|
طلال الشمري بحاجة الى رايكم
بسم الله الرحمن الرحيم السلام عليكم ورحمة الله وبركاته أخواني وأخواتي .. ما وقفت امامكم الا لأني بحيره من أمري فكلي أمل أنكم تعطوني آرائكم .. انا أدرس حاسب لي تقريبا سنتين ونص مع السنه التحضيريه وانا الحين بالمستوى الثاني ومنزل من المستوى الثالث تقريبا ثلاث مواد مع العلم انه كل مستوى فيه سبع مواد . يوم خلصت السنه التحضيريه ودخلت تخصصي اللي هو نظم معلومات سقطت بجميع المواد اللي ادرسها وبما فيها مواد التخصص ونجحت بالإنجليزي والقرآن .. طبعا طلع معدلي 1.80 وعطوني إنذار جامعي . حاولت شوي اني اتدارك الموضوع شديت حيلي تقريبا شوي مهو مره وعديت وجبت معدل 2.75 نزلت مواد بالصيف اللي راح ونجحت فيها بتقدير ضعيف ونزل معدلي وصار 2.50 والحين انا مثل ما قلت لكم انه بالمستوى الثاني ومعي مواد من المستوى الثالث لكن احس انه الحاسب ما يصلح لي ولا لي هوايه فيه واحس لو ببقى فيه بتخرج بمعدل مهو جيد وانتم عارفين اذا الواحد ما تخرج بمعدل حلو وطيب وشوله يتخرج حسافة دراسته الترم هذا تقريبا خلص لانه اختباراتي تبي تبدا بـ 16 / 2 / 1434 هـ وراح ينزل معدلي هذا شي اكيد لكن نقول عساه ما ينزل تحت الاثنين عشان ما يقطعون المكافئه ولا يعطوني انذار لانه نظام الكليه ثلاث انذارات ثم يطردونك برا الكليه وليس برا الجامعه . فأنا فكرة إني أحول ..!!!!! على بداية الترم الجاي .. طبعا اواجه عقبات انا وبقولها على الترتيب :- 1- الأهل :- يقولون لا تحول واقعد بتخصصك والتخصص زين ومن هالكلام وما عليك من الناس وكلامهم طبعا بزعمهم انه فيه احد دخيل من برا هو اللي معطيني هالفكره .. واني اركز على الدراسه واترك الطلعات انا ما انكر اني اطلع تقريبا واجد شوي لكن الشي اذا انت ما تبيه راح تتهرب منه وانا اتهرب من الحاسب . 2- بعض اخوياي :- يقولون لي اقعد بالحاسب وانت جيد ومن هالكلام وانه فيه ناس تخرجوا بمعدل 2 وهذولا هم متوظفين وقاعدين يستلمون رواتب لا تقل عن 10 آلآف .. وان قلت بواسطه قالوا ايه بواسطه .. " انا اتكلم بعيد عن الواسطات ". 3- من ناحية نفسيه :- من ناحية نفسيه فهي نفسيتي صايره دمار ابي لي دكتور نفساني ههههههههههه من ادخل الكليه اتضايق وتجيني ضيقه ما يعلم بها الا الله فأحس لو اني اترك الكليه افضل لي هذا مجرد شعوري ونفسيتي . 4- المستقبل :- وهذا هو أهم جزء .. انا خايف اني احول ولا اتوظف او شي زي كذا مع اني مؤمن ومتقين من هالشي هذا انه الأرزاق بيد العزيز الكريم لا هي بيد فلان ولا علان . ----------------------------- بتقولون وش مخطط طيب تحول له .. انا ودي أحول إلى :- 1- إدارة أعمال . 2- محاسبة . 3- إقتصاد . 4- تربية خاصة . 5- خدمه اجتماعيه . فما ادري وش رايكم بكل صدق وشفافيه ..؟! مع العلم اني ادرس بجامعة الامام بالرياض .. وعارف انه الحاسب له مستقبل كبير وجميل جدا الحاسب . لكن ابي رايكم ..؟؟ لا تبخلون علي !!!! أخوكم / طلال الشمري :$ |
السلام عليكم ورحمة الله اخي طلال اول شي المستقبل لايقتصر على قسم الحاسب فقط من خبرتي اتكلم لك لاني انا موظفة في احدى جامعات المملكة قد لاتجد نفسك في الحاسب لكنك تبدع في قسم اخر اهم شي في الموضوع كامل نفسيتك ومدى تقبلها للقسم لانك متى مااحببت القسم ابدعت فيه وتفوقت فيه انصحك كأخ لي قبل كل شي استخير (فما خاب من استشارولاندم من استخاار ) وثاني شي الروحات والجيات خفف منها لانها كم سنة وتعدي وتفلح بمستقبل مشرق ان شاء الله ويمديك على كل شي و لاتشغل نفسك بأمور قد تبعدك عن الدراسة اجعل الشهادة هدفك الاساسي واسعى لتحقيق الدرجات العلا فيها ,, وهذا الهدف ليس صعب لكن الصبر الصبر والجد والاجتهاد نحن في زمن سلاحك هو شهادتك سوا رجل او امرأة لنتغلب على مشاق هذا الزمن بالنسبة لي ارى اذا لم يكن لديك رغبه في قسم الحاسب فالبديل هنا ادارة اعمال أو محاسبة فهذين قسمين مهمين ايضا لكن اعيد واكرر الاجتهاااد والمثابرة لكي تنال اعلى الدرجات اسأل الله العلي القدير ان يقدم لك كل مافيه خير لك وان يرزقك الدرجات العلا في الدنيا والاخرة اتمنى ان اكون افدك تحية طيبة نجلاء |
