من خاطر يهوا البيوت المحاميل=وليا عطا با القاف يعطي ثمينه
روز الجبال الصم راي المهابيل=والعلم يلقون النشاما دفينه
زاد الكلام وقل يلقى التحاليل=والادمي ينضح با الاحرف كنينه
ودا خبر وان جاب عند الرجاجيل=راع الحيا لابد ينضح جبينه
قلته وانا شاعر واحب المداخيل=واحب قيل يحتوي سامعينه
حنا على الكوكب مع الحط والشيل=الكوكب الي كلنا معتلينه
الكوكب الارضي عليه المداهيل=فيه الحياة ولا شكا ساكنينه
ترقب عليه الشمس والجدي وسهيل=وحمل اثنين انتاج نار وطينه
عليه ثقل ما تكيله مكاييل=والله على ثقل الرواسي معينه
وعليه ثورات العواصف مقابيل=وعليه من عقب العواصف سكينه
وملوحة الامواج واعذوبة النيل=والكل منها مقنع شاربينه
على بساط ارضه نتاج ومحاصيل=وهواه مع نبض الحياة اكسجينه
هبط عليه الوحي والطير ابابيل=والامر الله والامر طايعينه
واطهر بقاعه ما يبي له تفاصيل=مكه وارضه والحرم والمدينه
وحنا نساير وقتنا الصبح والليل=وتجري على سطوح البحور السفينه
بين الفرح نجري وبين البهاذيل=الي يسار الكون والي يمينه
وربعي على الكوكب رجال مشاكيل=شمر لباس المرجله لابسينه
على المعزه شاربين الفناجيل=وبيمانهم لاهل الوفا سايقينه
كبار الصحون ورايقين التعاليل=وساع الطعون ومجدهم محتمينه
سادو على الكوكب بعاد المداهيل=مدهالهم بين البشر سايدينه
شمر هل النخوه وشرابة الهيل=با السيف الاملح صيتهم كاسبينه
شمر هل الرده وركابت الخيل=ريف الضعافي والخوي ملحقينه

حبيبي ما علي من هرجت العذال ذاك وذاك=علي من الكلام الي تقوله انت من يمي
ترا قلبي وروحي والمشاعر كلها تفداك=غلاك الي دخل وسط الثلاث وصار في دمي
مكانتك الرفيعه بالمحبه زودت مشراك=تشب النار با الاحساس وتطفيه وتحمي
رسمتك با الخيال وكل ساعه با الخيال القاك=اطالع صورتك واحتار بين الكيف والكمي
زرعت الود بالاحساس تعطي والخفوق اعطاك=عطاك الود مثله ما عطا خالي ولا عمي
وعدتك با الوصال ولا تجاهلت الوعد وياك=وعدتك باهتمامي واعترف لك يا كبر همي
قمر خمسة عشر لاجيت في منطحك ومحياك=جمال الكون كنه فيك يا الفتان ملتمي
جمالك يلفت الانظار ربي واعسى يحماك=عليك اخشى العيون من الحسد واذكرك واسمي
خفيف الدم همي بين كل العاشقين ارضاك=رضاك بخاطري ما ضاع بين الجم واليمي
حبيبي ماعلي من هرجت العذال ذاك وذاك=علي من الكلام الي تقوله انت من يمي

