مهما يكون الشعور اللي علـي بـادي
لا زلت انا الوارد اللي ماطـوى حبلـه


على القـراح الزلالـي طـال تـردادي
اشرب واصدر ظما مدري وش اشرب له


يا من تغاربتـي غيابـي وهـو عـادي
بُعد الرجل عن دواعي ذله اهيـب لـه


ماامشي قبل لا اعرف الوجهه بلا قادي
ولا صلـي الا وانـا متقبـل القبـلـه


منزالي النايفه عـن حـدري الـوادي
ورجل(ن) يجي في مسيل السيل يا هبله


أبعدت مالي غـرض فـي ذل مقعـادي
ما دام يلعب لي الذعـذاع والعـب لـه


ماني لعرفي مع اهل العـرف متـرادي
لاشك كبدي من اللـي شفـت مندبلـه


يا لاقيـة خيـر هـاك العلـم للغـادي
اللي عجز يفرق الشيحـه مـن الربلـه


أمانـتـك بلغـيـه لـكـل حـسـادي
لا غارت الكـدش وكحيـلان باصطبلـه


أنا أول العشـر مانـي للعشـر حـادي
مالك ومال افتـراض الجاهـل الأبلـه


يموت انا حاسدي مـا ياصـل ابعـادي
منّي نجوم السما لو يفهـم اقـرب لـه


ولابد ما الهايج المايـج يجـي هـادي
وكل(ن) يشوف المكان اللي يناسب لـه


إن مت مات النبـي وآبـاي واجـدادي
وما دام لي يوم مانـي ميّـت(ن) قبلـه



من روائع الشاعر الكبير

عبدالرزاق الهذيل