|
][ .. أجازه سبت و أحد .. ][
سلام عليكم من الله ورحمته وبركاته .. اخواني اخواتي .. كلنا يعرف ان في معظم دول الخليج اصبحت الأجازات الأسبوعيه إما جمعه وسبت او سبت وأحد .. ونظرا لما يتعرض له اقتصادنا من اضرار بسبب بعدنا اربعة ايام متتاليه عن سوق الإقتصاد الدولي وهي ايام الخميس والجمعه اجازتنا والسبت والاحد اجازتهم .. وهذا وقت طويل نبتعد فيه عن السوق الدوليه خاصه واننا دوله نفطيه ! يعتمد اقتصادنا كليا على هذه الاسواق .. وبما أن الشرع لا يحرّم تحويل ايام الخميس والجمعه إلى ايام عمل .. مادامت المصلحه العامه تتطلب ذلك .. فالبعض يطالب بأن تكون اجازتنا الاسبوعيه هي السبت والأحد .. ونواكب العالم بأعماله وأجازاته .. فهناك من يقول .. عالأقل بيكون يوم الجمعه حلووو اكثر وبنصلّي وحنا مبسوطين انه اخر يوم دوام :) مهوب مثل الحين يكون بكره سبت .. وكلنا يعرف السبت من الصغر .. يوم لئيم سبحان الله :) حتى الواحد لا صار وجهه طويل يقولون له مع وجهك كنه يوم السبت ! :jhjb: أنا من رأيي لو حصل التغيير ان يتم كاملا .. بحيث تكون الأجازه سبت وأحد .. وليس حل نصفي وهو جمعه وسبت ! حبيت آخذ آراؤكم الخيّره في الموضوع .. لأن الحكومه تدرسه بجديّه وستعرض الدراسه على مجلس الشورى .. وبإنتظار صاحب القرار .. تقديري لكم جميعا // |
الجمعه تعتبر عيد للمسلمين
اما ان تكون الاجازه الجمعه والسبت شي عادي كان عام 1395هـ يوم الخميس دوام وفي عام 1396أو97على ما اعتقد صار الخميس اجازه مع الجمعه يعافيك الباري على الطرح خلوووووووووودي نبي ندلعك ههه |
هلا صقيقي الواصل
انا معك الجمعه يوم عيد للمسلمين .. لأنه يوم صلاة الجمعه ووقت الصلاه صاير بنص اليوم لكن ممكن يصير الجمعه نص دوام ولو ماكان صباحي يكون مسائي مثلا بعد الصلاه بساعه ساعتين يعني // ويكون ا لسبت والأحد أجازه مثل العالم كله // لكن لو كان الجمعه صعب يكون عمل طيب عالأقل بنرضى مثل بعض دول الخليج يكون الجمعه والسب أجازه ... تسلم اخوي الواصل على المداخله الجميله وش فيه المنتدى نايم وين اصحاب الفكر ؟ وين الناس ؟ :) |
تحياتي اخي خالد وشكرا على الطرح الجميل والاسلوب الخفيف على القلب لكن انا ضد السبت والاحد يعني بالعربي ما اتخيل نفسي رايحه بعد صلاة الجمعه اشرحلي ميت ولا عندي محاضره لا مابي مابي |
|
الله يعطيك العافية اخوي خالد طرح جميل لاهنت
يقال انه اقتراح يدرسه مجلس الشورى وبالطبع لا مستحيل في الأمر دامه لا يخالف الدين ولكن من وجهة نظري كذا كوويس خميس وجمعه أحسن ممكن لأن العاده غلبة علينا ولكن الجمعه صعب جداً كما ذكر اخوي الواصل انه عيد المسلمين وصلااة الجمعه وهيك جزيل الشكر لاعدمتك |
السلام عليكم
