لاطفيني يالهموم البيض واسج الركايب=الدروب اللي بليا هم في عيني طويله
يابعد زرق المزون ويابعد غرّ السحايب=جعل والله فدوتلك نوض براق المخيله
مخلصٍ لي من همومي تسعه وتسعين شايب=لاخلينا من لحاك البيض لو انتي ثقيله
حالفٍ وان كان جيتي مرحبا والحظ غايب=وان دخلت بوجه حظي جعل مايزبن دخيله
قالوا ان الحظ لامن ركّ ملعون الصلايب=الاّ انا بقول لامن قام له خشم الفتيله
والله ان ابعد همومي صار بحساب القرايب=كل ماضاقت عيوني يعتزيبي وانتخي له
والله اني مانشدت الهم عن ويش السبايب=غير قولة كثّر الله 0 كل ماجتنا قليله
ياهمومي جعل مالك عندنا قبر ونصايب=كل همٍ يرفع المقدار كاسينا جميله
ياهمومي لو انا وياك في هوش وطلايب=من يبور بصاحبه لاسمح المولي سبيله
ويالهموم ان كان لك غيري معازيب وحبايب=مدخلك بالله لاتاطين وادي الحنثويله
والله اني محزمك لاراحت الدنيا عجايب=ووالله انك محزمي لاضيع العاقل دليله
عنك والله لو اتوب اكذب ولاني عنك تايب=من يتوب عن النواميس الحلال المستحيله
كيف ماسرج لك مهار وكيف مااشد النجايب=وانتي اكبر ميزةٍ فالدم ياويش الفصيله
حبني للشلتحه عن وجه مجدول الذوايب=يوم ناصر يذرف العبرات لافارق خليله
حي وجه المرجله لاجات باطراف المصايب=رحبي ترحيبة ابن مهيد لضيوف القبيله
ارحبي وان جات من سود الهموم ليا الهبايب=لعنبو رجلٍ لياجاته يعرضها شليله
السعد من عند والي العرش قسام الوهايب=شلّت وغلّت يمينٍ لاوهبها الله بخيله