزّ الزّعل في الزعَل منها غناج
عيْطَلٍ(5) من راس جدّي لعُوجٍ لا زعوج
بنت قرمٍ لا غدا لأحمر الدمّ انْزعاج
مُهرةٍ في حْجاج عيني إلى صالت بُلُوج
في حجاج المِحتِظر من مْلاعبها انبلاج
من ورا الهضب المناحر رعت خضر المروج
حيرة الرجل ادخلت دونها عاجٍ بساج
الشاعر:نـاصـر الفراعـنـة
______________
17
3×1=3÷1=سبيع+الدواسر+الهواجر=من إرشيف الغزل.
سلّمي يا روح ما من حبّ حلوات البناجر
غير قطعة خام غيرك ياليتيمة ما وجدها
آه ما أكبرها فضيحة عجزت أطراف الخناجر
لا تموّتني ومتّ بنظرةٍ واهيٍ جهَدْها
العيون اللي تسوّي في القلوب سْوات فاجر
يحلفون أن الدواهي هي وأنا أقول إنها أدهى
من سحايه لا جلست قْبال ساجيْة المحاجر
ما دريت أنا صغير اخوانها والا ولدها؟!
الهنوف اللي تلملم غيّها في ثوب هاجر
وين روحي في هواها يا عرب ربي قرَدْها؟
يوم أجيها ضلوع سرجوفي من الغيرة تشاجر
كلّ ضلعٍ ما يبي شوف الهنوف الا وحَدْها
اتعب رْضاها سبيعٍ والدواسر والهواجر
الولد منهم ولدها والبلد كله بلَدْها
لا مِشَت من عذرها الأرواح تاقف في الحناجر
كنّ عود الخيزرانة يقطعونه من جِسَدْها
وان عدَت يدجر بروحي من عبير الطيب داجر
كنّ دهن المسك لا عَرْقَتْ يِقَطّر من نهدها
لو تشوف البيض من حسنٍ على (هاجر) تناجر
مْعَذوراتْ ,أُمّها وهْي أقرب الناس تْحَسِدْها
شيب عيني كان أنا ماني على صبري مواجر
ويل ويلي والله اللي رحت يا خالد بيَدْها
والله اللي قام يسجرني من الخفرات ساجر
ويش عذري في عيونٍ من عمل يدْها رمَدها
هاجرٍ عن ما سواها حاجرٍ للعين حاجر
عيشتي والله ما تسوى ربع قرشٍ بعَدْها
ما حسَدْته نزلته قصرٍ من الياقوت تاجر
لا نزلت الفيضة اللي نقّضت فيها جعَدْها
ولّ يا بنتٍ على الطرْيا تجرّ اقصى الحشا جرّ
فتنة المفتون فيها من مهَدْها اليا لحَدْها
الشاعر:نـاصـر الفراعـنـة
______________
18
تسعين من الإنس,وتسعين من الجنّ,وتسعين من الشياطين
يقول ناصر علامك يناصر صار ناصر واحد ثاني
اهيف بناصر دقيّق خناصر مدرِ كيف اهله يشوفونه
قلت انت لا هنت ويش انت لو هو جاك يالعذال ما جاني
ما لمت من كان عشره ثمان وبان للعدوان مكنونه
انا طواني هوى من لقاني قبل عام وروع اخواني
بو مبسم احمر تلالا بروق الصيف ساعة شيف بسنونه
وثمان كالطشّ والرشّ بشّ هشّ من لولو ومرجاني
ترياقها كاس اصهب على سفرة ملوك الليل يثنونه
وعين كما بيض هند وقدحة زند سند عند غلماني
وسيف مسجّر ورمح مشجّر هجّر وفجّر ومسنونه
والخد جمرة كريم لهبها سامر بأسناف ديواني
او لون ياقوت احمر على اسمر من بلاد الشرق يجنونه
والكف تابوت موت ولو انه من حرير ازرق وكتاني
ما سر فرخ الحمامة منامه حدر فية غصن زيتونه
وجديل ذيل الاصيل الطويل اعقب شليل الخيل فسقاني
اشقر محجّّل ثلاث مبجّل عند حكام يلزونه
