سمي على قلبي قبل تذبحينه
سمي عليه وقولي انك تحبيه
صدي بوجهك قبل ما تطعنينه
اخاف يبكي لا درى انك ذبحتيه
من كثر ما هالقلب عندك رهينه
بديت احس انك بجوفك حملتيه
كل ما سمعته يشتكي من انينه
اردد اسمك يمكن اسمك يعزيه
مرى سأل عنك اذا تجرحينه
كذبت وقلت انك ابد ما جرحتيه
ومره سأل عنك اذا تذكرينه
كذبت وقلت انك ابد ما نسيتيه
ما ابي اشوه صورتك وسط عينه
ومابي يحس انك بغدرك ظلمتيه
واليوم هذا القلب عينك بعينه
شلته على كفي ودمعي يغطيه
قولي لي انك يالغلا ما تبينه
قولي ان قلبك خان ما عاد يبغيه
خلي عتاب الشوق بينك وبينه
وخليني ابعد وانسى حبك وماضيه
عجزت المه وانتي تبعثرينه
وعجزت اداوي الجرح كل ما طعنتيه
ياليت بأسمك في خفوقي مدينه
وارياح غدرك حطمت له مبانيه
خليه عندك وسط علبه ثمينه
خليه يدري كيف كنتي تخونيه
جسمي وروحي والعقل بايعينه
وانا بعد بعته وما عدت باغيه
مدام هذا القلب عندك رهينه
قلبن يحبك ما لنا حاجتن فيه
خليه قصه لزمان وسنينه
قلبن يموت ولا نزل رأس راعيه
لكن طلبتك قبل ما تذبحينه
سميه عليه وقولي انك تحبيه