اخي شيخ المافيا .. اسمح لي بتكلم بحريه دامك بديت بها ..


وماراح اسير على القاعده الجبانه .. اروح وطي وورى الشمس وتحت القمر !

لأن خادم الحرمين دائما وابدا يطالب افراد الشعب بعدم السكوت على حقهم .. وكثيرا ما يثني على صحفيين يكتبون وينتقدون بقسوه

ومنهم صحافيين حصلوا على جوائز شخصيه منه اللي يطول بعمره .. تقديرا لشجاعتهم .. واعرفهم بالإسم //


هلحين إلى متى وحنا تحت هالغمامه السوداء اللي اسمها ( البطانه ) يعني خلاص انحكم علينا نصير عبيد للبطانه ؟

ليش ما نتحقق ؟ عشان نعرف من اللي ساكت على هالبطانه ؟ ومن اللي متمصلح معهم ؟؟


البلاوي اكثر من اننا نذكرها بسطر او صفحه او كتاب حتى ..


الحين صارت السرقه عيني عينك .. وما تحتاج لحركات تمويه مثل أول

والسبب ؟؟ سكوتنا .... وخوفنا حتى من الكلام .. رغم ان ولي الأمر يطالبنا بالنهوض والكلام ..


هلحين اقرب شي يحصل بحياتنا اليوميه ..


لا جيت لطريق توه مسفلت ومضبوط ما تدري بعد ثلاث ايام ههههههه تبوني احلف انها ثلاث ايام ؟

إلا وهم حافرينه .. ليش ؟؟ عشان تمديد صحي ههههههه طيب يا تمديد صحي يالله مدد نفسك عساك ما تقوم

يجي بعد عشرين يوم وحفر من جهه ثانيه // ليش ؟ تربيط .. تخبيط .. تسليك


اي بالله تسليك ومصالح بين شركات كبيره وشركات اصغر وبيع مشاريع وفوائد من تحت الطاوله عبر سهرات الاستراحات

وحنا مساكين وربي مساكين حالتنا تبكي الحجر /


او يجيك واحد يا إما متعلم غلط .. او حاقد على الشعب هههه او مدري وش يبي

ثم يملا لك الشارع مطبات .. لعنبو دارك خربتو سياراتنا .. اللي نصها اقساط

لا وطايحين بالمطبات الصغيره تررررررر ما ينفع معها إلا انك تاخذها وانت طاير من السرعه لانك لو خففت تكسر سيارتك فعلا //


ويجيك بعدها جبل ههههه والمشكله بدون تفكير بدون ذكاء .. يملون الطريق مطبات


ومجلس الشورى يجلس على مناقشة القضيه اربع شهور .. وهي ما يبي لها ساعه زمن // لان عنده قضايا كثير

من ضمنها قياده المرأه للسياره هههههه ودعم الأنديه بعشرة ملايين لكل نادي .. والشعب مو لاقي حق خبزة التميس

وبالأخير طالعين لنا بـ ( طاقات ) يا سلام سلّم طاقات للتوظيف يعلمونك شلون تلبس الشماغ وتحط الاقلام وترحب بمدير الشركه ! وبالاخير سواق عربية تبن بمزرعة واحد مديون براتب 1500 !


قال أنجوس قال // شركة بريطانه يقعدون شهر يشرحون لك وشهي انجوس وانت ما معك حق الليموزين اللي يرجعك من مكان طاقات


والبنات وما ادراك ما البنات .. مساكين حالتهم تصعب على الملحد وربي // من 3 الفجر يقضبون الطريق
220 كيلو كلها تعب وخوف ورعب .. وما يرجعون الا العصر وجيهم صفرا .. كنهم في حالة حرب ويقومون بواجبهم بالجبهه !

عشان اربع الاف او خمس الاف يروح نصفها مواصلات وملابس !

انا اتكلم طبعا عن المحظوظين ههههه اللي لقوا تعيين // لكن تعال للي ينتظرون من عشر سنين

يبون لو وظيفه بمكان اهلي بـ 2000 ريال ... ! يا جماعه جامعيه بـ 2000 ريال مو لاقيه

والمدرس بقطر مثلا .. يتقاضى 50 الف ريال !!!!!!!!!!!!!!!!!


ولا العجايز اللي يراجعون بالضمان عشان 750 ريال ومعهم قوارير موية الصحه عشان السكر !

يا جماعه لا شفت هالمنظر انا بنفسي ودي اعطيها 700 وترتاح ببيتها


شيخ مابي اطول هذا شي بسيط .. خلني ساكت بس لاني اخاف بعد من ورى الشمس