( هبوب الريح )

لولا هبوب الريح ومشاهد البيد
لايطق صدري مثل طق الزجاجه

في خايعٍ مافيه للبث تمديد
وماطبّه اللي له مع الناس حاجه

ولاجاه منهو ينتظر جيّة العيد
اللي زمانه مايعكّر مزاجه

يمرح به اللي كل جوفه تناهيد
اللي سماء ضلعه بعينه ملاجه

يشكي عليه الحزن ويزن ويعيد
واذا سكت يرفع لبرقه حْجاجه

الأرض شبعانة شيوخ وصناديد
متَى على الله فوق الارض نتواجه

ونفك قيد اللي كسر رجله القيد
وينزل عليه الغيث عقب العجاجه

يالله ياللي ما لوصْلك مواعيد
إنك تشوف اللي بوصْلك علاجه

مزعزعة الختوم .!
 

( مْزعْزعة الختوم )

اي والله إني ضايق الصدر مْهموم
وياقوّة الله كان حيلي ماقوَى

صبرْت لين الصبر شفته بالحزوم
يوم ان ذيب البارحة جاع وعوَى

حيّيت به وربعي مْزعزعة الختوم
سودان روس وقولنا ماله لوَى

ايه السيافا والسيافا له عْلوم
يشهد لنا النجم الكبير اللي هوَى

مااحْنا بحاجة للدعاية والرسوم
وتاريخنا علاج الذي ماله دواء

المجد حنا ومجْدنا فوق الغيوم
يشهد لنا الغالي وملعون الثوَى

لكن لنا ياذيب لوزانت سْلوم
مهما غوَى اللي بالرخاء مهما غوَى

إبن سعيّد ياعسَى خيره يدوم
موجود لك من قبل لاتاصل نوَى

فرقَى اللقاء .!
 

( فرقَى اللقاء )

حزني كلاني مثل ماتاكل النملة
السكر اللي وقع من كاسة الشاهي

ليت الحِزِن لاوصلني ياصلن جملة
ولايجيني مْفَرّد أو أنا ساهي

ماعاد فيها عقب فرقَى اللقاء صملة
توعّد الحزْن ليلي وانكسر جاهي

وش فيه باقي معي من باقي الحمْلة
حتى يكون البعير شعيل متْباهي

يازامل الزمل مايحتاج له زملة
يحتاج له شيخ قومٍ لا ادْبرت راهي

اللي إذا ضاقت الأوضاع يجهم له
مهو مْتحرّي بزوغ الشمس يالفاهي

لولا الجبل والشعيب ولمعة الرملة
والله فلا اعيش يوم ان الردي لاهي