ما دام عيني عليها رواق عن حسن غيره وصيواني
حتّيش لو وقفوا في طريقي تسعة وتسعين مزيونه
يا سهيل ماانته سهيل سهيل اسم الغضي مياس الارداني
ما انته بحوله لواسمك على اسمه هلك صاروا يسمونه
سهيل اسم من لبيّن تعيّن للنفل شعب وودياني
في كل ربع وغب وخبت وجب وكل قاع اشهب وتلقونه
ليه العجب يوم ادور بروض ارض وطاها نبت ريحاني
لا بيّن سهيل ما يامنون السيل اهل برّ يخيلونه
غرو ليا بان نجمه تغيب نجوم كل البيض من داني
له قونس الراس للكاس يوم الطاس لأهل الطاس يدنونه
غرو شكمني وحبه حكمني حكم بن مقرن وابن ثاني
عليه اكبّر واحبّر واعبّر يوم اشبّر مضرب طعونه
ياحول حال لحال استحال ومات ما لفّوه بأكفاني
وعزي لمن شاف الاجواد في موته وهو حيّ يعزّونه
ويلاه ما كن ربي خلق في الارض همّ الا على شاني
اشوف ما همّ الا واذوقه قبل خلق الله يذوقونه
ولو باهقى من ورا جرتي للصوت مصلوح قد امداني
شقيت ثوبي وجريت لي صوت قطين الشام يوحونه
يا طول بالي اجامل على جرحي وانا الموت الحمر جاني
حولي خوالي وكني لحالي واثرها الاشواق ملعونه
يا شيب شيبي ويا طرّ جيبي ليت لي ريش وجنحاني
لأزور خلي جهار نهار وتالي الاعمار مدفونه
يا ويل ويلي ويا قطع حيلي ويا خسارة كل ما كاني
ما باقي الا انا والهوى عميا تمشط شعر مجنونه
يا راس راسي على قوّ باسي ازرت تشيل ثيابي امتاني
وخوفي على الراس لا يجيه يوم تعتذر عن شيله متونه
ويا خوف خوفي ويا صرم جوفي يوم شوفي ما تعداني
احط في وجه الايام الايام والايام بالايام مقرونه
ويا جرح قلبي على ما فعل بي حبي السلبي وش اعطاني
ووش في يدي يا يدي والهوى يومي على قلبي بحجّونه
ويا ثلم سيفي هو الحب من كيفي عقب خفه توطاني
وانا ضنا لابة سيفهم من دم عبد وعم يسقونه
ويا جرح جرحي هـ(جمعي وطرحي)ايجازي وشرحي وتبياني
عن ما نشا في حشا ثم مشا بيردّ مظنون لمظنونه؟
ويا شر شري انا وين اسرّي عظم ساقي صوب جيراني
الدار من دار عنها سمي النار غار تلعب جنونه
ويا لوم لومي من الزين لومي ويش قومي تقل سكراني
للحب سكرة وللبعد سكرة والهوى ما هو على هونه
ويا كبر همي ويا فجعة امي بين ابوي وبين عماني
في ساحة البيت لا حيّ فيرجونه ولا ميت فينسونه
ويا روح روحي ما احد يسمع ولا احد بيوحي صوتي الفاني
مثل المدوّه بنجد وذوده من ورا نجران يطرونه
ويا ويح ويحي يبوج الوضيحي دون خلي تسع الاوطاني
من دونه العاوي الطاوي الضاوي وحوض الموت يردونه
ويا وجد وجدي وش اللي بيجدي من عقب مدعوج الاعياني
يا كود ضربه بكف كف وصف دمعه صف بعيونه
ويا عوب عوبي ويا شق ثوبي وين غض العود خلاني
غرّ غرير ضرير قرير ليّن بيّن كونه
ويا جور جوري على شوف نوري طاح من راسي حميداني
ويا خف خفي ويا بعد شفي كن وسط الصدر بالونه
ويا شق شقي عقب سرق حقي وجلّي ودقّي تناساني