كريـم ياقاف(ن)خذتـه البـروده=وعلى صفا سلمى تحطّـم معانيـه
قدام اجا غصب يتبخـر صمـوده=ويصبح سراب(ن)بأوله لين تاليـه
اصغر من اللي عن سمانا يـذوده=يقفـي وذعـذاع الشمـال متقفّيـه
ماينثني لأطمـاع نفس(ن)حقـوده=ياصار راعيها الخطا من مباديـه
نفسه عن الكايد عزوم(ن)شـروده=والا على الذمـه كبار(ن)هقاويـه
حايل غنيه عن نفوس(ن)جحـوده=وتركي يبي سب الاجاويـد يغنيـه
سيرة سجاح اليوم منـه معيـوده=متفرش(ن)نهجه ونهجـه مغطيـه
لو كان مسلم ماسجد مع سجـوده=فرض الصلاة اللي نصلي يصليـه
شرهاتنا بالطيـب نثبـت بنـوده=والا الردي ماله علينـا مشاريـه
وتركي عطا الله قام يشعب قعـوده=يبي كرم حاتـم يشيلـه ويمحيـه
اكرم رجل يوم الحبـال معقـوده=واطلق شنب يجري كرم مايجاريه
تركي جحد والا النبي جاب جوده=تركي طعن والمصطفى اللي مزكيه
يمكن يشيل جبال حايـل لسـوده=وطويق للصمان يرسـي مراسيـه
دامه لحاتـم طـي جنّـد جنـوده=ويمكن فرس حاتم هو اللي مذكيـه
دام الكلام بـلاش يبـذل جهـوده=شاعر وطن يالله عسا الله يخليـه
شاعر وطن يبغى المشاعر يسوده=وعلى حساب الغير يبنـي مبانيـه
نعم(ن)بحكام الجزيـره واسـوده=حكام تاخذ حـق وافـي وتعطيـه
حكـام عـدّو للمعالـي سـنـوده=والكل منهم مانـزل عـن معاليـه
الهـرج ياجاهـم تقيّـد قـيـوده=يطيب هرج الطيب بلسان راعيـه
ال سعود احـرار جـو مهـدوده=وسلطـان منهـم ماتـردا مداليـه
والسرد مايغني رجال(ن)سـروده=لو ماانسرد يعجبه سـرده بشافيـه

ماهو بنا اللي نازل(ن)منزاله=يامن على متن الفضا منزالك
الا بقي كل الشموخ ابقاله=والا بقيت مع الشموخ ابقالك
تدري من اللي با الخيال اقراله=اقرا حروفك انت ايه اقرالك
ماقلت غيرك با الغرام احياله=اموت من موت الغلا واحيالك
روحي تعاند وارسمك وامحاله=والروح من كثر الوله تمحالك
زدت المكيل وزاد في مكياله=وفوق البسيطه راجح(ن) مكيالك
ولعتني والموت شفت حباله=واثري حبال الموت مثل حبالك
كن الحلا عمه وابوه وخاله=يا فاتني عمك وابوك وخالك
العشق لجلك شارب(ن)فنجاله=ومقدر(ن)في خاطري فنجالك
الهجس لك مني تشد رحاله=ياصلك في حلك وفي ترحالك
والحس ما غيرك بشر سواله=الا انت مشروع الولع سوالك

مدري سعادة روح والا شقا بال=يوم التفت بين الشقى والسعاده
ردت بي الخطوه وانا اقول ماقال=اللي وطا الجمر الدفين بهواده
زاد الشقا, قل الشقا , راح ,ما زال=ماهمني دام الرصيد الجلاده
ودتني الرغبه وقابلت الاهوال=ولا خضع راسي لغير العباده
لو طق راسي جال واقبل على جال=يبقى شموخي زرع واحصد حصاده
وقفت وانواع العواصف با الاحوال=اعاند احساسي وازيد بعناده
الموت قدامي مظلات وانزال=ليل(ن)على ثغر النهار بسواده
الغيم غطا الجو,ماهل همال=حتى سموم الوقت غطا براده
عسى الحيا ينزع ويبعد با الامحال=واخذ من انسام الورود الآفاده
شدتني اللحظه وانا اقول موال=يرجع صدا صوتي علي ارتداده
انا هوا روحي معلق بسلسال=ينوش روس ويرتطم با القلاده
ينوش روس وتردعه حبت الخال=ويرجع على وسط العذاب وهجاده
ويلامس اطراف النوازل ويجتال=حتى العوازل يلمسه والوساده
هذي هي القصه من الدال للدال=مدري سعادة روح والا قراده

