على الهون ياللي تاخذ العلم وتوديه=ابعطيك علمٍ صح ولصاحبي وده
قبل لاسيول الشك تجتاحه وتغديه=كما سيول جده عند ما حاصرت جده
بخاطره شايف شي لوكان ما يبديه =وانا صاحبه ماكان يخفى علي سده
واظنه سِمع فيني وانا ما تسَمع فيه=لاشنوا هل النمات هجمات مرتده
ولكن غريبه بي يصدق!! وكيف؟ وليه؟=وانا درع جنبه محزمه ساعة الشده
بغيته يبوح بعلم في خاطره يخفيه=ولكن على هالحال طوّل واخذ مده
وانا لو عليه اخطيت كان اعتذر وارضيه=كما اهل السلوم الاوله جدي وجده
ولو انه مشارهني وانا ا قدره واغليه=على اقصاه مابين الرجاجيل ماحده
وانا بواردي(ن) مستحيل الهدف يخطيه=معه في حزامه ما يكفي من العده
ومن روس قومٍ ميت النار ما تخاويه=ليا صد قالوا: ياعسى الصده الصده
وأسر الصديق بموقفي.. واقهرمعاديه=ويحسب حساب لموقفي من وقف ضده
لكن صاحبي في ذمتي ما نويت أرميه=بغبة بحر ماينعرف جزره ومده
بغيته يعد النور لجل افتخر وأكسيه=من اهل الحسا بشتٍ حساوي على قده
لكنه سكت كن المواضيع ما تعنيه=وشمر (هل الردات) ما تنتظر رده
صعيب المواقف تكشف الرجل وتعريـّه=ولابد ما تكشفه الايام لابده
تقول العوارف فاقد الشي لايعطيه=واقول الضعيف يموت دمعه على خده
وانا موقفي يكفيني// وموقفه يكفيه=واشوف الفجوج وساع والارض ممتده