بسم الله الرحمن الرحيم

دون عقم الحدود وفي فياض الربيع
كل من ضاق من جو البلاد نحره

رزق ربك بلآ منه هبه للجميع
عد الاعشاب حمداً للولي واشكره

يالله انك تشَّبْع كل بطنن جويع
وترزق اللي يبي ستره وكيل شهره

الله اكبر كبار السن مع كل ريع
كل شيخٍ مثل قوس الرماة ظهره

ليه ياعازت الايام وش هالصنيع
الوقار يتعثر بالشجر وصخره

فوق محفارته يبني عظامه وجيع
دوب يقدر يدنق للكماء يحَّفره

يعتزي يوم ينهض بالقديرالسميع
ينطق الفقر بعيونه وفي مظهره

يجني الفقع ماذاقه ويرجع يبيع
ويذبحه سومة اللي عذربه وحّقَره

لجل حاجة عجوزن له وقوت الرضيع
ساج هرِم القدم لوالعيون اصّغَرَه

ياعليم السراير باب رزقك وسيع
يكسرالعظم فقره وانت من يجبره

سد حاجة مثل هذا بجاه الشفيع
عندك الحق والميزان والمحبره

شعر/متعب بن فارس بن طواله