نسى نهار امس يوم(...)اسفل شفته وامزّ غليونه
في ذمتي لوّ من بيني وبينه زعل عبس وذبياني
امداه يرضى انا لا ذبحت اهله ولا خالفت قانونه
ويا غبن غبني على صاحبي يجذبني ادنى خيط سبهاني
ويا غلّ غلّي وانا اشوف خلي دونه الملّي يعدونه
فيا وين اشوفه واحوفه والوفه والنوى دونه تقصّاني
تغيب دونه ديار وتبين ديار تلو ديار من دونه
تسعين انسي وتسعين جني زدتهم تسعين شيطاني
وتسعين عفرا وتسعين صفرا زدتهن تسعين مدهونه
راجن وماجن وساجن وداجن كل فج خالي قاني
وعن الغضي يوم جن ما خبر جابن ولا يدرن وش لونه
الصاحب اللي على غير عيني ما ظهر زوله ولا باني
اسمه كتمته عن اقرب هلي خل عاد ناس مالها مونه
ومن غيرتي حالف ما يشوف الزين غيري واحد ثاني
ولو هي على الكيف حتى ملايكة المقابر ما يشوفونه
الشاعر:نـاصـر الفراعـنـة
______________
19
قصيدة وصف الذلول (الناقة)
راكب اللي ما غذيناها عبث
بنت هرش ملحته خمسٍ ورث
كنّها تنتل من الرقّة جثث
لا عطت مع صيهدٍ عقب الرغاب
صيعرية كن مرافضها دماث
كن حدر خفافها مثل الحثاث
دقّها الميسم ثلاثٍ مع ثلاث
جوس ترعى في الدِّيَر نوع اغتصاب
سمحةٍ لمصارع الفرجة لهوث
لو تبي سبتك قبل يوم الثلوث
جابته ما عن هوى الطرقي نكوث
لو يريد من اشهب الضيحة سحاب
صيعرية لا رثيث ولا غثيث
من على عاشر بطن مابه خبيث
حثّة الرجلين والممشى حثيث
كنّها الجاوي على سلك الرباب
لا مشت شفت ادهم الرقّه شلَح
والحصا صفقه مثل صفق المَلَح
خطْر ينبت في قرى الجرة بلح
تظهر الما اللي ثمان سنين غاب
كنها من تحت تنهش بالرماح
سابق تسبق هماريق السحاح
هقوتي لو هي عطاها الله جناح
ان تسابق للفضا جن التراب
كم وكم روحٍ بغت منها تروح
يوم طقّت خدها مثل الطموح
او كما طير خفق من راس صوح
من وحم ظلّه على الكدري عذاب
كن ردن اوبارها خْزام وشيح
وكن حدر عرقوبها قرم يصيح
موخرٍ مملوح واقْبالٍ مليح
مثل من دقّوا على كفّه خضاب
لا مشت ما ناشت الرجل الصِبَخ
مثل قولة علّ ما في الأرض فخ
اشهد انك يا ذلول الشط مخ
يوم هبتي من غليظ القاع هاب
صيعرية لا عطت بأرض دخاخ
كنّها تطرد عن المزهب جخاخ
من غنجها كبّر الراكب وشاخ
فوق غاربها تقل يلقي خطاب
كن وبرها لأنزَعج ريش الفروخ
وكن حمرا عينها جمرة شيوخ
وكن اعاليها ملبّسةٍ بجوخ
او هنوفٍ لبّسوها بشت كاب
في ثناياها الرسن جاله صريخ
مثل صيخٍ صيّخوا به فوق صيخ
مقدم العثنون تقْل اقْبال شيخ
كبّر الله دون بيت الله وتاب
صيعرية كن اذانيها رزز
او طواقي عسكر يوم اللزز
وكن بين دفوفها جحارة خزز
والروادف كنها روس الهضاب
تقل يا زيد مخلوقة من قزاز
يوم تبدي مع ظهر حزم نكاز
او كما روس المآذن في الحجاز
كنها فوق السهل لولب دُلاب
زينة الممشى بلا مطرق تنوز
لا مشت كنها مركّبةٍ قزوز
تسبق اللي من غثا الضولة يحوز
خشف ريم جاه من لا صاب صاب