بارك الله فيك على الطرح مشرفنا الغالي خالد بالبدايه اسمح لي من خلال موضوعك اعتذر عن اي مدخلات ام منقاشات لبعض المواضيع المطروحه لوجود عقليات مفلسه تبحث عن التطوير من خلال المواضيع رغم العقول لابد من اتزانها قبل الدخول للمنتدى قبل التطوير فعجبي البعض وجهات النظر تسمى لاصحاب العقول العقيمه او المفلسه اتهام شخصي او بمعنى اخر خصوصيات هه رغم وجهات النظر في محور الموضوع بعيد عن التجاوزات او الخ ماعندي اي اضافه ماقصروا الاخوان ولكن اخي خالد صلاه الجمعه اغلبهم مخومره معهم او سهران في ايتها حاقه نظر لوجود يوم عطله الخميس عند البعض فما بالك لو الخميس دوام لارأيت تناقص للمصلين وهنا خطوره من ناحيه الدين او مايسمى المحافظه على صلاة الجمعه كـ خطب الخ فكلنا نعلم مدى صحه الحديث بمعناه من ترك صلاه جمعه الخ ولكن نسأل الله العلي العظيم ان يدحر افكار العلمانيه واليبراليه كـ قتراحهم المخزي بالنسبه لنا كمسلمين فانا اتفق مع اخواني يوم السب والاحد ( اسطوانه يرددونها بنو الليبراليه والعلمانيه الشركات والمؤسسات) فيوم الخميس دوام منذ زمن اغلب الدوائر الحكوميه ناهيك عن القطاع الخاص مجرد افكار ليست لها اي فائده في مجلس الفلس الشورى هوناك قضايا اهم من اجازه و دوام يعني بالمختصر يوم الخميس دوام اغلب القطاعات الحكوميه والقطاعات الخاصه + الجامعات لا شي جديد يذكر يامجلس البهم برب |
اقتباس:
هلا مستحيله شرفتي الموضوع اختي تشرحين ميت ؟ وين تشتغلين انتي في مختبر .. او مغسله موتي إنا لله حسبي الله على حافز وطاقات ههههههههه عموما وجهة نظر سديده ونحترمها تقديري لحضورك السامي |
اقتباس:
وبحضورك اخي الكريم النجم شكرا كبييييييييييييييييره لا عدمتك يالغالي تقديري |
اقتباس:
مع احترامي الشديد لوجهة نظرك قبل حضورك الاجمل طيب خلاص النوفي بكلمهم يخلونها جمعه وسبت :) تقديري لهالحضور يا رائع |
مو لو اسبوع اجازه واسبوع عمل يكون اطلق :)
انا اشوف لو يوم الجمعه دوام والله احسن على الاقل اللي ما يلحقوا صلاة الجمعه بسبب النوم يلحقونها بسبب العمل والله المستعان وياليت تكون فعلا سبت و أحد على الاقل ما نحس بغلاسة يوم السبت وثقله لاهنت خالد |
وعليكم السلام ورحمة الله وبركاته
الله يعطيك العافية مُشرفنا " خـالد .. على هالطرح ومناقشة هذا الامر .؟! انا ابدي إستيائي جداَ إذا هالموضوع والامر وصل إلى مجلس الشورى لدراسته , هو مُجرد إستطلاع لا اكثر ولا اقل وتنحل المشكلة , إما يدرسونه دراسه وتتعطل مواضيع اهم من هذا الموضوع هذه كآرثة .؟! وناس متفضينَ وستر عيوبهم وفضائحهم على مواضيع تجميلية لأفعالهم وحضورهم فقط .! آنا من وجهة نظريَ اشوف الخميس والجمعة الأفضل والأنسب , ممكن العادة اللي تعودنا على هاليوميينَ .! ودي / |
اقتباس:
