قلبي بعد فرقاك طايح ومنصاب
وأهل العذل في غيبتك تكثر الشمت

أقراك حلم في متاهات الاصحاب
وأهمس لوعدك كم عشانك أنا همت

أمرض وأطيب ولكن الجرح ماطاب
وأستر طعوني بالخفا ما تألمت

الشوق في صدري ترى كلمة عتاب
لو مانطقت بها لطيفك تندمت

أجاوب الجدران واشرح لها أسباب
ذاك الغياب اللي كسر شامخ الصمت

اضحك لوقتي وأرمقه نظرة إعجاب
ولا جيت أسولف بك عليّه تلعثمت

صاحبك من بعدك غدا ما هو بـ شاب
شيّب زماني بي وأنا ما تولمت

تدري وش اللي يجلب لقلبي أتعاب
أخاف تجرح وحشتي ما تكلمت

لكن على أيّة حال يا كل الأحباب
شكراً لغيباتك وشكراً على الصمت