لأدبرت مثل النعام المستحيز
ولأقبلت تشبه جنود الإنقليز
الحقَب ملزوز والمحْقب لزيز
كنّها لا عقّب الراكب عقاب
رعيها بين الزباير والهشش
من عروق سبيع للأرض المِشَش
ما تغاذوها مطرْبلة العِشَش
كود مطعمة القلل روس الحراب
صيعرية ما رعيناها بلاش
لين صلّع نيّها واطْلع وشاش
كود نبغاها على الطرقة هشاش
لين يقنع من خبر نوت عقاب
الثفان مقوّسة مثل القروش
او كفوف البيض حانية النقوش
من بنات الريح لا شاشن تشوش
لين ما تفرق ذهاب من إياب
وقفة الغارب ولا وقفة شويش
ما تقول الا احد سادة قريش
او كما اللي شاف فوق الراس ريش
وان تمايل مثل من يقرا الكتاب
عينها لا حملقتها عين لص
او على خاتم ملوك الدار فص
او كما حصٍّ لمع من فوق حص
من تحته مولّعينٍ سمر غاب
لا عدت تسبق مطاليق الرصاص
كنّها اللي فضّ محكومٍ قصاص
لا بلاد ولا ملاذ ولا مناص
طقّ له مع رقّةٍ ما هي هزاب
المناكب كنّها طرقات خوص
والشعَف كنّه مداهيل اللصوص
بترة الفخذين والساقين عوص
كنّ بين الزور والكوع الف باب
لا طرقها الوابل الغربي تميص
كنّها بنت تبي فصخ القميص
حالها لأرخى الرسن حال القريص
يوم ناظر من تحت رجليه داب
تقْل يحْداها على الطُرقة شِطَط
لا عطت خطٍّ بلا سابق خِطَط
مثل سيل أودع الوادي غطَط
وكنّها من جورها تطرد سراب
كن سنام الصيعرية يوم شاط
قبّة القصر الأميري في الرباط
والخفاف تْقِلْ كسرٍّ من بلاط
والسفايف لأخفقت كنْها تسابّ
بنت نونيٍّ تموط القاع موط
وكن اسافلها مقطّعةٍ بسوط
وان توحّت صوت راكبها رخوط
كنّها اللي شاف ديّانه ولاب
عندها قطع الديار امرٍ بسيط
والله يا لولا الرسن ساعة تشيط
ان تروح من الفزع روحة مقيط
مير هيّدها رسنها لين شاب
يا نديبي سر كما حرٍّ شلع
فوق حرّة من بطن جيشٍ طلع
مثل بنتٍ ذبّت الشيلة دلع
يوم تطوي خرجها والكيف طاب
سر وملفاك الشجاع بن الشجاع
ابن حامين المهنّد واليراع
نجد لا عدّوا طويلين الذراع
من سلايل روس مرذين الركاب
قل لنجدٍ من قبل صرم الفروع
ابو فارس ما قزاه النوم جوع
بس موحي بالإذن شيٍّ يروع
عن قليب فيه داب بدون ناب
ما للغزك حلّ يالقرم الشجيع
غير شيٍّ عجْز يلعب به رضيع
كل ما دقّوا حنك يقرع قريع
من ورا المقفي تقل هابيه هابّ
كم ولد هيسٍ من اسبابه نبغ
ونجم بن لاش من اسبابه بزغ
وكم ولد حرٍّ من اسبابه ولغ
صافحه شيبه وهو توّه شباب
يوم قلّبته بمنظور الدماغ
انقلب راسي وطشّيت الشماغ
وراغ دولاب الضلوع العوج راغ
قلت هذا هو ولا احسّب حساب
(اللسان) اليا نبغ قبل النبوغ
عزّةٍ للي يصوغ القول صوغ
وذلّةٍ للي يبي طقّ الصدوغ
يمسي بقلبه ثلاث مْيَة صواب
(اللسان) اليا عسفت ابلغ بليغ
وان تركته يا ابن روق افدغ فديغ
هو حلول اللغز واللقمة تسيغ
يوم تلحقها بجغمة من شراب
والصلاة اعداد همّال النصوب
وعدّ ما هبّت ذعاذيع الهبوب