هههههههههه وش فيك طاير يا كافي :) كنك ماسك طريق القصيم الدمام وخذيت الرياض مطب :) اما مخومره ههههههههههههههههههههه يا شيخ حرام عليك :) قصدك hang over هههههههه يارجال اذا متعودين على ان الخميس اجازه عادي بنتعود على ان السبت اجازه وش تفرق يعني ؟ كلها ايام مثل بعض ! بالعكس بتحس براحه اكثر لأن العالم كله حواليك بأجازه مثلك // احترم وجهة نظرك ولحضورك جزيل الشكر والتقدير يا بطل // |
اقتباس:
ههههههههههههه اسبوع اجازه اوف اوف // حنا بنقرب للعالم وبكذا نبعد عنهم اكثر ! فعلا وجهة نظر ممتازه راح اناقشها معهم في مجلس الشورى :) طيب توصين على شي شادن ؟ ههههههههههههه يالله بأمان الله :) |
و عليكم السلآم و آلرحمه اولآ حآبه آشكرك على طرحك الـ " خفيف آلظل " كـ صآحبه :) و بآلنسبه لرآيي أنآ أشوف نخليه ع خميس و جمعه آممم مدري بس يمكن تعودنآ ع هيك و مو متخيله انه بيوم من الآيآم بيكون آلسبت عطله :) مع انهآ مو فآرقة معآي لأن آيآمي كلهآ اجآزه :) ششكرآ على الطرح مسيو خآلد لآ هنت |
اقتباس:
هلا اخوي شيخ منور الموضوع // وياليت يغطون افعالم وفضايحهم بشي مفيد مثل بعض باقي الدول اللي يسوون بلاوي لكنهم عالاقل يلتفتون شوي للمواطن ولا يبخلون عليه // لكنهمم يعتبرون المواطن هو عدوهم الأول حسبي الله على من هو بهالشاكله // شكرا لحضورك الجميل لا هنت |
اولا يعطيك العافيه
بالنسبه لي 00الاجازه خميس وجمعه تظل نفسها احسن 00 لان معك الاربعا والخميس والجمعه (وتصدف اجازات بالسبت بعض الاحيان ) وهذا الي محليها فلللله لوكان يدي القرار كان خليت 5 ايام اجازه و2 دوووام للعزاب والعازبات والمتزوجين والمتزوجات 1 دوام والباقي اجازه (عز الله اشتغلو الناس وداومو وماراح يبقى عزاب ) ههههههههههه |
الحكومة تدرس الموضوع وانت جاين بهذا تنشدنا ههههههه امزح
عاد ان جيت للحق اخوي خالد خلنا على ماحنا عليه وشبه الخميس والجمعة يهبلن مافي احلى منهن تاكته العبرة .. او جمعه وسبت احسه بعد ماهي شينه ...اما سبت واحد لاوالله ماني معك بهذا .. عافاك الله ع الطرح ... |
اهلين مشرفنا وشاعرنا خالد"ذربه"
وخير اذا تأخرنا عن باقي الدول ماهو طول عمرنا متأخريــــــــــــــــــــــــــــــــــــــــــــ ـن.. هو اهم شي في اجازه يومين ..بس اللي كان مانع ان بعض العلماء رفضو مشان صلاه الجمعه واذكر مره سمعت شيخ مصري يقول عاتي تكون الصلاه "الجمعه"العصر!!!!!! فايعني لاتستغرب يمكن يصدرون هالقرار دام اغلب المجلس علمانيه وتحياتي "تكمل ذرابته" |
اقتباس:
والله يالجودي مابوه اخف من ظلك :) اهااااا اجل نخليه خميس وجمعه حيث ان الجمعه صلاة .. اجل ورى ما نكز الخميس للسبت <-- بريداوي خالص :) ايه باتسر لا جا تعيينتس تذوقين مرارة السبت خاصه عاد لا صارت قومة بدري ووراتس مشوار 200 كيلو ! وقبله بشوين لازم بعد تسوين الفطور والقهوه لرجلتس // اقول اشرطي عليه يجيب شغاله هههههههههههههههههههههههههههههه الله يرج بليسك صرت كني عجوز يالله يالله باي :) ايه صح شكرا على حضورك يا عسل :) |
