سرحااان
مشرفنا العزيز
فعلا رائعة تستحق التميز والصدارة
دمت بخير

قال الذي حدري جبـل طـي ساكـن
برباع حايل وسـط ذيـك المساكـن
وهجوس قلبه مع خفوقـه تشاكـن
عزي لمن مثلك شكى يابن غسـلان
غسلان رجلـن بالزمـان القديمـي
سكان غسلـه والصلايـب تميمـي
سكن بحايل عن سيـوف الغريمـي
ولااحدن ينام وله مع النـاس ديـان
ديان دينه مـن عـروق الوريـدي
ورحل لحايل يـوم حكـم الرشيـدي
وعند الضياغم حاز ثوبـن جديـدي
واختار حايل عن لظى النار مزبـان
مزبان للـي تحـت ظلعـان حايـل
وانجب حمد شيخن شهـر بالقبايـل
ومحمـد المهـاد زيـن الشمـايـل
دزه لبقعاء لاجل تدريـس الايمـان
ايمـان بالخالـق جزيـل العطايـا
وانجب فهد رجلـن نظيـف النوايـا
مواقفـه بالطيـب ماهـي خفـايـا
واسمه ظهر بين الضياغـم بليهـان
بليهان جدي يشبـه الذيـب عـاوي
واصبحت انا بالناس شاعـر وراوي
ولانا على الدنيا حريصـن قصـاوي
وبديت بحروف الهجاء نظم قيفـان
قيفان بحروف الهجاء مـن خفوقـي
من خافقن مـن ضيقتـه مايروقـي
كن الثقايل من غثـى البـال فوقـي
وهذي حروفه واسمعوها يالاخـوان
الالف ابـي لـي صاحبـن ماتهيـا
وانـا صويبـن فـي حياتـي بليـا
وقالوا لـك الله لـو تحـب الثريـا
او تشتعل كبدك من الوجـد نيـران
نيران تكـوي بسـرة القلـب كيـا
من ظالمن في عنـدل الريـم عيـا
وانا احسب انه من رجـال الحميـا
لاواعذاب اللي قضى الليـل سهـران
الباء بليـت بحـب زيـن الذوايـب
ومشيت لاجله في دروبـن صعايـب
واصبح خفوقي داخل الصـدر ذايـب
لما وقع جسمي من الغبن مرضـان
مرضان في كبدي سعيـر اللهايـب
ولا طعت رجلن كان بالشور صايـب
امشي وعقلي من هوى الزين غايب
من عقب ماني شمعتن بين الاخوان
التاء تليـت الزيـن لحـدود بيتـه
ولو كنـت داري بالهـوى ماتليتـه
لو يطلبن روحـي وقلبـي عطيتـه
يفز قلبـي لاطـرى زيـن الاعيـان
اعيـان ريمـن بالمحبـه رجيـتـه
والناس صـارت تبغضـك لانخيتـه
واليـوم ناسينـي وانـا مانسيتـه
اللي نهـوده كنهـا وصـف رمـان
الثاء ثوابي مـن ربوعـي غثاثـه
وانا الذي عمري قضى فـي تراثـه
شافوا همومـي بالمعاليـق عاثـه
وجازون عن طيبي جحايد ونكـران
نكـران فعلـي ياجماعـه خبـاثـه
من عالمن صارت طبوعـه عثاثـه
يركض بهرجات القفى فـي حثاثـه
واصبحت باللي صار ياناس خسران
الجيم جاني مـن ربوعـي عواجـه
والحسـد ولـع بالرذايـل سراجـه
يسقون كبدي من سرايـب هماجـه
كيف الحسد حتى على طيب الابـدان
ابدان تضحك لا بغـت منـك حاجـه
وتنحاش لاثارت بوجهـك عجاجـه
وتلبد لما يظهـر طريـق انفراجـه
وتعود تضحك لك مثل فعـل هامـان
الحاء حياتي دايمـن فـي جراحـه
ومحدن نشد عن صحتي ليش طاحه
ارقب حماماتن على الغصـن ناحـه
وابكي على مافات في ماض الازمان
ازمان يوم الناس طيـب وسماحـه
تضحك وتلعب وسط ذيـك البراحـه
واعرف ترى الراحه بعمرك رباحـه
احذر تصير بتالـي العمـر شقيـان
الخاء خذوني في هـروج الطناخـه
اللـي يتبـدل بالدقيـقـه منـاخـه
ان غبت حطوا بك وصوف المصاخه
وان جيت يرقص خايب الفعل طربان
طربان يذكـر ملكهـم فـي بزاخـه
وجدوده اللـي بالمخاليـق شاخـه
وقلبه به انواع الـردى والوصاخـه
يفخر بهم لو هو على العكس كوبان
الـدال دلونـي عـلـوم الوكـايـد
من شان ننسـى لابسـات القلايـد
يمكن نشوفه عقـب الايـاس عايـد
والا غديت بموج الاحـزان غرقـان
غرقـان بهمـوم القهـر والنكايـد
باللـي تسـاوي غاليـات المجايـد