والله ياطلال انى مامن خلفيه
بالشي الصح بهالدراسه وراحت علينا خلاص لكن النجلا شكله عطتك الحل المفيد والتوفيق بالله وربي يوفقك دنيا واخره |
طلال
من راي شخصي اذا ما تقدر تكامل في الحاسب حول إدارة أعمال بالتوافيق |
وعليكم السلام ورحمة الله وبركاته
أولا تخصصك حيل حيل حيل مطلوب ولك مستقبل لو حتى تخرجت بمعدل جيد أقولك ليش آنا خريجة فيزياء بنسبه حلوه مع مرتبة الشرف ومانزل لي تعيين وحتى مدارس الأهليه مكتفيه والجامعات أقدم بس الله ماكتب لي عندهم رزق وماعندي أي مجال ثاني أقدم فيه لو اني خريجة حاسب التعليم العام والخاص والعالي ، البنوك ، المستوصفات كل القطاعات محتاجته يعنـــــــــــــــــــــــــــــي لاتفرط بهالقسم خذ دروس تقووووويه شد ع نفسك وعلى فكره أخوي خريج اسلامي من جامعة الإمام بمعدل جيد وكل مستوى كم ماده يحمله و 3 سنوات وتعييييييين فكيف خريج الحاسب وإذا على النفسيه مستحيل مافيه أحد دخل الجامعه وماتعبت نفسيته أول سنتين وبعده خلاص يرتاح والأقسام اللي كتبتهم بتحوووووووول عليهم مافيه واحد منهن يبل التسبـــــــــــــد وإذا مصمم تحول حول انجليـــــــــــــــــــــــــــــــزي وغير هالقسمين شطب عليهم وأخيرا استخيــــــــــــــــــــــــــــــــــــــر ربك واستغفر كثيييييييييييييييير وعسى ربي يكتب لك كل خير . موفق خيو والله يرزق الجميع الرزق الحــــــــــلال |
بماانك طلبت المشوره انارح اقولك رأيي وبكل صراحه استمر بدراستك وفكربالسنوات الي قضيتها وفكربعد انك شاب والشاب يختلف عن الفتاة بمعنى حرام تروح منك هالسنوات الي قضيتا بهالتخصص وسبب ترددك وكرهك للقسم انك اعطيت نفسك ايحاء بـــ انك مارح تفلح وانك ماتحب هالتخصص وغيره من الايحاء السلبي انت ب استطاعتك ان تبدع والدليل انك قلت شديت حيلي وجبت معدل اومستوى افضل من الي قبل ونصيحه لك من اخت تهمها مصلحتك الدنيا دائماماتجي على مانشتهي وماكل مانتمناه نجده لذلك خليك بقسمك وهوحسب ماسعت تخصص مطلوب وله مستقبل فكرمثل ماقلت لك بالسنوات الي درستها حرام تروح عليك وصدقني مارح تبدع بالقسم الجديد لانك مادخلته من اول وبيكون عندك ملل واحباط من التجرب السابقه اعطي نفسك ايحاء ايجابي اني رح ابدع رح احصل على معدل مرتفع وشد على نفسك ولاتنسى ان شغل العالم كله على الحاسوب اتمنى اني افدتك وان شاء الله التوفيق فالك احترآمي http://174.120.22.8/%7Eturki/vb/images/smilies/14.gif |
اخواني / عقاب النهار .. وحمد الشمري خواتي / نجلاء .. وغيد .. وكبرياء الصمت الله لا يهينكم على نصايحكم ومشورتكم يا الغالين والغاليات ولا خلا ولا عدم والله يا بعدي وعسى الله يكتب اللي به خير ويوفق الجميع وكلامكم هذا والله اعتبره شرفن لي وتكفي وقفتكم لو هي بكلمه طيبه . لآ هنتووووووا جميع |
:)
طبيت لي مطب عظيـــــم بردي وجايه بعدله بس خلاص انتهـــى الترقيع :) مووووفق والعفــــو خيو |
خيي طلال انا اهنيك انك شاب مازلت تكافح
وتحاول ترفع من مستواك غيرك يرمي الكتب ويقول بلاش دراسه الشي الثاني الحاسب انا مثلك اكرهه بشكل مو طبيعي لكن قلت يابنت هذا لغة العصر مع اني شهادتي من كليه صحيه وضامنه توظيفي بالصحه الان او بعد سنين الا اني درست الحاسب واخذت دبلوم اروح يوم واغيب شهر لما عديت ولا ارزقن الله بالوظيفه الا عن طريق دراستي للحاسب والحمدلله انا الحين موظفه بقطاع خاص بشهادة الحاسب والشهاده الصحيه بالدرج اتكل على الله وادرس وعليك بالصلاة والدعاء بنية التوفيق والله مايضيع دعا عبده ياسرع الايام وانا اختك القاك متخرج وفرحان الله يوفقك يارب تحياتي ..... |
| الساعة الآن 08:42 AM. |
Powered by vBulletin® Copyright ©2000 - 2026, Jelsoft Enterprises Ltd. TranZ By
Almuhajir
HêĽм √ 3.2 OPS BY: ! ωαнαм ! © 2010