با الهون يا الهاجس اللي نشت متن السحاب..=احذر من الغيمه اللي ما بعد نشتها..
الغيمه اللي بها البارق يشق الضباب..=ان حاشتك مشكله والا بعد حشتها..
ما عاد يمديك تنزح من محيط العذاب..=لو كل الارقام حطمته وفلشتها..
راحت معاك الظنون وعودت با الجواب..=استرسلت يوم ردت لي وناقشتها..
زعلتني ,ليش تفتح لي من الهم باب..=جاذبت فوق لسماك الروح واربشتها..
واقف على منكب البيدا واسجل خطاب..=واقسا الظروف بهذاك الوقت عايشتها..
يا كن الافكار من عندي تحث الركاب..=هي,طفشتني وانا,بالحيل طفشتها..
وياكن بالصدر شلفا لبن غانم ذياب..=لو تنتهاوش برفع الصوت هاوشتها..
لو كان قلبي من الفولاذ يمديه ذاب..=من خربشات(ن)بنار الهجس خربشتها..
الله يجازيه ودا والتفت لي وجاب..=يا لين حتى جروح الروح نبشتها..
يا وقت جرحك نزف والله يعين المصاب..=والحال جوعتها والنفس عطشتها..
لكنّ ماهو بنا اللي يعلن الانسحاب..=والدعوه اللي تودي خلف طنشتها..
الصبر با الخرج يملاه وشموخي زهاب..=والذلّة بخانة التهميش همشتها..
بين الزعل والرضا في خافقي والعتاب..=وطروش ردت علي وطروش طرشتها..
ومن الضما ما رويت ولا طردت السراب..=واللعبة اللي تغث البال كوشتها..
خليت صفحة كتاب وشلة صفحة كتاب..=من بعد ما شفتها كله وفتشتها..

ما على (السباح) خوف من البحور ليا نزلًه=كان مازوًد رصيده شي ما نقًص رصيده
رحلة(ن)ياصل بها الجمه تسجًل في سجلّه=عاند الموج العنيد بقوة الروح العنيده
زاحم الموج بعناده يعقد الحبل ويحله=رافع(ن)حجم الاراده فوق والهقوه بعيده
والهجوس اللي تروس وتاصل الروس بمحلًه=ماترد الا تنوش الهام وعقول(ن)سديده
ياحروفي لامسي راس (الهرم) و(الروس) كله=وسجلي لي ياحروف القافيه جمله مفيده
يا قصيده ما بغيتك كان بحروفك مذله=كان بحروفك مذله ما بغيتك يا قصيده
الطموحات الكبيره با الجريده والمجله=وعظّة الابهام من عقب المجله والجريده
دلًعو , بنت تحدى للقلوب وتستحله=كنها ذات الجمال وكنها البنت الوحيده
والبنات الباهيات اللي لهن مذهب وملًه=كنًهن من غير حسن , ولا جمال ولا عقيده
حطمو فيهن جمال(ن)تل حبل العشق تله=حطمو حلم الليال وفرح الايام السعيده
قالو البنت(الصعيديه)شكت من جور خله=قلت قصة عشق تحزن و(الصعيدي) في صعيده
يا سواليف الغزل مابين ضيم وبين زله=ما يشد اهل الهوا غير السواليف الاكيده
ناشف الحلق يتحرا الغوث من قطره تبله=والف قطره ما ترد الروح من ناشف وريده
عذّبه طرد السراب اللي يشوف ولا وصلًه=ماترك طرد السراب ولا وصل شي يريده

الاوهام تسبقنا على العالم المجهول...=...والاشواق تبقى بالمشاعر وتحرقنا
سراب الوهم لو يتبع الواقع المعقول ...=... سبقناه لو هو سابق الوقت سابقنا
فتلت الشنب واثر الشنب من قبل مفتول ...=... توهق بشر واجد ومعهم توهقنا
نبي من نهار آمآلنا نسرق المحصول ...=... ولكن لقينا خيبة الليل تسرقنا
على منحدر ليل(ن)بدا الجانب المبلول ...=... على المفترق من غفوة العاطفه فقنا
على السفح والخد النقي ينقع الهملول ...=... نزوح الخيال وضيق الانفس مضايقنا
نهوز البحر في جزر الافكار عرض وطول ...=... ولكن نخاف اغراقة المدّ تغرقنا
وانا كل مابي , زحمة الخافق المنزول ...=... من المصدر الواحد هو اللي مطوقنا
معاي الظنون تعانق الغيم جول وجول ...=... متى الغيم ينزل وبرذاذه يعانقنا
رفيق الطريق اسمع من القول بعض القول ...=... عسا كلمة(ن) تلمس, وتدفع وتعتقنا
زمان المخافه بالسنه صار خمس فصول ...=... ومع كل كلمة,ريق الاجحاف يشرقنا
واناو العواذل بيننا العازل المسدول ...=... ولا شي . الاّ .. فارق الصدّ يفرقنا
مليك الخيال اعط , الخيال المليك حلول ...=... ترانا نسوق لها التباشير واشتقنا

