جعل السحاب اللي مزونه .. هماليل=اليا ومره الله .. وجاء منه همال
لاقامت بروقه تكاشف .. مع الليل=يفضح سنااا برقه دجاا الليل لاقال
يوم يتشقق في مزونه .. تهاويل=ترزم رعوده .. ويتهلل تهلال
يسري على دار الكرام المشاكيل=ليلين .. والماء من مناشيه ينهال
تسبق ذعاذيع المطر .. ريحة السيل=سيله مع الوادي .. من الجال للجال
ثم تكتسي بالعشب .. إحزوم ودحيل=حتى تشوفه .. راكبن روس الاقذال
يازين شوف البل .. تدك المداهيل=انا اشهد انها شوفة ٍ .. تشرح البال
أدخل على الله .. من ردى الحظ والميل=ماردني عنها .. ياكود أقشر الفال
يقطعك ياحظ ٍ على قشره بخيل=وليا صفت لي .. قام يصفق بي الجال
لكن أعرف .. ان المراجل غرابيل=ولازم نجربها .. على كل الاحوال
والمرجله .. مادربها بالتساهيل=ولايشتريها راعي المال .. بالمال
والمرجله .. تحرم على بارد الحيل=ومن لا كواه الوقت .. ماهوب رجال
ولا كل خلق الله هذولا .. رياجيل=ولا كل من تسرج له الخيل .. خيال
حنا نشوف الجدي .. ونلد لسهيل=ترى الجدي في حال .. وسهيل في حال
يالله .. عسى يوم السعد فالمقابيل=من عقب ماجانا من الوقت .. غربال
اي والله ان قلبي .. على الديره يميل=لو كان ماني خابره .. قلب ميال
والله وانا راع الغزالات .. ما أميل=الا لشوف البل .. وشوفة هوى البال