تحيةٍ منها يفوح العطر= مليانةٍ ورد وشذى زعفران
لابو جمال الشمري وإعتذر =كان التحّيه ناقصه ديدحان
لك يا رفيقي بالضماير قدر= ما هو جديدٍ مير وقته زمان
والله لو تفتش علوم الصدر = ألاّ تشوف الطيّبات السمان
كتبت لين إني قضبت الشعر = بيدي وقلت إظهرعليك الآمان
وآخذت منه أعوام خمس وعشر= وشعاد ينفع لو يزيدن ثمان
لا قرّْب أحباب الضلوع السمر=ولاحركت ريحه غصن خيزران
يا ما حرثت الأرض لين الفجر= يحرث عيوني ثم فيها إستكان
يوم أتلفت لليالي تمر= صلفه وترجد مثل رجدالحصان
قفرا وعيت لا تجيب المطر = وأنا بعد عييّت أهد العنان
تلوي وأنا الويها وضاع المفر= ضاعت مروّتها وقل الحنان
وغصبن على كل السنين القشر= أشيل نفسي من مكان لمكان
أدوَّر الغِياب ... لو بالخبر= وفراقهم سوّا سوات الزمان
يا مل قلبٍ في حشاه إنكسر= ثم إنجبر ثم إنكسر كسرزان
ما تقل له وسط الحشا مستقر= هذا وراعيّه وسيع البطان
صبرت لكن وش يفيد الصبر= مادام لا شمعه ولا شمعدان
من يوم ما هدّوا علينا القصر = الشَّامخ اللي ما بنوه بطمان
اللي ظلاله أطول من النظر = لا شك ما باقي (مشاهد) عيان

هلا بخطٍ زاد فخري فخر= ترحيبةالصايم بعيد رمضان
من شاعرٍ للشعرمثل البدر =يوضي من الجهراءلشرقي عُمان
وشمال تل ابيض و ديرة بكر= وتغْريب من حايل لديرة معان
ويبقى فهد للشعر ضابط خفر=ما هو من اللي تشري الروبيان
وأحسن كلام الآدمي ما ندر= لكن تركّد وإسمع آخربيان
إن الشواعير أربع إمية نفر = واللّي عجبني منّهم شاعران
حديهم أنت ورب كل البشر= والثاني الّلي ياختفى البعض بان
وبالوقت الاول شعرقيس وعمر= إبن معدّي كرب راع العنان
تبغى الحقيقة ودَّنا نختصر= قبل الصباح وقبل سمع الآذان
ما بين دوحتنا ودوحة قطر= كالفرق بين الصاج والصولجان
والوقت عابر والليالي عِبر= الله يعينك والله المُستعان
وقريت قصّة ست حسِن وبشر= فنوا وما باقي على الآرض فان
الاَّ الأمل موجود حتى الحشر = واللّي سواتك شمري مايهان
والنّاس تنفذ من خروت الإبر = والأ أنت بين الأحمدي والعدان
تتبع بعيرٍ ما بجلده وبر = لوإن له بطن وظهر سبرمان
قصرالاخيضرغيرقصرالحضر = كل العرب تعرف حصاة قحطان
والله كريم ودرب سكة سفر = يجمع هل المومي واهل بوبيان
وبالختم عزالله ولاة الأمر = أخوان نوره ، والشيوخ ببيان