عقبه دروب القلـب ماهـي سدايـد
وكلن يقول اش فيك لك عام نحفـان
الذال ذقت المـوت مـن يـوم قـذه
واظهـرت للعالـم وناسـه ولــذه
ودموع عيني من غثـى البـال رذه
دمعن من الضيقه همل مثل الامـزان
امـزان غيـظ للمعالـيـق جــذه
بالغـدر تـل عـروق قلبـي وبـذه
ام العيون اللي عـن البيـض شـذه
لاجله يروح الليل ضايق وسهـران
والراء رمى قلبي غزالـن صغيـري
غيري بجنه والحشى فـي سعيـري
والله فلا ادري عقبها وش مصيـري
سعادتي ساعـه وساعـات زهقـان
زهقان من وقتن رمانـي حسيـري
اوجس خفوقي من ظلوعي يطيـري
دربي غدى من كثر همـي عسيـري
اضحك وانا لي حروة العام مرضـان
الزاء زمول المرجلـه ضـاع عـزه
وان قلـت تكفـى كلمتـك ماتهـزه
اكبـر همومـه فـي طحينـه ورزه
خايف يموت بوسط الاسواق جيعان
جيعان والجايع سكـن وسـط غـزه
اللـي مناظيـر المـدافـع تـقـزه
وحنا نذوق العيش فـي كـل حـزه
من فضل ربي خالق الانس والجـان
السين سرك لا تذيعه علـى النـاس
الا رفيقن حـاز بالطيـب نومـاس
ترى العرب فيها حسـودن وبـلاس
لو قيل ولـد فـلان وفـلان وفـلان
وفلان ماحط القواعد علـى السـاس
وخذى بنات العفن مقطوع الارمـاس
وصارو عياله بين خايـب وهـلاس
هواه في كسب الردى ويـن ماكـان
الشين شفت النـاس يكثـر نقاشـه
باللي جمع زين المراجـل وحاشـه
لو ذمته بيضاء تقـل لـون شاشـه
قالوا سرق مـال العواجيـز بوقـان
بوقـان والله مـن تقـادح كلاشـه
مقهور ليش الناس كثـران كاشـه
لو كان لبسه مـن نظايـف قماشـه
قلبه من اوصاخ الحسد صار مليـان
الصاد صاد القلـب خلـي ومصـه
غرو سرق قلـب المعنـى وقصـه
وان شفت طـراد الغناديـر وصـه
وقل له يجهز حفر قبـره والاكفـان
اكفان سلمى مع مضـاوي وحصـه
اللي علاجك ضمتـه عقـب رصـه
كنه شعاع المـاس لا بـان فصـه
كم واحدن في حوضهن مات عطشان
الضاء ضباب العمر بالقاف هاضـي
مثل السحايب والمطـر بالفياضـي
دام الهوى مافيـه حاكـم وقاضـي
يحكـم وحكمـه للمظاليـم ميـزان
ميزان ينصف من بالاحلام خاضـي
ولا له عن عيون الحبايب معاضـي
لو ذاق رمحه بالظلـوع العراضـي
يصبر ويقضي تالي العمر مرضـان
الطاء طريق الزين كثـرت خيوطـه
والناس كثـرت بالتوالـي شروطـه
والقلب بانت مـن عذابـه نقوطـه
وقاعد يراجي شوفة الزيـن شفقـان
شفقان للي صـار محـدن يهوطـه
واشواقها وسط الخفوق امحطوطـه
لو ينكسر ترسـه وكامـل بلوطـه
العشق دايم هو سبب زيغ الاذهـان
الظاء ظلوعي في هواه معضوضـه
والروح من فرقاه بانـت رضوضـه
متى النصيب الشين ترجع حضوضه
واشوف قلبي مع هوى البال فرحـان
فرحان وعيونـي يجيهـا غموضـه
والجسم عقب الموت يقوى نهوضـه
والقلب يوفـي للحبايـب قروضـه
ويوفيه عن وقتن قضى الليل سهران
العيـن عينـي كـل هـم يلـوعـه
من يوم شفت الناس خربت طبوعـه
والنـاس خلـت بالتوالـي فزوعـه
ومن جيت قال ابعد ترى القلب بلشان
بلشان في طقـم الستايـر ونوعـه
مشغول فيها عن مجالـس ربوعـه
اوامـر الزوجـه ويمشـي بطوعـه
ممنوع يطلع قبـل تغييـر الالـوان
الغيـن غثونـي ربـوع الفـراغـه
اللي يغرك زيـن كشخـة شماغـه
ناسن عن دروب الطويـلات راغـه
ناسن غدت في تالي الوقت طليـان
طليان ينفـع جلدهـا فـي دباغـه
وتذبح لضيفك من رجـال البلاغـه
والعفن جيفـه طايحـن بالمراغـه
ماينفعـك جايـع ولا نفـع شبعـان
الفاء فديت اللي قضى الليـل غافـي
وانا رماني فـي جـروف ومهافـي
