الشاعر / مصبح بن علي الكعبي
ممكن أضحي بمالي وممكن بحالى
الاّ السلوم الساميات وريحة جدودى
الريحه اللي متى ما عطرت شالى
يكبر مقامي واحس بقيمة وجودى
لاشم خشمي فعايل جدي وخالى
كنى معطر بريحة عود كمبودى
شاعر ورتب بنودي كيف يحلالى
والمفردات الغريبه ماهي بنودى
تاليفي البيت والموال موالى
والعود عودي ودندنبه على عودى
ماقلد الغير في الطلعة ومدخالى
اعتز بهلي وناسي والزم بحدودى
ماركب الا الكلام اللي على بالى
اورد موارد جدودي واورد عدودى
وان قلت داري دار زايد ومنزالى
ماكنى الاّ اليزيد وخلفي حشودى
مر اعصم الغترة ع راسي ومر بعقالى
وان شفت حاجه للدفاع اموه جنودى
امشي تواضع تقل في قيد اغلالى
والا على شان اللزوم اقطع قيودى
ماصعر الخد بين الناس وختالي
لكن اذا جت ع القصيد اصعر خدودى
ان قلت للقاف هيج شوي للعالى
توقف بلود الاطلسي تعظم بلودي
شبيت ضوى وانا هوجس ع فنجالى
كنه لبسني البارح مارد يهودى
استغفر الله من كلمه على بالى
اعلم بها العذال واعلم احسودى
ياقاف ياقاف قال القاف ما بالى
امسح وقايس الساحة وافرض وجودى
وارثى ودوّن مفردة قومي وألى
والا الحداثه حداثة شعر لبنودى
ماني من العام ذاك ولا من التالي
ماخذ وعاطى وعند الناس معدودى
شعر ٍ لغالي يقرب غالي بغالي
يتهامسن به بضف خدروهن خودي
ياما قلوب ٍ سحرها فلي وهالى
خلت ورود الربيع وشمت وردودى
يارهيف الحس خبرهم عن احوالى
يروم انت تتمايس طرب وتعد منشودى
لا ذبت بالصوت وانت تردد امثالى
يجرفني الموت الاحمر لاخر حدودى
احس بالحس وتسلّى وانا سالى
واهمسك والمسك وانته طالب الزودى
بالخد والخال والخلخال تختالى
وتخمر الخد لين تخدر عضودى
جسمي من الروح لاخالي ولا مالى
افوق وغيب وصحا شوي وأعودى
اصر ومربين المر والحالى
وفر وكر لاكن قلبي يرودى
ماهو غرام وهيام ولعب جهالى
قده وقدى وقد القد وقدودى
مرفوق مرموق لاقيلٍ ولاقالى
متشفر الكود نمبر كوده وكودى
متشبع الا حنان وشهد وزلالى
لا جا يجرعنى الغرام بقطع كبودى
لاباس لاباس لا سهلت مسهالى
للناس للناس والنسناس للنودى
ياملهمي هدهد الهول وهوالى
بالهون بالهون ياهل الهود ياهودى
اعوذ بربي الفلق من كل دجالى
يارب صنى غن الفتنه يامعبودى
مصلى الفرض والسنه والانفالى
عبدك وانا لك ويوم العبد موعودى
اعبدك وحمدك ع النعمة والافضالى
ماكل وشارب ولاجاهرت بسدودى
لحقوق والنوق والجمال جمالى
وش دخل الاّ الحسود ودخل ضدودى
لا سنع جدى ولا بايع سنع خالى
تسلم سلوم الجدود وريحة جدودى
الريحه اللي متى ما عطرت شالى
كنى معطر بريحة عود كمبودى