اقتباس:
عز الله انك اثرت نقطه قويه اخوي الغالي تصدق معك حق موضوع العزاب والمتزوجين // مفروض يكون فيه اختلاف بالنظام بينهم يعني العازب مو مثل المتزوج بالرواتب .. وبالاجازات .. وبطريقة العمل كلها من معامله .. إلى ساعات دوام تصدق فعلا .. كيف نقارن بين متزوج ويعول مسكين وبلشان لين راسه اطفال وحرمه وحاله وبين عازب ينتظر بس متى يجي وقت الدوام عشان يجي يتضحك ويناقز ويتكشخ ويفطر فول ويضرب شاي ! صدقني اثرت نقطه في غاية الاهميه اقول اخوي احبك .. على فكره هههههههههههههههه انت مسمي نفسك كذا عشان نقول احبك ادمان ؟ ههههههههههههههه الله يرج بليسك والله انك ذكي :) ذكرتني مره بدكتور مصري بإتصالات جده كنت ماخذ دوره هناك اسمه ( حياتي ) وتعال شف التعليق لا جينا نناديه ههههههههه يا حياتي هههههههههههههههههه احراج المهم حط اسمك ورقمك عند الكنترول بنتصل فيك :) تقديري لحضورك // |
اقتباس:
هلا والله بالخطيبه والشيخه انفاس .. :) انا معك فعلا جمعه وسبت مناسب جدا ويرضي كل الاطراف عشان يكون يوم الجمعه مريح وصدورنا مستاسعه لان بكره مو دوام // ما نبي نروح نصلي وحنا مكشرين وعارفين انه اخر يوم اجازه // اصلا ان جيتي للحق خليني عن طريقك اقول للاخوان كلهم شي ماقلتوه ههههه وهو إن // يالربع الخميس مثل السبت بالضبط .. لانه لاصار الخميس دوام خلاص ما يصير اسموه الخميس اللي تعرفونه بنتعود على انه مثل الثلاثاء والاربعاء عادي // وما يفرق بينه وبين ا لسبت شي كله تطلع الشمس الصبح وفيه صلاة ظهر .. وعقبه صلاة عصر ,,, الخ وش الفرق يعني ؟ الفرق بس بالجمعه عشان الصلاة فقطططططططططططط // اح والله اني تعبت هههههههههههههههههههههههههههههههههههه ياليت بمن بارد :) هلا انفاس انتي لاهلحين بوه ؟ :) يا هلا والله بانفاس زارتنا البركه اختي .. وصدقيني انفاس توقيعك احلى توقيع اشوفه // بدون مجامله كل التقدير |
اقتباس:
احلى واحلى ذرابه والله اختي خواطر :) اي بالله انك جبتيها هههههههههههههههه يعني خير يا طير ؟ ما حنا طول عمرنا متأخرين هههههههههههه حلوه منك :) ههههههههههههههههههههههه اما الشيخ المصري هههههههههههههه الله يرجك بالله صحيح ؟ :) هههههههههه يخليها العصر ؟ مثل بعض المشايخ في مصر هناك تصدقين خواطر محللين الحشيش هههههههه يقولون انه مانزل بالقرآن تحريمه ! وفيه مطاوعه هناك بمصر وملتزمين يضربون حشيش .. واحد يسولف لي عن مؤذن بحارتهم يعرفه شخصيا يقول ما يطلع يأذن إلا هو ضارب سيقارتين ههههههههههههههههههههههههههههههههه ويقول بنفس الوقت يا ويلك تجيب قدامه طاري خمر او بيره او مشروب يعصّب على انه حرام ! عاد يقولون مره شيخ مشهور هناك يطلع بالتلفزيون ماني قايل اسمه لانه متوفي الله يرحمه // قاعد يسولف على طلابه بالمسجد عن تحريم الحشيش وتحليله قال طالب منهم يا شيخ ما هو الحشيش وكيف شكله ؟ ويطلّع قطعة حشيش من جيبه قال ( زي ده ) ههههههههههههههههههههه قالوا الله الله الله يا شيخ انته بتضرب حشيش ؟ قال // واللهي إزا كان حلال أدينا بنشربو .. وإزا كان حرام إدينا بنحرئوا هههههههههههههههههه حضورك عسل يالغاليه لا عدمتك وربي نورتي الموضوع // تقديري |
ووااي ياحلات الخميس
أصلن ماصدق يجي الاربعاء عشان أرمي أقلامي وكتبي لامانبيه يتغير وربي كذا مرهـ حلو إما جمعه دوامـ لامستحيل عوافي خييو ع الطرح |
اقتباس:
خلاص سكوبه نفس احساسك وانتي ترمي اقلامك وكتبك يصير يوم الخميس هههههههه يعني الاجازه جمعه وسبت // والله شذوذ عن العالم .. الاحد اول يوم دوام والعالم عندهم الاحد هو يوم الاجازه الاساسي ! يا ويلي من شباب في رحله الحين يجي ويقول الليبراليه والعلمانيه :) تسلمين اختي سكايب على حضورك الجميل |
خميس وجمعه والا سبت واحد...
بالمختصر رااح نعطل يومين ونداوم خمسة نفس المعنى ماتغير شئ |
بالنسبة لي خميس وجمعه افضل اولا لمن يحب صيام الاثنين والخميس وايضا الجمعه عيدنا يالمسلمين والا لازم نكون زيهم بكل شي حتى بعطلتنا التاريخ والميزانية والاجازة والله ان قرفت من اسواقنا ومطاعمنا كل شي ماركة اجنبية احس ما كأننا عرب ومسلمين ياربي ليش نتذمر من كل شي يخصنا ونتفاخر ونطالب بكل شي يخصهم ونظن بانه الاصلح لنا |
اقتباس:
لالا مخاويه شلون نفس الشي لالالا الخميس والجمعه اللي نعطل فيهم العالم كله وقت شغل رسمي وانا اتكلم عن الاقتصااد واسواق البورصه وما إلى ذلك .. وهذا الشي يأثر سلبيا على اقتصادنا لكن خلاص ولا يهمك كلمتهم قالوا اوكي بنخليها جمعه وسبت الاجازه يالله مخاويه دقي عالدلوخ حقينك كلهم ههههه وقولي لهم السبت احلى طلعه للشاليه :) وفلّوها وانبسطوا وخوذوا حقكم من السبت كانكم حاقدين عليه هههههههههه يسلم لي هالحضور ما اطيبووو تقديري |
اقتباس:
المشكله اختي على الفطره .. إننا نجي على رأس قائمة " الشعوب المستهلكه " كل شي نستهلكه ما نصنع شي إلا " المهفّه " ههههههههههههه تعرفينها ؟ اللي مصنوعه من الخوص ولها عصا ونحركها بيدينا عشان تحرك الهوى ! ياليتها عالكهرب عالاقل :) وبما أننا كذلك فيا إما اننا نعيش كما هو الحال قبل سبعين عام .. او نظطر ان نقلدهم ونشرب شربهم وناكل أكلهم ونلبس لبسهم بما بتوافق مع تعاليم ديننا طبعا // وبالنسبه لموضوع الاجازه اختي مدام ان فيها فائده ومصلحه عليا للوطن .. ليش لا ؟ نغيرها عشان مصلحتنا .. مدام مافيه نص ديني يمانع ذلك وجميع المشايخ حللوا الموضوع شكرا على حضورك الراقي اختي // تقديري |
| الساعة الآن 01:43 PM. |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir
HêĽм √ 3.2 OPS BY: ! ωαнαм ! © 2010