يهون الامر دام اللي وراه من الظنون صعيب=ولا ينزل وحل من شد حيله وارقب المرقاب
لقيت الوضع كله فوضوي في ذمة الترتيب=ولا داعي على شان الهقاوي نحرق الاعصاب
معاذ الله ما ناش الخفوق احساس شك وريب=وانا فيني ثبات اللي مرازه للوطاة اطناب
رفعت الهجس ما ناديت من شان المصد يجيب=لآني ما مشيت بدرب يحمل دفتين وباب
زعمت ان الاجابه من صدى صوتي وقلب الذيب=على مبداي ابعثر با الحروف واجمعه بكتاب
وانا بحدود زعمي ما وصلت حدود فري الجيب=ولا دورت كلمه صدق وحده من فم الكذاب
قبلت الوواقع الملموس والباقي بعلم الغيب=ولا حطيت مابيني وما بين الشعاع حجاب
يمر الموج بجنوب السفينه والمصيب مصيب=وانا دامي على متن السفينه ما حسبت حساب
واذا يعطيني الصاحب عطيته والخديعه عيب=على راي المثل وحده بوحده والقلوب اصحاب

<u> ماحرك القلب غيرك يا الغلا يا الوليف=درب المحبه خلا لك والمحبه كشاف <u>
<u> راحت عليك المروفه يا العنيد العنيف=تبعد مع الحرفنه وتنفذ الاحتراف <u>
<u> زرع المحبه سقيته من رذاذ النزيف=حتى حميت الجذور من الجفا والجفاف <u>
<u> وان جيت با الحمل الاثقل ما طلبت الخفيف=الا ترا كبريائي ترفض الانعطاف <u>
<u> قومت حرب البسوس بخاطري والصريف=واجبرتني للجلوس بكرسي الاعتراف <u>
<u> صيفي شتا يا مليح الوجه وشتاي صيف=جو الاحاسيس فيه من الهجوس اختلاف <u>
<u> لنك بعيني ملاك ولا لوصفك وصيف=والعشق موج وبحر وانت الذرا والضفاف <u>
<u> استرسلت لك خواطر ما تنوش الرصيف=يمكن تنوش المشاعر والشرف والعفاف <u>
<u> والمعذره وان بدا جور الظلام الكثيف=في حال سلك الحرير يجر للانجراف <u>
<u> وانا عسفت العسيف ولا تركت العسيف=كنه عروس تباها في ليال الزفاف <u>

رحلت ورحت يا الوالد عسى الجنه عوض دنياك=عسى الجنة هي المدهل مقر ومسكنك فيها
رحيلك حرك دموع الحزن وقلوبنا تنعاك=غيوم الحزن بفراقك توالت من مناشيها
نعاك الطفل والشايب نعاك اللي كشف ممشاك=نعتك الاسره بحسره ولايه وانت واليها
نعاك اللي سمع صيتك نعاك اللي عرفك وجاك=ونعتك العالم اللي قدمت لجلك تعازيها
نعاك المجد والعزه نعاك البذل من يمناك=نعاك من الفخر روس علت وانت متعليها
رحمك الله يا اللي لك مكانه بين ذاك وذاك=رحمك الله رحمه تغسل ذنوبك وتمحيها
رحمك الله واحسن يا رفيع المرجله مثواك=رحمك الله يا اللي تعطي الكلمه وتحميها
رحمك الله يا بوي العزيز وعزتك تحماك=تعيش بذاكرتنا والزمن لو مت محييها

ما وقفت الاّ , عجب للخلي من العيوب=والـ ـ بني ادم على منهجه وجبلّته
رحمة الله كان با الطرد سيات وذنوب=المشاعر هيل عشق وخفوقي دلّته
زلزل الخفاق زول(ن) ضرب وجه الهبوب=من مليكات الهوا والطريق احتلّته
والقدر ساق المشقى قبل وقت الغروب=ولا بقي غير الشموخ يتوطّا ذلّته
اقبلت يا قبلة الله على الجسم اللعوب=اقبلت تمشي خجل والمقابل تلّته
كنت احسب من اللضا كلّ ما فيني يذوب=لين راحت عن طريق الهلاك وخلّته
اتجهت ابغى شمالي وانا رايح جنوب=من كبر جور الحلا والزمان وزلّته
ما شربت من العنا كود كوب وربع كوب=ولا خذيت من الهنا غير فاضي سلّته
في خضم المعمعه لا نجاح ولا رسوب=صفحت(ن) عني طوتها وصفحه فلّته
الف عقد(ن) با الشرايين لرضاه محسوب=والف حل(ن) هي حلا من حلاها حلّته

