مل قلب غدى بين الحنايـا يلـوج
والله اني ماالومه لويزيـد النحيـب
صرت من لوجته انوح مثل الخلوج
يوم قفى حواره يسحبونـه صويـب
جاني العلم ماصدقت كثر الهـروج
قلت يمكن اشاعه من ردي النصيـب
شلني ماسمعتـه والقـدم ماتـدوج
في مكاني ودمعي فوق خدي صبيب
اشهـدان المنايـا شيدتلـه بـروج
في سمانا وصرنا للمراثـي نجيـب
التطم بالضماير كل ساحل ومـوج
كيف جرح الطنايا عقب موته يطيب
مات راع الطويله مستفيض النتوج
مستميل الهمم راع القلـم والاديـب
راح واقفت ركابه يوم حان الخروج
مات شيخ الطنايا والمنايـا تصيـب
وهلت دموع حائل بالمحاجر تروج
صار ينعي فراقه الخوي والغريـب
وخيم الحزن كله والتصاريف عوج
جعل ربي يعوضه بالجنان الرطيـب
والمشاعر عظيمه والمثايل تهـوج
والقدر بامر ربه لاامربـه يصيـب