من حشا قلبي على الحر القضوب
احمد المختار محشوم الجناب
الشاعر:نـاصـر الفراعـنـة
______________
20
قصيدة التوجد
(الرجل الذي قتل أمّه ليلة العيد)
كل ما فاضت عيوني نجر ابن حربان دنّا
في ضلوعي يسمع اللي من ورا بغداد دنّه
يوم ابن مدعث لنا سنّ الوجود الحقّ سنّا
وا فوادي كنّ دود الارض يرعى في مسنّه
وا فوادي لو تضنّى يابن مدعث ما تضنّى
كنّّه المجدور عقب الجور مرميٍٍّ بعنّه
اشعل التنباك من خلقته ما شبّه و كنّا
مير كنّّه من عجاج فاح من صدره يكنّّه
وا وجودي وجد منهو عضّ بابهامه وحنّّا
واحدٍٍ شاف الثلاث البيض سودٍ مستجنّه
شاف قدّام الخيام خشيف ريمٍ مرجهنّا
وثوّر البندق يبي صيده وراغ الخشف عنّه
اطلق اربع عقبها اربع ثم سمع صوتٍ يونّا
واثرها امّه صابها طلقه و طار العقل منّه
واتهموه بذبحة امّه ليلة العيد و تجنّا
اتهمته الناس و صدوف المقادير اتهمنّه
قالوا اخوانه ترى منّا بمنك ولا انت منّا
يفرق الله بيننا و بينك عسى مالك مظنّه
لك ثلاث ايام من ذلحين و ارحل من وطنّا
عقبها تخطر على راسك مضاريب الاسنّه
ودّع مريته وتوْ بنته صغيره ما تحنّى
توّها ام اربع شهور و في لحَمها زود لنّه
ركْب غوجه و انقلب قبله بليلٍ ما تونّى
والحمايا من خلافه ارخوا حْبال الاعنّه
المطايا و السبايا من خلافه عمدنّا
والمنايا سجّدٍ قدّام عينه يحترنّه
كل ما عنّز على قومٍ وطنّ الراس طنّا
قالوا اذلف ذابح امّه لعنبونا لو نحنّه
ذابح امّه لو زبنّا عدّه انّه ما زبنّا
لعنبوك بْيوت قومٍ ذابح امّه زبننّه
الجمالة ما تجمّل في ولد حرٍّ تدنّى
مير دوّرغيرنا وانحش بقلبك لا ندنّه
وانقلب من عندهم كنّه على محماس بنّا
يمّة اهل الغوص عجلات الركايب وجّهنّه
ركْب بابور البحر و دموع عينه يذرفنّا
فوق خدّه كنّهنّ اذواد بدوٍ مرثعنّه
يوم حلّ الليل اشرعة السفينه دودلنّا
و الهبايب ما يخلّنْ محبلٍ ما دودلنّه
قام ربّان السفينه قال يا ناس امتحنّا
قوموا ادعوا ربّكم علاّم ما وسط الاجنّه
قال شيخٍ منهم الا عندي الراي المطنّا
ضحّوا بواحد عسى الله ينقذ ايدينٍ رجنّه
و طاحت القرعه على اللي ذابح امّه ما تتنّى
ثم رموا به في ظلمات البحور المستكنّه
و ادبحوا عنّه وهو في غبّة الموج يتثنّى
ثم عرض له من وحوش القرش جرجورٍ و صنّه
عضّ جرجور البحر ساقه و صايح و استجنّا
ابك لولا الله كلاه القرش ما يسلم مطنّه
وفي ديارٍ من بلاد الهند بين انسٍ و جنّا
من فضل ربي عليه اطراف الامواج احذفنّه
ومثل ما قبل امس متهومٍ بذبح امّه معنّى
اتهموه بذبح سلطان البلاد المطمئنّه
و في السجون المظلمه خمسة عشر عامٍ قضنّا
مع ثلاث ما قضنّ الا عقب حاله قضنّه
لا سمع ورقاً تغنّي جرّ مسحوبه و غنّى
وكلّ مغنىً يزعجه غصبٍ يجي تاليه ونّه
ولا طرته بْيوت قومٍ في الخلايا يرفعنّا
دار دولاب الدبا الدالوب دولابه و زنّه