معاك النور(ياوجه الشعاع)وطعنة الفرسان=وانا اللي فيك شفت الليل والخنجر والاشراقي
رفعت الليل ياطرف الخجل والنور كله بان=نزوح الليل وقدوم النهار ونظرة الشاقي
زهمت انت السوارح واقبلت لك تعزف الاشجان=بعد ناشت ثبات المستريح وهقوت الهاقي
وراه العاصفه تلمس جذور وتلمس الاغصان=تلاعب في شرايين الحياة وتربك التاقي
قمر خمس وعشرحد الشبه مع خاتم سليمان=مداهيل الخيال ومعطياته وش بعد باقي
تبي تنهي ,كفايه مابقي الا , بقايا انسان=اباهي با الشموخ وبا الشعور وقمة اخلاقي
اقوله وانت يا وجه الشعاع وكفة الميزان=تحديت الظلام ولا قتلت المنهج الراقي
وانا والخنجر المرفوع والميدان يا حميدان=سلم راس الطنا والا التسامح يسبق اشواقي

خذ راحتك كان الشجون همست لك =واللي معايا عنك يبقا معايه
حتى ولو بيض الليال اغرست لك=يقضي على غرس المشاعر ضمايه
ان كان نفسك بالجفا وسوست لك=اتبع هواها لين حدّ النهايه

ماني بقايل لك اجلس ياغلا لا تروح=اتبع هوا النفس في ليل الهوا والصباح
روحك تدور مطامحها وانا لي طموح=واهم حاجه رضاة البال والانشراح
زرع الغلا ورد لا مني زرعته يفوح=اسقيه من هجسي الصافي سواة القراح
وانا لي اسلوبي الواضح واحب الوضوح=وان جيتني بالتسامح قلت كلي سماح
خذ راحتك مابعد هالروح تبديل روح=لا تشرب الا من الحالي وكبّ الملاح
ارقب على ماتبي من عاليات السطوح=اللي يريحك سوّه واتبع الارتياح
لا تلتفت لي ولا تحسب حساب الجروح=اسرج خيول الخيال وخلها بالبراح
والى, وصلت القناعه جدّ والا مزوح=ادخل على ماتراه انه لشخصك مباح
علك ترد برضا خاطر خذاه النزوح=ابعد مع النازحين وزاحه الاجتياح
وانا على ما انت خابر ماهدمت الصروح=باقي على كبريائي والشموخ الوشاح

لا جيت لي مدّ اليمين وتكلم=اخذ معك واعطي وافتش كلامك
علّ وعساك من المآسي تعلّم=تحفظ مراتب قيمتك واحترامك

ياناس خلي يشبه (الشمس)ياناس=لوكان تحرق(للفضا) تعطي النور
اغلا من الياقوت والدر والماس=عندي,وكل(ن)له هوايات وشعور
لو كان للدنيا من الحور عساس=لا قلت اكيد انه هو اللي من الحور
ماعاد فيني عرق ينبض با الاحساس=الا احس بداخل العرق له دور
روحي ,تجاذب له على جذب الانفاس=وش لي,ومالي,دام انا فيه مجبور
زعيم عشق, ويلعب اخماس واسداس=العشق يشفع له والاحساس دستور
ولا باس اقوله الف مرّه ولا باس=وانثر على درب الغلا ورد وزهور
قدر المحبه يلمس العين والراس=وبذر المحبه با الشرايين مبذور
لا روّح الطاري,هوا البال ينحاس=وان عوّد الطاري,غدا البال مسرور
ان قلت عفوا,ما ذكرته على ساس=اني بدل عفوا,ابي منه مشكور
واجب,وانا في قلب الامواج غطاس=معذور لو اني تماديت معذور
وش يملك المنهي بعد دق الاجراس=ان كان من دق القناعات مامور
الجمر يمكن بعض الاحيان ينداس=اذا حطب ناره من احساس مقهور
والحبل من شد الرجا يقطع الياس=لن الامل يبني عمارات وقصور

ماهي غريبه لا غدا العقل مذهول=ولا هي غريبه يلمس السابح الجم
يا ملهب احساسي,تجي منك, معقول=وانا الذي لاقلت لي قلت لك تم
كنت اشتكي لك واشرح الهم واقول=واليوم عودت اشرحك انت للهم
لوكان جرحي ينكتب ضد مجهول=كتبت , لكن يرفض الجرح والدم