وراع المحبـه دايمـن مايخـافـي
لو شـاف قدامـه بنـادق ونيـران
نيران قلبـن شـاف غاليـه جافـي
وهـذي عوايـد لابسـات الغدافـي
من شانها تمشي لو النـور طافـي
وتنساك لو تقرن وعـوده بالايمـان
القاف قافـي مثـل مخضـر فلوقـه
في فيضتـن جتهـا لوامـع بروقـه
من راوي يفهـم ويضبـط طروقـه
وينثر تواريـخ العواشيـق قيفـان
قيفان تمشي فـي مجـاري عروقـه
ميراث عـودن بالمراجـل يسوقـه
اكثر شواعير العـرب صـار فوقـه
وصعبن تغطي لامع البـرق لابـان
الكاف كل النـاس بالفقـر ياطـوك
وان قل مالك بالرخيصـات باعـوك
وعند الولايـم والعزايـم تناسـوك
قبلـي ذكرهـا بالقوافـي سليمـان
سليمان قال افطن لمالك وانا ابـوك
ابن شريم اللي عطى القاف مسبـوك
وان زاد مالـك ياكحيـلان نـادوك
وقالوا جدودك يافتى الجود شجعـان
اللام لاموني على صـرف الامـوال
وقالوا سفيهن في تصاريف الاعمال
ويحتاج ناسن تفهم الدرب لو طـال
من شان يبقى دايـم البنـك مليـان
مليان مـن شـح الردايـا والانـذال
اللي مماته لو خسر قـرش وريـال
تقول صاب القلـب حمـى وسـلال
وياويل من حطه ضحى الكون مزبان
الميم محبوبـك اليـا صـار هايـم
وخدوده احلى مـن نجـوم النعايـم
احمه بروحك عـن جميـع الظلايـم
ولا تتركه يرقد من الهجـر زعـلان
زعلان من هـرج القفـى والنمايـم
من واحدن حسده على الراس حايـم
يسمع هروج الناس لو كـان نايـم
من كثر ماهو للصواديـف شفقـان
الواو ويلـي كـان الاحبـاب شـدو
اللي بـدرب اهـل المحبـه تـردو
ومن عند عيني في حبيبـي تعـدو
من فوق جيبن ينتجه طقـم نيسـان
نيسان مطلوب العـرب يـوم مـدو
ولا قيل عند الطعس خافـو وهـدو
واهـل المواتـر ويلهـم لا تحـدو
واللي تحدى راعي الطيب خسـران
الهاء هوى قلبي على البعـد حـدوه
اللـي لشينـات الطواريـق شالـوه
ومن غاب خلي صرت بالقوم مسفوه
حظي عن دروب الغناديـر ينحـان
ينحان عن عين اشقرن يـوم هـدوه
وبالليل قبله فـي طعامـه تناسـوه
مايلحقه في فعـل يمنـاه مشـروه
خلا الحبـاري للمخاطيـف نيشـان
الياء يمين الله عشيري تقـل ضـي
اللي كوى قلبي برمش الحـلا كـي
ريقه بلاهـوب القوايـل غـدى ري
وفي قرب نور العين ماني بظميـان
ظميان من ناسن تحدك عـن المـي
وتطوي معك حبل الوفى بالهوى طي
عقب الغلا تقطع حبالـك بـلا شـي
وراح الذي من بينكـم تقـل ماكـان
هـذا كـلام اللـي مكاويـه شاعـه
لين انكشف حبه بوسـط الجماعـه
والناس صـادت بالشماتـه كراعـه
نار الحسد بقلوبهـم تقـل بركـان
بركـان ينثـر بالتماثـيـل قـافـه
مثل الورود بروضهـا يـوم حافـه
ومن قابله في بـدع الامثـال خافـه
وبعض العرب قالوا تقل فيه شيطان
وشيطان قافي من دروبـن مشيتـه
وعمرن بريضان التعاسـه قضيتـه
وجمر الغضى حافي برجلي وطيتـه
وياكثر ماكنت اقطع الـدرب حفيـان
حفيان لكنـي مـع النـاس وافـي
والغـدر والله مادخـل فـي لحافـي
واخترت ثوبي مـن ثيابـن نظافـي
وماني على طيبي مع الناس ندمـان
ندمان ليتـي مـع صواريـم وايـل
اللي تشيـل عـن الرفيـق الثقايـل
في مجدهم حازوا جميـل الخصايـل
زمل المحامل بالمخافـه والاكـوان
اكوان قلبـي تكـوي القلـب نـاره
ومحدن وقف للي وقع فـي مغـاره
لو يشتكـي ليلـه وكامـل نهـاره
يقعد سهيرن والسبب قـل الاعـوان
اعـوان للـي مـوت مثلـه فقيـده
وماصار همه فـي حياتـه رصيـده
يطرب قلوب النـاس نـادر قصيـده
للي يبي يسمع عذاب ابـن غسـلان


صح لسان الشاعر فوازالغسلان