وكل ما برقٍ سرى شرقٍ صدوق الغيث شنّا
كن قلبه فوق سبق طيور برٍّ شطرنّه
عقب مدّه جاه من داره نذيرٍ مرثعنّا
قال انا جيتك بعلمٍ والله انّه والله انّه
حرمتك ماتت لها عشر سنواتٍ قد مضنّا
و البنيّه معمسٍ تقرع عليك قراع شنّه
عمّها عزّر بها في وسط بيته ما تهنّى
خادمة نسوانه الثنتين و اللي ضيفنّه
ثم زوّجها لبو سبعين عامٍ ما انقصنّا
شايبٍ يطرب خفوقه لا سمع للقرش رنّه
يوم سمْع هْروجهم فاضت عيونه و ازحرنّا
وسط سجنه كنّّه اللي ساكنٍ له في مجنّه
قال يا ربعي افزعوا لي من سجونٍ غيضنّا
و قبر قلبي الدمدم آغادي يديكم يظهرنّه
قالوا انّا وش لنا انّا والله انّا ما شحنّا
غير بنتك والاّ مثلك ما قربه بقرب جنّه
وانتحوا وعيون قايدهم جنوبٍ خايلنّا
وهو ورا سجنه عيونه كلّ نجمٍ خايلنّه
وعقب عامٍ من مجيْ ربعه و سنٍّ عضّ سنّا
اعفوا الكفّار عنّه من عقب سودٍ دهنّه
يوم فكّوا قيد رجله وانطلق خاطرْه منّا
و انفلت يبغى ديارٍ من ورا نجد اشحننّه
حثّ ساقه ما يشوف الا بنيته يوم قنّا
من عقب عشرين عامٍ في وطن قومٍ مصنّه
ومن ردى حظه نهار اغضنْ عيونه و ارقدنّا
فزّ من نومه عقب عضّه حنش دابٍ بسنّه
ومن اثر سم الحنش يونس ضلوعه يطبخنّا
و طاح عزّي لواحدٍ سود الافاعي طيحنّه
يوم هو فكّر والى فوقه نجومٍ يبرقنّا
وشاف بكية بنته اللي جا يبيها بينهنّه
قال يا نجوم السما تكفين روحي صوب اهلنا
علّمي بنتي عن اللي صاب ابوها واستسنّه
اشهد انّا ما بحلنا في الليالي اشهد انّا
مير حظي خانني ثمْ مات ما به من يقنّه
ذاك وجده وجد حالي في وطنّا من عطنّا
من هنوفٍ خدرها بيض الهنادي يحتمنّه
الشاعر:نـاصـر الفراعـنـة
______________
21
قال..قلت...!!!
قال:حي ايامنا,قلت:لا تنسى الليال
يوم كل صحوته من سقم تخديرته
قال:تذكر,قلت:هو ذي بعد فيها سؤال
والله انك خطوة الساق وانك حيرته
قال:تذكر عدنا,قلت ورشيّ المحال
قال:تذكر جمنا,قلت:وانته خيرته
قال:تذكر حكينا,قلت:من قيل وقال
يوم امير الغي ياخذ علوم اميرته
قال:تذكر درهمي,قلت:يوم اني ريال
والغبار يموت والموت من تطييرته
قال:تذكر ماضي عهودنا,قلت:احتمال
يوم جار الجار ما شككوا في جيرته
قال:تذكر ناعسي,قلت:روح اسأل بلال
يوم صفر ما سمعنا صدى تصفيرته
قال:تذكر مبسمي,قلت:ملعون الخوال
يوم بين الناس هزت عظامي بيرته
قال:تذكر مغزلي,قلت:وان هبت شمال
يوم يدراني عن البرد في تحديرته
قال:تذكر ما على الصدر,قلت:اخو العيال
يوم اولع من حمر جمرتي تعميرته
قال:تذكر ناهدي,قلت,يوم السيل سال
يوم تستسقي كفوفي سما تدويرته
قال:تذكر يوم جو,قلت:من عم وخال
كل واحد وده بذبحتي من غيرته
وكل زعيم ما تعرض لحادث اغتيال
من عدوه عده اللي دنع في ديرته
وانت لي دار وديرة ولي ركن وجال
مسجد فيه المصلي رفع تكبيرته
قال:احبك,قلت:والحب,قال:اعرف وصال