مهما يشح الوقت وانتي تشحين=يبقى الضمان اللي من اول ضمنتي
ما همني جرح الغلا والمحبين=اطحن بهمي مثل منتي طحنتي
هي مشكله وحده تعادل ملايين=لا مشكله مادامه المشكل انتي
كل المشاعر في سجونك مساجين=وانتي فتحتي باب سجن وسجنتي
يا ملهبه انتي لحرفي عناوين=يا ملهبه كنتي وكنتي وكنتي
كنتي وما زلتي من اول وها الحين=با المسكن اللي لك بنيت وسكنتي
ما ناش قلبي ناش كل الشرايين=بلاي دفن(ن)با المشاعر دفنتي
روح الغلا تلمس عقول المجانين=وانا شتمت بليس وانتي لعنتي
زان الزمان وشان بقلوب الاثنين=فيه ارتهنت الوصل وانتي رهنتي
وش بدل الحاله بدل وجه وجهين=والا على ما قيل طلعت بلنتي
كلمه وغيره وقفي لو تموتين=اصبر على الشدات لو امتحنتي
انا شموخي يلمس الراس والعين=حتى لو بسود النواعس طعنتي

اكثر من اللي تطلبينه عطيتك=وانتي مثل ماني عطيتك عطيني
انا كتبتك با الغرام وقريتك=وسجلت بحروف القوافي حنيني
ياما وياما با الهجوس احتميتك=يشهد شمالي با الهجوس ويميني
كان اعترافي ذنب لني شريتك=ارجوك في صحرا الضياع اتركيني

ماغاص بطن البحر واحد يهاب الغرق=اكيد ما حرّك الدره ولا جابها
روح الرضا لو نزف فوق الجبين العرق=يبقى الرضا مثل عشق العين لهدابها
زيجات الانفس تحب البرق لامن برق=غيث المشاعر فرح والحزن ينتابها
وانا مشيت الطريق وجيت با المفترق=اما اترك العاليه والا اتعلابها
البدر يجلا سواد الليل لا من شرق=لا داعب الحالكه ينزاح جلبابها
الورد لابان لعيون الهواوي سرق=والشوك لاناش رجل المهتوي صابها
وانا على طرقتي دق الخيال وطرق=واللي تفوق الخيال اموت واحيابها
هزيت غصن شجره واهتز كل الورق=طيّرت كل الطيور وطارت اسرابها
ماهمني من جحد ماهمني من درق=لن اعوجاجات سفن البيد بارقابها
انا ادري ان احتراق الحس يترك حرق=واحد.ثلاثين واحد,يحرق اعصابها
بعض الاسامي تشابه والله اللي فرق=والمهمله ما تفيد اللي تسمّابها
ما غاص بطن البحر واحد يهاب الغرق=اكيد ما حرك الدره ولا جابها

مدري من اللي دعاني يا مليك ودعاك=حتى ملكت المشاعر كلها يا مليك
روحي معي وانت روحي فوق وزنه معاك=والامر ما كان فـ يديني ولا في يديك
زايمت الاثقل وعانيت العنى من عناك=وانت بذرا عن عواصيف الجفا ما تجيك
والهجس برض(ن)تشيلك والخيال بسماك=والطيف لا مرني قلت الله اكبر عليك
يسعد صباحك ويسعد مع صباحك مساك=اقولها كل ما جيت انتظر واحتريك
انت زعلك با الثواني للخفوق ارتباك=ونهايت الصبر بحدود الدقايق وشيك
كل ارتباكي زعل يركد بلحظة رضاك=لنك لحالك تنوش الحس مالك شريك
قبل امس لين امس حتى يومنا وش بلاك=ارفع يقينك سما والشك لا يعتريك
جيت اشتكي لك همومي والدوافع غلاك=نسيت همي على شانك وقمت اشتكيك
تطلع وتنزل ولكن ما نزل مستواك=من فوق حد السحاب وخاطري محتميك
موت(ن)على موت كلك موت يا لعن اباك=لاوالله اسف وانا ابغى اقول يا لعن ابيك
اقصد بشرع الغلا والا حياتي فداك=دام الغلا ترتديه وهو بعد مرتديك
عساك تبقى على مسرح خيالي عساك=عساك تبقى ولا قبلك ولا احد(ن) يليك