تحف باللي موقفه دايمٍ كاش =وسلّم على باقي العرب وانت ماشي
كلٍ على ما يسّر الرب معتاش =وانا مثل غيري على الله معاشي
الصاحب اللي ماخذ الطيب من لاش =هذا سبب صبري وسر انتعاشي
عينٍ له لحافٍ وعينٍ له فراش =بيني وبينه انسجام وتماشي
فعلٍ جميل ووجهٍ أبيض من الشاش =والله كريم وبارق الخير ناشي
ومن لا يحوز الطيب يا عنك ما حاش =لقوا عديمين الضماير طناشي
وما دام لك من يلحق العلم لا شاش =صم المتون وخل عنك الحواشي
ومن جا على لاشي عوّد على ماش =ما ذكر في روس الضبا لي عراشي
ولولا العدل ما قام في دار الاحباش =ما لاذوا أصحاب النبي بالنجاشي
ولولا الحسد والناس وابليس يعتاش =ما طار باسرار المحبين واشي
راحت علاقات العرب طاش ما طاش =بعض الاوادم مثل بعض المواشي
ومن باعنا بشوي بعناه ببلاش =إما نصير اخوان والا بلاشي
عناية الدكتور واجهزة الانعاش =ما فادت اللي باع دمه بلاشي
من لا يقدّر عشرة العمر لا عاش =حلم وتبدّد في مخدّة فراشي
يا مدّعي صدق الوفا وانت غشاش =لا تنتقد مشي الجمل وانت حاشي
يوم الكلام المختصر يبري الجاش =أبديت ما كنّيت في وسط جاشي

يسلم انتقائك الذوق شاعرنا
يسلم منطوق شاعرها
الله يسعدك ..