يا مليح الوجه مدري ليش قلت وليش قلت=يا علامات الرضا لا تجزع القلب الجزوع
تدري اني ما هضمت ولا جحدت ولا خذلت=والمساحه با الثلاثا نفس حجمه با الربوع
لاتحداني وانا كلّي شموخ ولا نزلت=انتبه للخط الاحمر ما وراه الا الرجوع
ماعلي من الزعل كانه ينوش ليا زعلت=ارتقي فوق الزعل وارقى على متن الطلوع
راحتك خذها ولكن حط نقطه يا وصلت=وانت واصل واتصالك ينفصل قبل الخضوع
زهرة اللون البنفسج من خطا اللمسة قتلت=واعتبرتك منت قاتل بس دهورك الشروع
وانت في نص المسافه لانجحت ولا فشلت=والقطاعه ما تمادى كود با القلب القطوع
كلمة تجرح شعوري تجرح اكثر لو خجلت=لاتوقع من خفوق(ن) يكره الظلما يفوع
اعرف انك لو دهلت من الاماكن ما دهلت=ما تعلّي كبرياء ولا توقعها وقوع
واعرف انك لو علا قولت هلا فيك احتفلت=احتفالك ما يولّع با الدهاليز الشموع
احتملتك واحتملتك واحتملتك واحتملت=واحتمالي ما يوصل منهجي متن الخنوع
والنهايه لو نقصت بخاطري والا اكتملت=ما يبيحن الخفايا اللي ورا هدف الضلوع

يا فاتنه ما تجاهلت وتجاهلتك=ياهيبة المعركه والرمح والرامي
بعت الخطا والجفا من يوم قابلتك=ماكنّك الا ملاك حل قدامي
حتى شعرت الوهم من ارض شايلتك=انه تميد وحصاها يلمس اقدامي
مدري من الشكل والا كبر منزلتك=والا من الهيمنه والهول وهيامي
روحي تهاوت وانا با الحيل جاملتك=من سطوة الليل فوق الشمس والنامي
زايمت الاثقل وشاكلني وشاكلتك=المس ضلوعي واحسه تضرم اضرامي
وكنت احسبنّي اسولف في مغازلتك=واثري ليالي سكوتي تسبق ايامي
لو هي على الكيف ارضيتك وزعلتك=لكن وقوف الضمى يثر على الضامي
كل البها ملبسك والموت راحلتك=ومن الهوا موقعك با الموقع السامي
كن الحلا لك لحالك ورث عايلتك=وانا وريث الذهول وجرحي الدامي
تدرين اسهل مصيبه يا تخيلتك=انسى غلا الاصدقا واحقاد الاخصامي

مد اليمين لكل يمنى سليمه=ويمناك لصحاب الردى لا تمدّه
رد بقدر لاهل الوجيه الحشيمه=ورد(ن) يقدر غيرهم لا تردّه
عد الكلام اللي ينومس كليمه=وهرج(ن) ينزل قيمتك لا تعدّه
هد المباني والظنون العقيمه=واترك بنايات الوفا لا تهدّه
شد الحبال اللي تشد العزيمه=واللي تهبط خلها لا تشدّه
لد النظر فوق الفجوج العتيمه=وعلى دهاليز الخطاء لا تلدّه
حد العدو حتى حدود الهزيمه=وصاحبك لحدود الخطاء لا تحدّه
سد الطريق المنتهي با الوخيمه=ودرب(ن) يوصلك الرضا لا تسدّه
ود الودود المندفع من صميمه=ومن لا يود وممتنع لا تودّه
رد اللئيم وخل عندك شكيمه=واعط الكريم ليا طلب لا ترده