حبنا تغلب على الحق باطل سيرته
مدها لابو محب قصرها واستحال
كل ذا وش مقصد الرب من تصويرته
انت رجال وفي وانا بنت الرجال
بس غصن ينحني ودنا بتكسيرته
كل ما عندي حرام وهو عندك حلال
جعله افدا من تصبر وانا تصبيرته
يا حبيب ما سترني سوى كفيه (شال)
ولا فضحني في العرب غير نشوة بيرته
الشاعر:نـاصـر الفراعـنـة
______________
22
الصبيّة بنت هاشم وبنات الجانّ
سقيفة معبدٍ في أرض فارس
سقيفة صدر ابو فارس يفارس
على كتفي نقلت اليوم حتفي
ولي بالجنة العليا هجارس
بخدّ صَبيّةٍ من نسل هاشم
ورسني من بنات الجانّ وارس
ألا يا عيطموس الجانّ صيحي
ودقّي لي على صوت المهارس
وطيري بي لسبعٍ بعد سبعٍ
بأجنِحَةٍ كأجنحة النوارس
هجوسٍ يوم اهوجسها تشادي
رباعيّات رهبانٍ تجارس
انا العبد الذي صَبَأواإليهِ
ذوي الملك الجبابرة الغطارس
أنا العبد الذي صلّوا عليهِ
بقفرٍ دمدم الآثار دارس
بعشرينٍ رأى ما لا رأى من
بني التسعين من دارسْ ومارس
لصيحَتِهِ تزلزل قصر مارد
ودهمٍ من بني بكرٍ تكارس
سبيعيّ وذو معنى ومبنى
صناديد الوغى الأسد العتارس
زيازيمٍ شغاميمٍ أشاوس
زحازيحٍ طحاطيحٍ أشارس
سلاطينٍ شياطينٍ صوارم
وإن حمي الوغى عُمْيٌ أخارس
ورثنا قيصراً في عرش روما
ومن كسرى ورثنا ملك فارس
تسلطنّا بنجد ألف عامٍ
وفي التاريخ تذكيرٌ لدارس
أقمنا دولةً في إثْر دولة
على مضَضِ وبرد الدهر قارس
جلينا ظلمة الأتراك حتّى
تصوّف ربّهم في شهر مارس
كسرنا شوكة الباشا محمّد
ضراب الترك أولاد البطارس
جعلناهم شعوبا في العراق
وفي مصر يلمّون السبارس
عسفنا كلّ عربيدٍ مدجّج
فما من ضربنا انجته المتارس
ندلّه إبلنا جوساً وقسرا
وترعى عنوةً عشب العضارس
تدرّسنا على روس الرماحِ
وليس سوى الحروب لنا مدارس
لنا في صفحة التاريخ مسهم
بأمّات الكتب ذات الفهارس
ولنا في الأنجم العليا مصلّى
وفي أقصى بلاد الأرض غارس
بعبدتنا سبينا ألف حرّة
وعبلة عشق عنترة الفوارس
فمنّا من تلاعب بالأسنّة
ومنّا من تلاعب بالأدارس
ومنّا حربةٌ في كل هيجا
ومنّا ضربةٌ في كل فارس
فإن كانوا كما كنّا وكنّا
كما كانوا فما للدهر حارس
ومن يستبدل الآيه بآيه
عليه انياب كلْ لاشٍ تضارس
رمانا الدهر في يد كل واطي
قلال الأصل أبناء الهدارس
زمانٍ به مماليك العبيدِ
بلحم أسيادها قامت تفارس
زمانٍ به سراحين الذيابة
خضاب كفوفها الداء النقارس
انا العبد الذي صبأوا إليهِ
ذوي الملك الجبابرة الغطارس
الشاعر:نـاصـر الفراعـنـة
______________
23
في مثل هذه الأيام من كل عام أناجي قبْرها
على قبر اليتيمه نوت ثوبي بالخلا شقّيت
ذكرت الله وشبّت في ضلوعي حربٍ أهليّة
عقب وِتْر السبع والخمس والتسبيح والتسميت
طيور الما على سلمى تغنّي (طاق طاقيّة)
على باقي عرَق ساقي زجاجة كاهنٍ شمّيت
على قِرْنة حجاجه نجمة السِبْط اليهوديّة
