من يم نجد وشـرق مكـه وطيبـه = لين الديار اللي جنـوب القريـات
جيت بخفوقي شوق ماينحكـي بـه = اكبر من حروف الشعر والكتابـات
شوق(ن) ماهو شوق الحبيب لحبيبه = شوق (الطنايا للكرم والجمـالات)
ولو قالوا ان الـدار ماهـي قريبـه = بقول : يعنـي ماتهـون المسافـات
ماهـم بربعـي بالليالـي الصعيبـه = أجل وربـي ماحسبـت المشقـات
(شمر) ليا صك الصليـب بصليبـه = أهجد ياجن وأنس لاهل الطويـلات
يرضخ لهم هاالطيب حشمه وهيبـه = ويرفع لهم بالعـز بيـرق ورايـات
ومن مرهم طرقي بياخـذ ضريبـه = فنجال(اشدا من خضاب الخوندات)
والموقدة تشهـد بـراس الرقيبـه = ومن طيبهم ما ينزلـون الطمانـات
(والشمري) من طيب راسه وطيبـه = به ميزة(ن) عدة حـدود المـروات
لاثارت الفزعات ، لاتنتخـي بـه! = لانه يثور من(الطنـا) دون فزعـات
الله خلقهـم للمصيبـه مصيـبـه = وللنار نار٠٠ وللمعالـي ريـادات
وللموت موت ٠٠وللهيبـه لهيبـه = وللطيب طيب٠٠وللمراجل سيادات
لكن : بهم حاجه ، ولاهـي غريبـه = يمكن يخون بها الشعـر والعبـارات
اليا بطشوا: خلوا المضارب عطيبـه = واليا عطوا: ما مدوا الا الجزيـلات
ما ارفع مكانتهم بشعـر(ن) اجيبـه = هم يرفعون حروف شعري مقامـات
واخر ما اقول بالشعر وانتهـي بـه = بحطها بقوسين واربع علامـات !!!!
(الشمري ! عيبه ! وعيبه ! وعيبه ! = اليا ارتكي للحمل شال الثقيـلات )