قــولــوا للأشـــواق يوم إنه (قلـيلة أدب)=وأنا بوســـــط الرجـــــــــال تجيبها يمي
وإن كـــان مــاتدري الأشواق حنا عرب=وأنا بدوي بالهــــــوى وآغـــار من دمي
وشلــون تظــهر بطــيفه تسـتـجر الهدب=وهـــــذاك خالي وأشــــوف مقابله عمي
لا والمصـيبه طــــواريها تجيب الطرب=وأنا معــي دلتـي وأخـــــــــاف من ذمي
ياويل الأشــــــــواق لاجاني ملام وعتب=مـن شــــايبٍ ما يسـامح لانقــــص جمي
أخــاف أبهـر دلالـي لــه.. وأجيب الرطب=وأمـــد فنجـــــالي وأقــــول لطيفها سمي
وش يرضي العود لاطيّر عيونه غصب=وهــو شــــايبٍ كـــــايدٍ بالسلــم ومطمي
ومن حـاسب الشوق يوم انه بقدري لعب=ومن صــــــارطيفه شقاي وكيفي وهمي
أشوفها الهـيل قبل يجـــيه صــــالي لهب=وأشــوفها تســـترق ذوقــــي علـى شمي
وأشـــوفها النار لا ثارت بذاك الحطـــب=وأذوقـها بشفـّت الفنـــجال فــــــــي فمي
قولوا للأشــــــــواق لو فيها بقايا أدب=لاصـــــــــرت وحدي تجيب الغاليه لمي