على الجنب التهامي لبّسوني خرقةٍ في زيت
تلالى مثل واري جمرةٍ في حوض صفريّة
على ساقة ملوكٍ من بلاد الرافدين أضحيت
أركّب سنّ واقلع سنّ لو ماله ولا ليّه
وفي ريشة جناحٍ من حمام الأخشبين ادويت
امّذْرِع شان واقرع شنّ وآبرقع نصيريّة
وعلى ظهر النعامة سافروا بي سبعةٍ من هيت
إلى أعتى شعوب الأرض الادنيّه والاقصيّة
ذبحت العبد الادريسي ونِجْل الطاغية:حِبْرِيت
بأرض المغرب الأقصى طبخت من اللحم نيّة
على تابوت نوت احيا واموت افنيت ما ابقيت
ضربت الطار واجتاحت عبيد الزار كونيّة
على قبر اليتيمة نوت أجدّد حسرتي لا جيت
وأقبّل ضاحكات الموت تحتيّة وفوقيّة
على شانك ينوت اعميت خطلان البشوت اعميت
أقارع كل ذو سِدْنٍ وذو خِدْنٍ وكوفيّة
على شانك ينوت ادميت روس الخاينين ادميت
أسرّج مِرْج أمرّج سِرْج علويّة وسفليّة
على شانك ينوت اضرب بحدّ مْصقّلٍ إصليت
وكدنا ننتهي لولا خيانة عيد الألفيّة
خبيثٍ من بني قومي سقاني حامض الكبريت
قرَت وسطه عجوزٍ من ذوي حضرم ظفاريّة
وبسم اللي لهول اسمه تزلزل منبر السوفيت
نحَرها اعلى ظهرها جُبّةٍ بالسمّ مطليّة
ثلاث دهور اصارع نافثات الزرو ما ذلّيت
أغيّب شمس وادفن رمْس والأصنام مرميّة
ثلاث ازمان أداقش مسرجات الجانّ في تكريت
ثلاث ازمان تمْرخ لي ملوك الجانّ رجليّة
ثلاث سنين اعافر نافخات الطين ماولّيت
ثلاث سنين أكفّن قاريات التين بيديّه
وثلاث شهور ألاعي نازلات الطور ما ملّيت
اجاوب جنب خيمة ضاربات الطنب طبليّة
وثلاث ايّام تنعاني سرايا يام لين اصغيت
أقدّم كوع اوخّر كوع يا بيّي ويا بيّه
لذي الفيروز سادن معبد النيروز ما لبّيت
لغير الواحد المعبود ما أبديت ما فيّه
بوادي برْك طارت بي حراير تُرْك يوم امسيت
أعاشر ليل عاشر كل ذي حمراً نميريّة
طباين سبْك تدبْك دبّك ساع اقبلت ساع اقفيت
لسرْدٍ شرْد جرْد مرْد اصيّح كل قيسيّة
ببطن القِرْش اعشّي حايمات العرش ماغدّيت
وحرْش الطرْش اورّدها قليب الهرش عصريّة
بوجه الحوت جلّ اللي خلقني ضيغمٌ صنتيت
هِزَبْرٍ ما تحرّك منه ساكن ألف سكنيّة
ورب البيت ما خلّيت منهم بيت ما هدّيت
أهدّم دور وابني دور والآيات متليّة
هل المزمار عبّادة لسان النار والباكيت
بني الإفْرَنْج قومٌ من فروج الزنْج مبليّة
بكى سابور ذو الأكتاف في قصر الملك بلْهيت
على نَيْكل سقيفة عابد الهيكل ضحاويّة
تغطرس بِطرس النقرس وجينا له على التوقيت
من ارض الفرس وارض الروم جبنا القوم منهيّة
بعمّا والنبا والخمس من سورة سبأ شدّيت
بقوّة ما تواتر في الليال العشْر مكيّة
أقمنا دولة الأيتام من حِلّي إلى حِلّيت
وآخر عهدنا ما أورَدَتْ ليلى الأخيليّة
وانا ما هاضني فيما على بيض الورَق خطّيت
شجاعٍ لقّبوه :أحمد.وله شلفا وشبريّة
أعرف أحمد إلى جاء جاء وانا لا شلت ما حطّيت
تحامينا على وضح النقا والأرض محميّة