دنياي ضاقـت في عـيوني حـدودهـا=
=وسـعــادتـي مايـوم بيّن وجــودهـــا
من يوم راحت وابعدت عن نواظري=
=حــبيبتي . والحـال ماشفت زودها
فـارقــت انا فــرحـة حـياتي بدنيتي=
=والعـين عافـت من بعـدها رقـودهـا
راحت وانا مقدر على الصبر بعدها=
=واوجست في قلبي وكبدي لهودهــا
مهموم انا ماكـن حـولي مـن البشــر=
=كـنّي سجـينٍ فـي معاقــل يهـودهــا
ياطـول لـيلـي كـان الأيـام مااقـبلـت=
=تحـمـل تباشير الفـرح مع ورودهـا
وياشيب عـيني كانها حـيل طـولت=
=فـي ديرةٍ عـنّي بعـيده حــدودهــــا
حـبيبتي لايمـكــن أعــيش دونهــا=
=نهر الحنان اللي غمـرني بجودهـا
فيها الوفـى كلّه وهي منبع الـوفـى=
=تحفـظ غلاي ووافيه في عهـودهـا
فيها الجمال ولا ادري شلون اوصفه=
=سبحـان ربٍ صوره فــي خــدودها
فيها الحـيا وفـيها الـدلال الأنثوي=
=وفـيها التغـلّي لايقٍ في ركـودها
الله مـحـلا عـتابهـا كان عـاتبـت=
=ومحـلا رسايلها ومحـلا ردودهـا
وليا همست ضاعت علومي وصابني=
=شيٍ يتل الـروح مـني ويكــودهـا
وليا مـشـت بين الغــنادير كـنـّها=
=عـنود صيدٍ والجـوازي تقــودهـا
مالاق في عيني من البيض غيرها=
=في همسها وفي زينها ولين عودها
يارب تحفظها وتحـمـي شبابها=
=وتصونها عن نظرةٍ من حسودها
وانا عليها اخاف من نسمة الهوى=
=وادرى مشاعرها وحافظ سدودها
يارب تجـمـعـنا بشرعــك وسنتك=
=وتريّح قـلوب الوفى من زهودها
عن دربنا يارب تبعد اهل الحسد=
=وعيون خلق الله وتبعـد حـقودها

الا ياطـير خـبرني وش اللـي صـار للأحـبـاب=تـرى قـلبي كثر هـمّــه سبايب غـيبة احـبـابي

غريبه عنّي يسافر ولا اعرف للسفر أسبـاب=كذا فجأه يودعـني ولا أدري أيـش الأسـبـابي



ترى بعده عن عيوني يهـد الحـيل والأعـصاب=يمر الوقت بغيابه وأنا عايش على اعصـابي

الا ياطــير مـاعـندك خبر عن عودة الغــيـاب؟؟=ولا تـقـدر تـطـمـني تجـيب عـلـوم غــيـابي؟؟

ابي ياطير لامـر بسمـاك مـن الطـيور اســراب=ابيك تعانق اسـرابٍ تجي من بعـدها اسرابــي

ابـيـك تفـتـّش الـدنيـا . تدوّرلي عن الأصحاب=تجـيب العـلـم ياطـيـري وتطـمّـني عـن اصحابي

لك الله ليت جنحانك عـلـيّ وماحـسبت حسـاب=اطير بصحـبة الـغـالـي ولا فــكـرت بحـســابي

اروح اسكن على قربه وأخلي الباب حول الباب=اشوفــه لافـتـح بابـه وانـا واقــف عـلـى بـابـي

ادنـّق لابـدى حـولــه من اهـله لايجـيه عــتاب=وهـو يرسلـّي النـظـره بلـيا خــوف وعــتـابـي

اخـلّـي خـافـقـي يـدلــه بقـربه ماتجيه اتعــاب=واذا ناظـرت فـي زولـه نسيت الـهـم وأتـعـابـي

سقــاك الله يايـومٍ بـدت بـه نظــرة الأعـجــاب=حضيت بنظـرة اعجابه وهو يستاهل اعجابي

سحرني صوته الدافي حـنون ومنطـقـه جـذاب=وفـيت لـقـلـبـه الـوافـي وهــو بالوصف جـذابي

الـه الكون لاتـفـجـع خـفــوقٍ مـن غـلاهـم ذاب=تلـوّع سـبّـة الـفــرقى وهــو مـن قـبلهــا ذابـي

الا ياطـير خـبرني وش اللـي صـار للأحـبـاب=تـرى قـلبي كثر هـمّــه سبايب غـيبة احـبـابي