منتديات بعد حيي - شرّاب القهوهـ والبنيه المزيونه ..قصه وقصيدهـ

بسم الله الرحمن الرحيم
السلام عليكم ورحمة الله وبركاته. . ندخل بالسالفه على طول...

زمان أيام البدو رجل ضيع نياقه وابله وراح يدور عليها
والمعروف عنه انه راعي كيف وشرّاب قهوة,,, وصار له ثلاث ايام يدور البل
وما شرب قهوة والمعروف أن شرّاب القهوة ينعمس ويتعكر مزاجه
أذا آبطى عنها..وانعمس ..يوم ناظر حوله إلى هاك البيت الشعر وهو يروح له,,,
يوم جا عند البيت صوت ياهل البيت يا هل البيت :: لين طلعت له هاك البنت المزيونه
قال انا مضيع نياقي ورجل شرّاب قهوه وصار لي ثلاث أيام بالخلا أدور إذا راعي موجود باغن أتقهوى
قالت له يجي انشالله حولّ ,, قال اذا راعي البيت ما هو هنا ماني محول ,,ولزمت عليه راعية البيت وحولّ,,
وجابت له المعاميل والدلال وقالت اخدم نفسك بنفسك...
وبالفعل الرجال شب النار وسوى قهوته ويوم أخلصت جابت له التمر والقدوع والزبده والأقط(البقل)
وتقهوى وشرب الطبخه الآولى وبهر الثانيه ورجعت له عافيته وتلين وعين خير ..
والرسول عليه الصلاة والسلام في معنى الحديث يقول ( ما خلا رجل بامرأة إلا كان الشيطان ثالثهما )
وسوس له الشيطان وقاله البنت ماهلت بك ورحبت بك إلا انها تبيك ..قال بينه وبين نفسه ..!!
بس شلون اطلبها هالشي ؟؟؟؟؟
المهم الرجال صوت : يا بنت
ويوم انها جت قال . . أسمعي :

يا زين ماترخص لنـا وزن ريشـه ::::: من مال وزن الريش ما ينقص المال
من شـي ماهو شـي ولاهو بعيشـه ::::: لاكـن عـلـي يــرد حـالـن بـعـد حـال

ويوم سمعت البيتين ضحكت وردت عليه :

ياخي ما ترضى لنا بالغـشـيشـه ::::: ولا لـك يارجـل عندنا كود فنجال
اهل النخل عـيوا على تمر بـيشه ::::: ولا يـجتمع اثنين في مال رجال

ونعم..ووالله بأخت الرجال...
فيوم سمع الرد ..ماله غير يطلب الستر والسماح..قال آستري علي يابنت
الاجواد والله ماقصدي ولاكن الشيطان وسوس لي...قالت آنا واثقه من حالي ..
والحين أنت تقهويت وتعفيت تسهّل والساتر الله ...وبمان الله ....مع السلامه
زين ،، وصلاح ،، وطيب ،،
والثلاثه آجتمعن ,,, وحسن المنطوق في بنت الحلال وأخت الرجال راعية البيت .....
والسلام خير الختام..

لـطـهـر قلوبكم