يابوفهد كان انت تنشد عن الحال = صارت حياتي يارفيقي ممله
من كثر مابالصدر من ضيقة البال = يظهر علي في بعض الاوقات خله
مما على قلبي من الهم يجتال = مخطور عقلي يبتعد عن محله
لو شفتن اضحك والبس شماغ وعقال = قلبي عليل وعلة القلب عله
احيان تلقاني مع الناس رجال = عذب المشاعر بين مذهب ومله
واحيان اكون اقرب على وصف تمثال = يتعب ضميري واترك الهرج كله
لازلت اعاني واريش العين لازال = مابه رحم والقلب عيا يمله
ياقبلة الله ياحلو حبة الخال = على ثمر خدٍ كما ورد فله
يذوب قلبي ياتبسم هوا البال = فديت انا الضحكه على مبسمٍ له
وان طالعت بالعين ياراحم الحال = يصيبني من زايد الشوق ذله
رغم اني اشكي من سواياه غربال = مضمون قلبي صار مستسلمٍ له
صبري على فرقاه ياصاحبي طال = طالت معاناتي عسى الله يحلـــه
هذي حياتي كان تنشد عن الحال = صارت حياتي يارفيقي ممله